ପୋଲାଭରମ ପ୍ରକଳ୍ପ ମାମଲାରେ ୪ ଜଣିଆ ବିଶେଷଜ୍ଞ କମିଟିର ସୁପାରିସକୁ ଗ୍ରହଣ କଲେ NGT
କେନ୍ୟୁଜ୍(ବ୍ୟୁରୋ): ଆନ୍ଧ୍ରପ୍ରଦେଶର ଗୋଦାବରୀ ନଦୀ ଉପରେ ବିବାଦୀୟ ପୋଲାଭରମ ପ୍ରକଳ୍ପ ମାମଲାରେ ୪ ଜଣିଆ ବିଶେଷଜ୍ଞ କମିଟିର ସୁପାରିସକୁ ଗ୍ରହଣ କଲେ ନ୍ୟାସନାଲ ଗ୍ରୀନ ଟ୍ରିବ୍ୟୁନାଲ-ଏନଜିଟି । ୪ ଜଣିଆ ମିଳିତ କମିଟି ସେପ୍ଟେମ୍ବର ୮ ତାରିଖରେ ରିପୋର୍ଟ ଦେଇଥିଲେ । ରିପୋର୍ଟରେ ୯ଟି ସୁପାରିସ କରାଯାଇଥିଲା । ସେଭିତରୁ ୮ଟି ସୁପାରିସକୁ ଗ୍ରହଣ କରିଛନ୍ତି ଏନଜିଟି । ମାମଲାକୁ ସୁପ୍ରିମକୋର୍ଟଙ୍କୁ ସ୍ଥାନାନ୍ତର ପାଇଁ ଦେଇଥିବା ସୁପାରିସକୁ ଗ୍ରହଣ କରିନାହାନ୍ତି । ଯେଉଁ ୮ଟି ସୁପାରିସକୁ ଏନଟିଜି ଗ୍ରହଣ କରିଛନ୍ତି ସେଗୁଡ଼ିକ ହେଲା –
- ଆନ୍ତଃରାଜ୍ୟ ରାଜିନାମା ଅନୁସାରେ ପୋଲାଭରମ ପ୍ରକଳ୍ପ ଅଥରିଟି କାର୍ଯ୍ୟ କରିବେ ।
- ଗୋଦାବରୀ ଜଳ ବିବାଦ ଟ୍ରିବ୍ୟୁନାଲ ଦେଇଥିବା ୧୯୮୦ର ରାୟକୁ ମାନିବେ ।
- ଜଳମଗ୍ନ ହେବାକୁ ଥିବା ଅଞ୍ଚଳର ଅନୁଧ୍ୟାନ କରାଯିବ ।
- ବ୍ୟାକ ୱାଟର ବାବଦରେ ମଧ୍ୟ ଅନୁଧ୍ୟାନ ହେବ ।
- ପ୍ରକଳ୍ପ ଯୋଗୁ କୌଣସି କୁପ୍ରଭାବ ପଡିଲେ ଏହାର ସଂପୂର୍ଣ୍ଣ ଦାୟିତ୍ୱ ଆନ୍ଧ୍ରପ୍ରଦେଶ ଜଳସଂପଦ ବିଭାଗ ପାଖରେ ରହିବ ।
- ପ୍ରକଳ୍ପର ପ୍ରଭାବ ନେଇ ତେଲେଙ୍ଗାନା, ଛତିଶଗଡ଼ ଓ ଓଡ଼ିଶା ସହ ଆଲୋଚନା କରିବ ଆନ୍ଧ୍ର ।
- ଓଡ଼ିଶାର ୬ହଜାର ୩ଶହ ୧୬ ଜଣ ଓ ଛତିଶଗଡ଼ର ୧୧ହଜାର ୭୬୬ ଲୋକଙ୍କୁ ଥଇଥାନ କରାଯିବ ।
- ଦୁଇମାସ ଭିତରେ ପୋଲାଭରମ ପ୍ରକଳ୍ପ ଅଥରିଟି, CWC, ଆନ୍ଧ୍ର, ତେଲେଙ୍ଗାନା, ଓଡ଼ିଶା ଓ ଛତିଶଗଡ଼ ସହ ବୈଠକ ହେବ ।
ପୂର୍ବରୁ ମହାନଦୀ ଜଳବିବାଦ ନେଇ ତତ୍କାଳୀନ କେନ୍ଦ୍ର ଜଳ ସଂପଦ ମନ୍ତ୍ରୀଙ୍କ ଉପସ୍ଥିତିରେ ଛତିଶଗଡ଼ ଓ ଓଡ଼ିଶା ମଧ୍ୟରେ ବୈଠକରେ ଆଲୋଚନା ହୋଇଥିଲା । ହେଲେ ଏଥିରୁ କିଛି ନିର୍ଯାସ ବାହାରିପାରିନାହିଁ କି ବିବାଦର ଏଯାଏ ସମାଧାନ ହୋଇପାରିନି । ସେହିପରି କାବେରୀ ନଦୀ ଜଳ ବଣ୍ଚନକୁ ନେଇ କର୍ଣ୍ଣାଟକ ଓ ତାମିଲନାଡୁ ମଧ୍ୟରେ ଆଲୋଚନାରୁ ନିଷ୍କର୍ସ ବାହାରିପାରିନାହିଁ । ଏପରିସ୍ଥିତିରେ ପୋଲାଭରମ ପ୍ରକଳ୍ପ ବାବଦରେ ମିଳିତ ବୈଠକ କେତେଦୂର ଫଳପ୍ରଦ ହେବ ତା ଉପରେ ନଜର ରହିବ ।…
