କଟକ: ବଙ୍ଗାଳୀ ଯୁବକ କଟକରେ ନିଖୋଜ । ପତ୍ନୀ ବୁଲୁଛନ୍ତି ଥାନାରୁ ଥାନା। କଟକରୁ କଲିକତା ଯିବାକୁ ବାହାରି ଥିବା ଜଣେ ସୁନା କାରିଗର ଗତ ୫ ତାରିଖରୁ ନିଖୋଜ ହୋଇଥିବା କଟକ ଜିଆରପି ଥାନାରେ ଅଭିଯୋଗ ହୋଇଛି। ପଶ୍ଚିମବଙ୍ଗ ପଶ୍ଚିମ ମେଦିନାପୁରର ସୁମନ ବାନାର୍ଜୀ ଗତ ୬ ମାସ ହେବ ନିମଚୌଡି ଭାଷାକୋଷଲେନ୍ରେ ଏକ ବଣିଆ ଦୋକାନରେ କାମ କରୁଥିଲେ। ଗତ ୫ ତାରିଖରେ ଘରକୁ ଯିବାକୁ କହି ବାହାରିଥିଲେ । ଅନ୍ୟ ଦୁଇ କର୍ମଚାରୀ ତାଙ୍କୁ କଟକ ଷ୍ଟେସନରେ ଛାଡିଥିଲେ। ଷ୍ଟେସନରୁ ସ୍ତ୍ରୀ ଅନିନ୍ଦିତା ବାନାର୍ଜୀଙ୍କ ସହ କଥା ହୋଇଥିବାବେଳେ ତା ପରେ ତାଙ୍କ ମୋବାଇଲ ନମ୍ବର ସୁଇଚ୍ ଅଫ ହୋଇ ଯାଇଥିଲା। ୬ ତାରିଖ ସୁଦ୍ଧା ନ ପହଁଚିବାରୁ ପରିବାର ଲୋକ ବହୁ ଖୋଜାଖୋଜି କରିଥିଲେ। ତାଙ୍କ ସ୍ତ୍ରୀ ଓ ପରିବାରର ଅନ୍ୟ ଲୋକମାନେ କଟକ ଆସି ତାଙ୍କୁ ଖୋଜାଖୋଜି କରି ନ ପାଇବାରୁ ଲାଲବାଗ ଥାନା ଯାଇଥିଲେ । ଲାଲବାଗ ଥାନା ଅଭିଯୋଗ ଗ୍ରହଣ ନ କରିବାରୁ ଜିଆରିପି ଥାନାରେ ସୁମନ ହଜି ଯାଇଥିବା ନେଇ ଏକ ଏତଲା ଦାୟର କରିଛନ୍ତି। ସେ କୁଆଡେ ଗଲେ କାହିଁକି ଗଲେ ସେ ଉତ୍ତର କାହା ପାଖରେ ନାହିଁ। ତେବେ ସ୍ୱାମୀଙ୍କୁ ଖୋଜି ଆଣିବାକୁ କାକୁତି ମିନତୀ ହୋଇଛନ୍ତି ଅନିନ୍ଦିତା।