କରୋନାର ମହାସଙ୍କଟ ସମୟରେ ମଧ୍ଯ ‘ମେଡ ଇନ୍ ଚାଇନା’ ଟେଷ୍ଟ କିଟ୍ ଦେଉଛି ଧୋକା, ଏବେ କାନ୍ଦୁଛି ସ୍ପେନ୍
ସାଧାରଣତଃ ଯେକୌଣସି ଜିନିଷ ମେଡ ଇନ୍ ଚାଇନା ଦେଖିବା ମାତ୍ରେ ଆମ ମନରେ ଏକ ପ୍ରଶ୍ନ ଉଠିଥାଏ ଏହାର ଗୁଣବତ୍ତାକୁ ନେଇ । କାରଣ ଅଧିକାଂଶ ସମୟରେ ଏହି ଜିନିଷ ଆମକୁ ଧୋକା ଦେଇ ଦେଇଥାଏ । ତେବେ ସାରା ବିଶ୍ୱରେ ଏଭଳି ସଂକଟ ସମୟରେ ମଧ୍ଯ ଚାଇନା ପ୍ରସ୍ତୁତ ଜିନିଷ ଧୋକା ଦେଇଛି । ସେ ପୁଣି ଆଉ କିଛି ନୂହେଁ ଯାହାକୁ ନେଇ ସାରା ବିଶ୍ୱରେ ଭୟ ସେହି ଜିନିଷ ‘କରୋନା କିଟ୍’ । କରୋନାର ମହାସଙ୍କଟ ମଧ୍ୟରେ ଏହାର ଏକ ତାଜା ଉଦାହରଣ ଦେଖିବାକୁ ମିଳିଛି ସ୍ପେନରେ । ସୂଚନା ଅନୁଯାୟୀ ସ୍ପେନରେ ତାଣ୍ଡବଲୀଳା ରଚୁଥିବା କରୋନାକୁ ଅତିଶୀଘ୍ର ଯାଞ୍ଚ କରିବା ପାଇଁ ଦେଶ ଚୀନଠାରୁ କିଣିଥବା ଯାଞ୍ଚ କିଟ୍ ପଜିଟିଭ ରୋଗୀଙ୍କୁ ଚିହ୍ନଟ କରିପାରୁନାହିଁ । ଯାହାଦ୍ୱାରା କରୋନା ସଂକଟରୁ ମୁକ୍ତି ପାଇବା ପାଇଁ ଭାବୁଥିବା ସ୍ପେନକୁ ବହୁତ୍ ବଡ ଝଟକା ଲାଗିଛି ।
ସୂଚନା ମୁତାବକ ୧୦ ରୁ ୧୫ ମିନିଟ୍ ମଧ୍ୟରେ ରୋଗୀ ଚିହ୍ନଟ କରୁଥିବା ଏହି ଚୀନି ଯାଞ୍ଚକିଟକୁ ନେଇ ସ୍ପେନର ମାଇକ୍ରୋବାୟୋଲୋଜି ବିଶେଷଜ୍ଞମାନେ ଚେତାବନୀ ଦେଇଛନ୍ତି । ତେବେ ଚୀନ ଯାଞ୍ଚ କିଟ୍ ସେହି ସମୟରେ ଧୋକା ଦେଇଛି ଯେତେବେଳେ ସାରା ବିଶ୍ୱରେ ୟୁରୋପିୟ ଦେଶ ଗୁଡିକ ସବୁଠାରୁ ଅଧିକ କରୋନା ଦ୍ଵାରା ପ୍ରଭାବିତ ହୋଇଛନ୍ତି । ଇଟାଲି ପରେ ସ୍ପେନରେ ସବୁଠାରୁ ଅଧିକ ଲୋକ କରୋନା ପାଇଁ ମୃତ୍ୟୁବରଣ କରିଛନ୍ତି । ତେବେ ଏହି ଯାଞ୍ଚ କିଟକୁ ଚୀନି କମ୍ପାନୀ ବାୟୋଇଜି ପ୍ରସ୍ତୁତ କରିଛି ବୋଲି ସୂଚନା ମିଳିଛି ଏବଂ ସ୍ପେନ୍, ଦକ୍ଷୀଣ କୋରିଆ ଓ ଚୀନ ଠାରୁ ୬,୪୦,୦୦୦ ଯାଞ୍ଚକିଟ କିଣିଛି ।
ଏହି ମହାସଙ୍କଟରୁ ମୁକ୍ତି ପାଇବା ପାଇଁ ସ୍ପେନ୍ ଚୀନରୁ ଅତିଶୀଘ୍ର ଯାଞ୍ଚ କରୁଥିବା କିଟ୍ ମଗାଇଥିଲା ଯାହାକି କେବଳ ୩୦ ଜଣ ରୋଗୀଙ୍କର ସଠିକ ଯାଞ୍ଚ କରିପାରୁଛି । ଯଦିଓ ଏହା ଅତିକମରେ ୮୦ ଜଣଙ୍କର ସଠିକ ଯାଞ୍ଚ କରିବା କଥା । ତେବେ ଚୀନି ଯାଞ୍ଚ କିଟର ଭୁଲ ରିପୋର୍ଟ ପରେ ସ୍ପେନ୍ ସ୍ଵାସ୍ଥ୍ଯ ବିଭାଗ ଏହାକୁ ବ୍ୟବହାର କରିବା ବନ୍ଦ କରିଦେଇଛି ।
କେବଳ ସେତିକି ନୂହେଁ ବର୍ତ୍ତମାନ ଚେକ୍ ରିପବ୍ଲିକ୍ ମଧ୍ଯ ଚୀନର ଏହି ଯାଞ୍ଚକିଟକୁ ବେକାର ବୋଲି କହିଛି । ଏହା ମଧ୍ୟରେ ସ୍ପେନ୍ ଚୀନକୁ ନିଜର ଯାଞ୍ଚ କିଟ୍ ଫେରାଇ ନେବାପାଇଁ କହିଛି କାରଣ ଚୀନର ଏହି ଧୋକା ପାଇଁ ଏବେ ସ୍ପେନ୍ ଏହି ସଙ୍କଟରୁ ମୁକ୍ତି ପାଇବା ବଦଳରେ ତାକୁ ଆଉ ଏକ ଶକ୍ତ ଝଟକା ଲାଗିଛି । ସୁଚନା ଅନୁଯାୟୀ ସ୍ପେନରେ ବର୍ତ୍ତମାନ୍ କରୋନା ଯୋଗୁଁ ୪୩୬୫ ଜଣ ଲୋକ ମୃତ୍ୟୁବରଣ କରିଥିବା ବେଳେ ୫୭,୭୮୬ ଲୋକ ଏଥିରେ ଆକ୍ରାନ୍ତ ହୋଇଛନ୍ତି ଏବଂ ଦିନକୁ ଦିନ ସ୍ପେନରେ କରୋନାର ପ୍ରଭାବ ବଢ଼ି ବଢ଼ି ଚାଲିଛି ।
