ପାଣି ପାଇଁ ଡହଳ ବିକଳ ହେଉଥିବା ବଣୁଆ ହାତୀ ପଲକୁ ମିଳିଲା ଆଶ୍ଵସ୍ତି, ବର୍ଷା ଯୋଗୁଁ ଶୁଖିଲା ଜଳଭଣ୍ଡାରରେ ପାଣି ଝରିଲା
ପିଇବା ପାଣି ପାଇଁ ଡହଳ ବିକଳ ହେଉଥିବା ଏହି ବଣୁଆ ହାତୀ ପଲକୁ ମିଳିଲା ସାମାନ୍ୟ ଆଶ୍ଵସ୍ତି । ଅଦିନିଆ ବର୍ଷା ଯୋଗୁଁ ଜଙ୍ଗଲି ନିଆଁରୁ ତ୍ରାହି ମିଳିଲା । ଶୁଖିଲା ଜଳଭଣ୍ଡାରରେ ପାଣି ଝରିଲା ।
ଭଞ୍ଜନଗର(କେନ୍ୟୁଜ): ଜଙ୍ଗଲ ଭିତରେ ତାତି, ବାହାରେ ଜଳକଷ୍ଟ । ଗୋଟିଏ ରୁ ଆଉ ଗୋଟିଏ ଜଙ୍ଗଲ , ଏ ଗାଁରୁ ସେ ଗାଁକୁ ଚକ୍କର ମାରୁଥିବା ହାତୀପଲଙ୍କୁ ଗୋଡ଼େ ଗୋଡେ ଜଗି ରହୁଥିଲା ବନବିଭାଗ । ପୁଣି କେଉଁଠି, ପାଣି ପାଇଁ ଶୁଖିଲା ଜଳାଶୟକୁ ଖୋଳିବାକୁ ପଡୁଥିଲା । ଏବେ ଅଦିନିଆ ବର୍ଷା, କିଛି ମାତ୍ରାରେ ଦୂର କରିଛି, ଜଳକଷ୍ଟ ପରିସ୍ଥିତି । ଯାହାକି, ପାଣି ପାଇଁ ବଣୁଆ ହାତୀଙ୍କ ଏଭଳି କିଛି ସମସ୍ୟାର ଚିତ୍ର, କିଛିଦିନ ଧରି ଦେଖିବାକୁ ମିଳିଥିଲା ଗଂଜାମ ଜିଲ୍ଲାରେ ।
ହେଲେ ପିଇବା ପାଣି ପାଇଁ ଡହଳ ବିକଳ ହେଉଥିବା ଏହି ବଣୁଆ ହାତୀ ପଲକୁ ମିଳିଲା ସାମାନ୍ୟ ଆଶ୍ଵସ୍ତି । ଅଦିନିଆ ବର୍ଷା ଯୋଗୁଁ ଜଙ୍ଗଲି ନିଆଁରୁ ତ୍ରାହି ମିଳିଲା । ଶୁଖିଲା ଜଳଭଣ୍ଡାରରେ ପାଣି ଝରିଲା । ପାଖ ଗାଁରୁ ଯାଇ ଜଙ୍ଗଲ ମୁହାଁ ହେଲେ ହାତୀପଲ । ଅସହ୍ୟ ଗ୍ରୀଷ୍ମ ପ୍ରବାହ ପାଇଁ ଦୁଇଦିନ ଧରି ଲାଗି ରହିଥିବା ବର୍ଷା ଯୋଗୁଁ, ଗଂଜାମ ଜିଲ୍ଲା ଭଂଜନଗର ଉତ୍ତର ଘୁମୁସର ବନଖଣ୍ଡରେ ଘୁରି ବୁଲୁଥିବା ହାତୀପଲ ଏବେ ଜଳଭଣ୍ଡାର ମୁହାଁ ହୋଇଛନ୍ତି ।
ଗତ କିଛିଦିନ ହେଲା, ଉତ୍ତର ଘୁମୁସର ବନଖଣ୍ଡର ମୁଜାଗଡ ବନାଞ୍ଚଳରେ ସୃଷ୍ଟି ହୋଇଥିଲା ଏଭଳି ପରିସ୍ଥିତି । ଅସହ୍ୟ ଗ୍ରୀଷ୍ମପ୍ରବାହ ଯୋଗୁଁ ଅଧିକାଂଶ ଜଙ୍ଗଲି ଝରଣା ଓ ଜଳାଶୟ ସବୁ ସୁଖିଲା ପଡ଼ିଗଲା । ପାଣି ପାଇଁ ଛଟପଟ ହେଲେ ବନ୍ୟଜନ୍ତୁ । ଖରାତାତି ଅପେକ୍ଷା ଜଙ୍ଗଲି-ନିଆଁ ତାତି, ଅସହ୍ୟ ହୋଇ ପଡ଼ିଲା । ସବୁଠୁ ଅଧିକ ପ୍ରଭାବିତ ହେଲେ ହାତୀ । ୧୮ ଟି ହାତୀ ଦଳବାନ୍ଧି, ପାଣି ପିଇବାକୁ ଆଖପାଖ ଗାଁ ମାନଙ୍କରେ ଘୁରି ବୁଲିଲେ । ବୁଲିବା ଭିତରେ , ଗାଁ ପାଖ କ୍ଷେତ-ବାଡିରେ ପଶି, ଫସଲ ଖାଇଲେ । ଭୟଭୀତ ହୋଇପଡିଲେ ଅଞ୍ଚଳବାସୀ ।
ଏବେ ସ୍ୱଳ୍ପ ବୃଷ୍ଟିପାତରେ, କିଛି ଜଳାଶୟରେ ପାଣି ରହିଲା । ହାତୀଙ୍କ ପାଇଁ ସାମୟିକ ଭାବେ ଶୋଷ ମେଣ୍ଟାଇଲା । ହେଲେ ତାହା ଯଥେଷ୍ଟ ହେଉନି । ଆଗକୁ ପୁନର୍ବାର ଗ୍ରୀଷ୍ମ ପ୍ରବାହ ବଢିଲେ, ପୁଣି ସେଇ ପୁରୁଣା ଅବସ୍ଥା । ତଥାପି ବନବିଭାଗ ପକ୍ଷରୁ, ଏଭଳି ସମସ୍ୟା ପ୍ରତି ନଜର ରଖାଯାଇଥିବା ନେଇ କହିଛନ୍ତି, ବନାଞ୍ଚଳ ଅଧିକାରୀ । ଅତୀତ ଅପେକ୍ଷା ବର୍ତ୍ତମାନ ସମୟରେ ହାତୀଙ୍କ ପାଇଁ ଏଭଳି ଜଳ ସଙ୍କଟ ଅତି ଉତ୍କଟ ରୂପ ନେଇଛି । ଏବେ ଅପେକ୍ଷା, ହାତୀଙ୍କ ସୁରକ୍ଷା ପାଇଁ ବନବିଭାଗ, ଆଗକୁ କି ପଦକ୍ଷେପ ନେଉଛି ।
