କ୍ରୀଡ଼ା ଶିକ୍ଷୟିତ୍ରୀ ତନୁଜାଙ୍କ ଆତ୍ମହତ୍ୟା, ମୋବାଇଲ କହିବ ମୃତ୍ୟୁ ରହସ୍ୟ
ଉମରକୋଟ (କେନ୍ୟୁଜ୍) : ନବରଙ୍ଗପୁର ଜିଲ୍ଲା ଉମରକୋଟ ସହରରେ ଜଣେ କ୍ରୀଡା ଶିକ୍ଷୟିତ୍ରୀଙ୍କ ଆତ୍ମହତ୍ୟାକୁ ନେଇ ଏବେ ସମସ୍ତଙ୍କ ମନରେ ଉଠୁଛି ଅନେକ ପ୍ରଶ୍ନ । ପରିବାର ଠାରୁ ଆରମ୍ଭ କରି ତାଙ୍କ ସହପାଠୀ ଓ ଉମରକୋଟ ଜନସାଧାରଣ ଏହି ଆତ୍ମହତ୍ୟାକୁ ସହଜରେ ବିଶ୍ୱାସ କରି ପାରୁ ନାହାନ୍ତି। ତନୁଜା ଉମରକୋଟ ନିକଟସ୍ଥ ଜାମରୁଣ୍ଡା ଠାରେ ଥିବା ମଙ୍ଗଳ ବିଭାଗ ବାଳିକା ଉଚ୍ଚ ବିଦ୍ୟାଳୟରେ କ୍ରୀଡା ଶିକ୍ଷୟିତ୍ରୀ ଭାବେ କାର୍ଯ୍ଯ କରୁଥିଲେ ।
ଏତେ ଖୁସ୍ ମିଜାଜ୍ ଓ ଅନ୍ଯକୁ ବଞ୍ଚିବାର ବାଟ ଦେଖାଉଥିବା ଏହି କ୍ରୀଡା ଶିକ୍ଷୟିତ୍ରୀ ତନୁଜା ବିଶ୍ୱାସଙ୍କ ଆତ୍ମହତ୍ୟାକୁ ନେଇ ସମଗ୍ର ସହର ସ୍ତବ୍ଧ। ଟିକ୍ଟକ୍ ମାଧ୍ୟମରେ ନିଜର ନାଚିବା ଭିଡ଼ିଓ ସୋସିଆଲ ମିଡିଆରେ ପୋଷ୍ଟ କରି ଖୁବ ଚର୍ଚ୍ଚାରେ ରହୁଥିଲେ ତନୁଜା । ତେବେ କେଉଁ ପରିସ୍ଥିତିରେ ତନୁଜା ଆତ୍ମହତ୍ୟା କଲେ, କୌଣସି ମାନସିକ ଚାପରେ ରହିଥିଲେ ନା ତାଙ୍କୁ କେହି ଆତ୍ମହତ୍ୟା କରିବାକୁ ବାଧ୍ୟ କଲା। ତାର କାରଣ ଖୋଜୁଛି ଉମରକୋଟ ପୋଲିସ । ତନୁଜାଙ୍କ ଇଂରାଜୀ ଲେଖା ଓ ବେଙ୍ଗଲି ଭର୍ସନ୍ର ଏକ ସୁଇସାଇଡ ନୋଟ ଓ ମୋବାଇଲ ପୋଲିସ ହାତରେ ରହିଛି। ତେବେ ସୁଇସାଇଡ ନୋଟ୍୍ରେ ମୃତ୍ୟୁ ପାଇଁ କାହାକୁ ଦାୟୀ କରି ନାହାନ୍ତି ତନୁଜା ।
ହେଲେ ଆଶ୍ଚର୍ଯ୍ୟର କଥା ହେଉଛି, ଘଟଣାକୁ ଆଗକୁ ନବଢ଼େଇବାକୁ ଓ ତଦନ୍ତ ନକରିବାକୁ ଲେଖିଛନ୍ତି । ଏକଥା କାହିଁକି ଲେଖିଛନ୍ତି ? ତଦନ୍ତ ହେଲେ ଘଟଣା ସାମ୍ନାକୁ ଆସିବ?
ପାରିବାରିକ କଳହ, ପ୍ରେମ ନା ଆଉ କିଛି ? ମୃତ୍ୟୁର କାରଣକୁ କାହିଁକି ଲୁଚେଇ ରଖିବାକୁ ଚାହିଁଛନ୍ତି ତନୁଜା? ଏ ସମସ୍ତ ଗୁମର ଖୋଲିବ ତାଙ୍କ ମୋବାଇଲ । ତେବେ ପୋଲିସ ପାଇଁ ଏହି ମାମଲା ଏକ ବଡ଼ ଚ୍ଯାଲେଞ୍ଜ । ଆତ୍ମହତ୍ୟା ପୂର୍ବରୁ କାହା ସହ ତନୁଜା କଥା ହୋଇଥିଲେ ମୋବାଇଲର CDRରୁ ଜଣାପଡ଼ିବ । ଏହାର ରିପୋର୍ଟ ଦୁଇ ଦିନ ଭିତରେ ଆସିବ ।ତା ପରେ ଆତ୍ମହତ୍ୟାର ଗୁମର ଖୋଲି ପାରେ ବୋଲି ଉମରକୋଟ ଥାନା ଆଇଆଇସି ଦୀପକ କୁମାର ଜେନା ସୂଚନା ଦେଇଛନ୍ତି। ଉମରକୋଟ ଥାନାରେ ଏନେଇ ଏକ ଅପମୃତ୍ୟୁ ମାମଲା ରୁଜୁୁ କରାଯାଇଛି
