CAA ଓ NRCକୁ ନେଇ ସାରା ଦେଶରେ ଏବେ ବିରୋଧ ପ୍ରଦର୍ଶନ କରାଯାଉଛି ଯେଉଁ କାରଣରୁ ଉତ୍ତରପ୍ରଦେଶ ସମେତ ଅନ୍ୟ ରାଜ୍ୟ ଗୁଡିକରେ ଇଣ୍ଟରନେଟ ସେବା ବନ୍ଦ କରିଦିଆଯାଇଛି । ଇଣ୍ଟରନେଟ ବନ୍ଦ ହୋଇଯିବା କାରଣରୁ ମଧ୍ୟ ବହୁତ ହଇରାଣ ହେଉଛନ୍ତି ଏବଂ ଅନ୍ୟପଟେ ଟେଲିକମ କମ୍ପାନୀ ଗୁଡିକୁ ମଧ୍ୟ ଅନେକ କ୍ଷତି ସହିବାକୁ ପଡୁଛି । ଏପରିସ୍ଥଳେ ସେଲ୍ୟୁଲାର ଆସୋସିଏସନ ଅଫ ଇଣ୍ଡିଆ(COAI) କମ୍ପାନୀ ଗୁଡିକୁ ହେଉଥିବା କ୍ଷତିକୁ ନେଇ ଏକ ରିପୋର୍ଟ ଜାରିକରିଛି । ଯେଉଁଥିରେ କୁହାଯାଇଛି ଯେ ଇଣ୍ଟରନେଟ ବନ୍ଦ ହେବାଦ୍ୱାରା କମ୍ପାନୀଗୁଡିକର ଏକ ଘଂଟାରେ ଦୁଇ କୋଟି ଲେଖାଏଁ କ୍ଷତି ହେଉଛି ।
ସୂଚନା ଅନୁଯାୟୀ ଉତ୍ତରପ୍ରଦେଶ ସରକାର ଆଜି ବି ରାଜ୍ୟର ଅନେକ ବଡ଼ ବଡ଼ ସହର ସହିତ ଅନ୍ୟ ରାଜ୍ୟଗୁଡ଼ିକରେ ମଧ୍ୟ ଇଣ୍ଟରନେଟ ସେବା ବନ୍ଦ କରିଦେଇଛି । କୁହାଯାଉଛି ଯେ ସରକାର CAA ଓ NRCକୁ ନେଇ ଭାଇରଲ ହେଉଥିବା ଭୁଲ ତଥ୍ୟ ଉପରେ ରୋକ ଲଗାଇବା ପାଇଁ ଏପରି ପଦକ୍ଷେପ ନେଇଛନ୍ତି । ତେବେ COAI ଇଣ୍ଟରନେଟ ବନ୍ଦ ହେବା କାରଣରୁ ଟେଲିକମ କମ୍ପାନୀଗୁଡିକୁ ହାହେଉଥିବା କ୍ଷତିକୁ ନେଇ ଭାରତ ସରକାରଙ୍କ ନିକଟକୁ ଏକ ପତ୍ର ଲେଖିଛନ୍ତି ଯଦିଓ ସରକାର ବର୍ତ୍ତମାନ ପର୍ଯ୍ୟନ୍ତ ଏହାର କୌଣସି ଉତ୍ତର ଦେଇନାହାନ୍ତି । ଏହା ପୂର୍ବରୁ CAOIର ଚେୟାରମ୍ୟାନ କହିଥିଲେ ଯେ ପେପର ଲିକ ଠାରୁ ନେଇ ଆର୍ଟିକିଲ 370 ହଟାଇବା ପର୍ଯ୍ୟନ୍ତ ରାଜ୍ୟରେ ଇଣ୍ଟରନେଟ ବନ୍ଦ କରିଦିଆଯାଉଛି ଯେଉଁ କାରଣରୁ ସାଧାରଣ ଲୋକ ତ ସମସ୍ୟାର ସମ୍ମୁଖୀନ ହେଉଛନ୍ତି ତାସହିତ କମ୍ପାନୀଗୁଡିକୁ ମଧ୍ୟ ଅନେକ କ୍ଷତି ସହିବାକୁ ପଡୁଛି ।
ଇଣ୍ଟରନେଟ ବନ୍ଦ ମାମଲାରେ ଭାରତ ରହିଛି ସବୁଠାରୁ ଆଗରେ
ଇଣ୍ଡିଆନ କାଉନସିଲ ଫର ରିସର୍ଚ୍ଚ ଅନ ଇଣ୍ଟରନେଶନାଲ ଇକୋନୋମିକ ରିଲେସନର ଏକ ରିପୋର୍ଟ ଅନୁଯାୟୀ ଇଣ୍ଟରନେଟ ବନ୍ଦ ମାମଲାରେ ଭାରତ ଅନ୍ୟଦେଶ ତୁଳନାରେ ସବୁଠାରୁ ଆଗରେ ରହିଛି । ତେବେ ଇଣ୍ଟରନେଟ ବ୍ୟାନ କରିବା ଦ୍ୱାରା ଦେଶକୁ ଏହା ଆର୍ଥିକ କ୍ଷତି ପହଞ୍ଚାଉଛି ।
ଭାରତରେ ୨୦୧୨ ଠୁ ନେଇ ୨୦୧୯ ପର୍ୟ୍ୟନ୍ତ ସମୁଦାୟ ୩୭୭ ଥର ଇଣ୍ଟରନେଟ୍ ବନ୍ଦ କରାଯାଇଛି । କାଶ୍ମୀରରେ ୧୮୦ ଥର, ରାଜସ୍ଥାନରେ ୬୮ ଥର, ଉତ୍ତରପ୍ରଦେଶରେ ୨୭ ଥର, ବିହାରରେ ୧୧ ଥର ଏବଂ ଉତ୍ତରାଖଣ୍ଡରେ ୨ ଥର ଇଣ୍ଟରନେଟ ବ୍ୟାନ୍ କରାଯାଇଛି ।