ନିଛକ ଅଭିନୟର ଅଭିନେତା ଅଶ୍ରୁ ମୋଚନ ମହାନ୍ତି, ଜାଣନ୍ତୁ ତାଙ୍କ ଜୀବନ କାହାଣୀ
ଯିଏ ପରଦାରେ ଅଭିନୟ କରି ଆଖିରୁ ଲୁହ ଝରାଇଲେ ସତରେ କାନ୍ଦିଲା ଭଳି ଲାଗେ । ଯିଏ ଡାଇଲଗ୍ ଦେଲେ ମନକୁ ଛୁଇଁ ଯାଏ । ଓଲିଉଡ୍ ହେଉ କି ଟିଭି, ପରଦାରେ ଯେଉଁ ବ୍ୟକ୍ତିଟି ଭାରି ଆପଣାର ଲାଗେ, ନିଜ ଭିତରୁ ଜଣେ କେହି ଆଖି ଆଗରେ ଛାଡ଼ି ହେଲା ଭଳି ଜଣାପଡ଼େ, ସେ ହେଉଛନ୍ତି ଅଶ୍ରୁମୋଚନ ମହାନ୍ତି । ନାଁ ସିନା ଅଶ୍ରୁ ମୋଚନ ହେଲେ ତାଙ୍କର ଦରଦୀ ଅଭିନୟ ଦର୍ଶକଙ୍କ ଆଖିରେ ଲୁହ ନେଇ ଆସେ । ଦୀର୍ଘ ବର୍ଷ ଧରି ଅଭିନୟ ଦୁନିଆରେ ରହି ବରିଷ୍ଠ କଳାକାର ପାଲଟି ଗଲେଣି । ତଥାପି ତାଙ୍କ ଅଭିନୟର ଯାଦୁ ଲୋକଙ୍କୁ ସବୁବେଳେ ଅଭିଭୂତ କରି ଆସୁଛି । … ଅଶ୍ରୁ ବା ଅଶ୍ରୁ ଭାଇ ଭାବେ ସମସ୍ତଙ୍କ ପାଖରେ ସେ ପରିଚିତ ।
ଅତି ନିକଟରେ ପାଇଥିଲୁ ଆମେ ଅଶ୍ରୁ ଭାଇଙ୍କୁ । ତାଙ୍କ ଜୀବନ କାହାଣୀ ବିଷୟରେ କଥା ହେଲୁ । ଜାଣିଲୁ ଏଇ କଳାକାରଙ୍କ ସୁଖ ଦୁଃଖର କଥା । …. ଅତି ଛୋଟ ବେଳୁ ଅଭିନୟ ଆରମ୍ଭ କରିଥିଲେ ସେ । କେନ୍ଦୁଝର ଜିଲ୍ଲା ଆନନ୍ଦପୁରରୁ ଆରମ୍ଭ କରି ଭୁବନେଶ୍ୱର ଏବଂ ଓଲିଉଡ ପର୍ଯ୍ୟନ୍ତ ଲମ୍ବା ଯାତ୍ରା ଶୁଣିଲୁ ତାଙ୍କରି ମୁହଁରୁ ।
ଫ୍ୟାନ୍ସିଡ୍ରେସ୍ କମ୍ପିଟିସନ୍ରୁ ଆରମ୍ଭ
ପିଲାଦିନର ସେଇ ଫ୍ୟାନ୍ସିଡ୍ରେସ୍ କମ୍ପିଟିସନ୍ରୁ ଆରମ୍ଭ ହେଇଥିବା ଅଭିନୟ ଯେ ତାଙ୍କର ପ୍ରଥମ ମଞ୍ଚ ଥିଲା ଏକଥା କେହିବି ଭାବି ନଥିଲେ । ପରେ ଗାଁରେ ହେଉଥିବା ଡ୍ରାମା, ସ୍କୁଲର ବାର୍ଷିକ ଉତ୍ସବରେ ଅଭିନୟ ସହ ବଢ଼ି ଚାଲିଲା ରୁଚି । ବାପା ସେତେବେଳେ ଓକିଲାତି କରୁଥିବାରୁ ପିଲାମାନଙ୍କୁ ଭଲ ଜାଗାରେ ପାଠ ପଢ଼ାଇ ଚାକିରି କରିବା ପାଇଁ ଚାହୁଁଥିଲେ। +୨ ବିଜ୍ଞାନ ପଢା ପରେ କିଛି କରିବାକୁ ଇଚ୍ଛାଥିଲା । ତେବେ ଗୋଟିଏ ଦିନରେ ପଡ଼ିଲା ଏୟାରଫୋର୍ସ ଏବଂ ସଙ୍ଗୀତ ନାଟକ ଏକାଡେମୀରେ ଇଣ୍ଟରଭ୍ୟୁ। ଆଉ ସେ ସାକ୍ଷାତକାର ଦେଲେ ସଙ୍ଗୀତ ନାଟକ ଏକାଡେମୀ ପାଇଁ । ବାସ୍ ତା ପରେ ବଦଳି ଗଲା ଜୀବନର ଗତିପଥ ।
ସଙ୍ଗୀତ ନାଟକ ଏକାଡେମୀରୁ ଶିକ୍ଷା
ସଙ୍ଗୀତ ନାଟକ ଏକାଡେମୀରୁ ଉତ୍ତୀର୍ଣ୍ଣ ହେବା ପରେ ଯୋଡ଼ି ହୋଇଗଲେ ନାଟ୍ୟ ସଂସ୍ଥା ଶତାବ୍ଦୀର କଳାକାର ସହ । ନାଟକ ସହ ଆକାଶବାଣୀରେ ରେଡିଓ ଆର୍ଟିଷ୍ଟ ବି ପାଲଟି ଗଲେ । ରେଡିଓରେ ହେମନ୍ତ ଦାସ, ବାବି ଓ ଦୀନେଶ ବାବୁଙ୍କ ସହ କାମ କରି ବହୁ ଅନୁଭୂତି ହାସଲ କରିଥିଲେ ।
ଶତାବ୍ଦୀର କଳାକାରର ନାଟକ ବାବାଜୀ ପ୍ରଥମେ ଦୂରଦର୍ଶନରେ ପ୍ରସାରିତ ହେଲା ପରେ ଦୂରଦର୍ଶନରେ କଳାକାରର ପରିଚୟ ପାଇଲେ ସେ। ଅଭିନୟରେ ପେଟ ପୂରାଇବା ଭଳି ସ୍ଥିତି ନଥିଲା । ତେଣୁ ଗୁଜୁରାଣ ମେଣ୍ଟାଇବା ପାଇଁ ରାତିରେ ଡଙ୍ଗା ତିଆରି କରି ବିକି କିଛି ରୋଜଗାର ମଧ୍ୟ କରୁଥିଲେ ।
ସିନେ ଦୁନିଆରେ ପ୍ରବେଶ
ସିନେ ଦୁନିଆରେ ପ୍ରବେଶ କଲେ ଏଭଳି ଭାବରେ । ପ୍ରଥମେ ବାଞ୍ଛାନିଧି ପଟ୍ଟନାୟକଙ୍କ ସହ ମେକଅପ୍ରେ ସାହାଯ୍ୟ କଲେ । ପୁଣି ସେତେବେଳେର ଲୋକପ୍ରିୟ ହିରୋ ଶ୍ରୀରାମ ପଣ୍ଡାଙ୍କ ସହ ସହକାରୀ ନିର୍ଦ୍ଦେଶକ ଭାବେ କାମ ଆରମ୍ଭ କରିଥିଲେ ‘କୁରୁକ୍ଷେତ୍ର’ ଚଳଚ୍ଚିତ୍ରରେ। ଏଥିରେ ଅଭିନୟ ବି କଲେ । ଛୋଟିଆ ହେଲେ ବି ତାଙ୍କର ଚମତ୍କାର ଅଭିନୟ ସମସ୍ତଙ୍କୁ ଆକର୍ଷିତ କଲା । ତାପରେ ଗୋଟିଏ ପରେ ଗୋଟିଏ ଫିଲ୍ମ ଓ ଭିନ୍ନ ଭିନ୍ନ ଚରିତ୍ରରେ ଅଭିନୟ କରି ଚାଲିଲେ ଅଶ୍ରୁ ମୋଚନ । ଚକା ଆଖି ସବୁ ଦେଖୁଛି, ପୁଅ ମୋର କାଳିଆ ସୁନା, ଯୋର୍ ଯାର୍ ମୂଳକ ତାର, ଆସୁଚି ମୋ କାଳିଆ ସୁନା, ଆଦି ଫିଲ୍ମରେ ଅଭିନୟ କରିବାର ସୁଯୋଗ ପାଇଲେ । ପରେ ପରେ ଯାତ୍ରାରେ ମଧ୍ୟ ଅଭିନୟ କରିଛନ୍ତି ଏହି ବହୁରୂପୀ କଳାକାର ।
ଏଇ ନାଁରେ ଅଛି ରହସ୍ୟ
କାଞ୍ଚି ଅଭିଯାନ ସମୟରେ ରାଜା ଯେତେବେଳେ ଫେରୁଥିଲେ ସେତେବେଳେ କିଛି କରଣ ସମ୍ପ୍ରଦାୟର ଲୋକଙ୍କୁ ଖୋର୍ଦ୍ଧାରୁ ଆଣିଥିଲେ କେନ୍ଦୁଝରକୁ । ସେମାନଙ୍କ ମଧ୍ୟରେ ଅଶ୍ରୁମୋଚନଙ୍କ ପରିବାର ଚାଲି ଆସିଥିଲେ । ଯେଉଁମାନେ ରାଜାଙ୍କର ଖଜଣା ଆଦାୟ କରିବାରେ ନିୟୋଜିତ ହୋଇଥିଲେ ବୋଲି କୁହନ୍ତି ଅଶ୍ରୁ । ଆଉ ଏଇ ଅଶ୍ରୁମୋଚନ ନାଁ ପଛରେ ରହିଛି ଏକ ରହସ୍ୟ । ଅଶ୍ରୁଙ୍କ ବାହାଘର ହୋଇଥିଲା ଟିକେ ନିଆରା ଢଙ୍ଗରେ । ଏବେ ତାଙ୍କର ଗୋଟିଏ ପୁଅ ଓ ଝିଅ ସହ ସୁଖୀ ସଂସାର ।
ବର୍ତ୍ତମାନର କୋଭିଡ ପରିସ୍ଥିତିରେ କଳାକାର ମାନେ ଦୁଃଖ ଦୁର୍ଦ୍ଦିନ ଦେଇ ଗତି କରୁଛନ୍ତି । ଆଗକୁ ଏ ଦିନ ଦୂରେଇ ଯିବ ଏବଂ ପୁଣି କଳାକାରମାନେ ଲୋକଙ୍କୁ ହସାଇବେ ଓ କନ୍ଦାଇବେ । ଏଇ ଆଶା ହେଉଛି ଅଶ୍ରୁଙ୍କର ।
