ବିପଦରେ ଓଡ଼ିଶାର ଏକମାତ୍ର ସାମୁଦ୍ରିକ ଅଭୟାରଣ୍ୟ ଗହିରମଥା। ବିରଳ ଅଲିଭ ରିଡଲେ କଇଁଛଙ୍କ ସୁରକ୍ଷା ପାଇଁ ସୁପ୍ରିମକୋର୍ଟ ଏଠାରେ ଟ୍ରଲର ଚଳାଚଳ ଉପରେ କଟକଣା ଲଗାଇଥିଲେ । ବନବିଭାଗ ପକ୍ଷରୁ ବର୍ଷତମାମ ପାଟ୍ରୋଲିଂ ଚାଲିଥିଲେ ମଧ୍ୟ ବେଧଡ଼କ ଭାବେ ଟ୍ରଲର ଚଳାଚଳ କରୁଥିବା ଅଭିଯୋଗ ହୋଇଛି। ଚଳିତ ବର୍ଷ ୧୦୨ଟି ଟ୍ରଲର ଜବତ ହେବା ସହ ୮୦୦ରୁ ଅଧିକ ମତ୍ସ୍ୟଜୀବୀଙ୍କୁ ଗିରଫ କରିଛି ବନବିଭାଗ । ଏନେଇ ଟ୍ରଲର ମାଲିକମାନେ ରାଜନଗର ବନଖଣ୍ଡ କାର୍ୟ୍ୟାଳୟ ଘେରାଉ କରିବା ସହ ସେମାନଙ୍କୁ ମାଛ ମାରିବାକୁ ଅନୁମତି ଦେବାକୁ ଅଡ଼ି ବସିଥିଲେ। ଅନୁମତି ନମିଳିଲେ ସମୁଦ୍ର ମଧ୍ୟରେ ଜୋରଦାର ଲଢେଇ ହେବ ବୋଲି ବନବିଭାଗକୁ ଧମକ ଦେଇଛନ୍ତି। ଟ୍ରଲର ମାଲିକ ଓ ମାଛ ମାଫିଆଙ୍କ ଧମକକୁ ବିରୋଧ କରିଛି ଗହୀରମଥା କଇଁଛ ସୁରକ୍ଷା ସମିତି।
