ଆୟୁର୍ବେଦ ଅନୁସାରେ ନବଜାତକ ପାଇଁ ମାଲିସ ଖୁବ୍ ଗୁରୁତ୍ୱପୂର୍ଣ୍ଣ ହୋଇଥାଏ। ଶାରୀରିକ ତଥା ମାନସିକ ବିକାଶ ପାଇଁ ପିଲାଙ୍କ ମାଲିସ କରିବା ଉଚିତ। ମାଲିସ କରିବା ଦ୍ୱାରା ମାସଂପେଶୀ ମଜବୁତ ହେବା ସହ ଶରୀରରେ ରକ୍ତ ସଞ୍ଚାଳନ ତ୍ୱରାନ୍ଵିତ ହୋଇଥାଏ ଓ ଅନ୍ୟାନ୍ୟ ଋତୁକାଳୀନ ରୋଗରୁ ମୁକ୍ତି ମିଳିଥାଏ। ମସାଜ୍ କଲେ ପିଲାଙ୍କ ଥକାପଣ ଦୂର ହୁଏ, ଫଳରେ ସେମାନେ ଭଲରେ ଶୋଇପାରନ୍ତି। ଏହା ଦ୍ୱାରା ମା’ ସହ ଛୁଆର ସମ୍ପର୍କ ମଧ୍ୟ ଦୃଢ଼ ହୋଇଥାଏ।
ନବଜାତକର ମାଲିସ ପାଇଁ ତେଲ ଓ ଘିଅ ବ୍ୟବହାର କରିବା ଭଲ। ପିଲାଙ୍କ ମୁଣ୍ଡରେ ମାଲିସ କରିବା ପାଇଁ ଘିଅ ଓ ଶରୀରରେ ମାଲିସ ପାଇଁ ତେଲ ବ୍ୟବହାର କରିବା ଉତ୍ତମ ହୋଇଥାଏ। ଏଥିସହ ପିଲାଙ୍କ ମାଲିସ ପାଇଁ ବିଭିନ୍ନ ଆୟୁର୍ବେଦିକ ତେଲ ମଧ୍ୟ ବଜାରରେ ଉପଲବ୍ଧ ହେଉଛି। ଗୋଟିଏ ଦିନର ଛୁଆଠୁ ଆରମ୍ଭ କରି ୩ ବର୍ଷ ପର୍ଯ୍ୟନ୍ତ ପିଲାଙ୍କ ଶରୀରର ମାଲିସ ଜରୁରୀ। ଆପଣ ଚାହିଁଲେ ଆଗକୁ ମଧ୍ୟ ମାଲିସ ଜାରି ରଖିପାରିବେ।
ଆସନ୍ତୁ ଜାଣିବା ମାଲିସ କରିବା ବେଳେ କେଉଁ ସବୁ ବିଷୟ ପ୍ରତି ଧ୍ୟାନ ଦେବା ଜରୁରୀ:
- ଖାଲିପେଟରେ ଥିବା ବେଳେ ହିଁ ସବୁବେଳେ ପିଲାଙ୍କୁ ମାଲିସ କରନ୍ତୁ। ପେଟ ଭର୍ତ୍ତି ଥିବା ବେଳେ ମାଲିସ କଲେ ଆମଦୋଷ ଦେଖାଦେଇପାରେ।
- ମାଲିସ ବେଳେ ଓ ଏକ ଘଣ୍ଟା ପର ଯାଏଁ ପିଲାକୁ ଥଣ୍ଡା ପବନକୁ ଛାଡ଼ନ୍ତୁ ନାହିଁ।
- ମାଲିସରେ ସୁଗନ୍ଧିତ ତୈଳ ବ୍ୟବହାର କରନ୍ତୁ ନାହିଁ। ଖାଦ୍ୟଭାବେ ବ୍ୟବହାର କରାଯାଉଥିବା ତେଲ ଯଥା: ନଡ଼ିଆ, ଅଲିଭ ଅଏଲ, ରାଶି ତେଲ ଆଦିରେ ମାଲିସ କରନ୍ତୁ।
- ଆପଣ ଚାହିଁଲେ ସୋରିଷ ତେଲରେ ମଧ୍ୟ ଶିଶୁର ମାଲିସ କରିପାରିବେ। ମାତ୍ର ଏହା ଦ୍ୱାରା ପୋଡ଼ା ହୁଏ, ଏହାକୁ ଛାଡ଼ି ଅନ୍ୟ ତେଲ ବ୍ୟବହାର କରନ୍ତୁ।
- ଶିଶୁ ମୁଣ୍ଡରେ ସର୍ବଦା ଦେଶୀ ଘିଅ ମାଲିସ କରନ୍ତୁ।
- ଶିଶୁଠାରେ ଜ୍ୱର, ବାନ୍ତି, ଝାଡ଼ା କିମ୍ବା କିଛି ଶାରୀରିକ ସମସ୍ୟା ଦେଖାଦେଉଥିଲେ ମାଲିସ କରନ୍ତୁ ନାହିଁ।