ଚାଲିଗଲେ ଚିତ୍ତ ଚୋରା ‘ଚିତ୍ତ ଜେନା’; ଆକୁଳେ ଝୁରଇ ଶ୍ରୋତା
ମିଠା ମିଠା ସୁଲଳିତ କଣ୍ଠସ୍ବର । ହୃଦୟରୁ ଗାଆନ୍ତି । ଅନେକ ବର୍ଷ ତଳୁ ଅବଶ୍ୟ ବ୍ୟାବସାୟିକ ସଂଗୀତ ଜଗତରୁ ଦୂରେଇ ଯାଇଥିଲେ । ସିଏ ହେଉଛନ୍ତି ନିଜ କଣ୍ଠସ୍ବରରେ ଚିତ୍ତ ଚୋରାଉଥିବା ଚିତ୍ତ ଜେନା । ଅକ୍ଷୟ ମହାନ୍ତି, ପ୍ରଫୁଲ୍ଲ କର, ପ୍ରଣବ ପଟ୍ଟନାୟକଙ୍କ ଭଳି ପ୍ରବୀଣ କଣ୍ଠଶିଳ୍ପୀଙ୍କ ଜମାନାରେ ଯୁବ ଗାୟକ ଭାବେ ସତୁରୀ ଦଶକରେ ପ୍ରବେଶ ହୋଇଥିଲା ଚିତ୍ତ ଜେନାଙ୍କର ।
‘ମନ ଆକାଶ’ ଚଳଚ୍ଚିତ୍ରରେ ପ୍ରଶାନ୍ତ ନନ୍ଦଙ୍କ କଣ୍ଠସ୍ବର ହୋଇ ସେ ଗାଇଥିଲେ ‘ଏ ବନ ଝରଣା ନାଚି ନାଚି ଯାଅନା..’ । ତା ପରେ ପାଲଟି ଯାଇଥିଲେ ପ୍ରଶାନ୍ତ ନନ୍ଦଙ୍କ ସବୁ ଦିନର କଣ୍ଠସ୍ବର । ଅନେକ ଫିଲ୍ମରେ ସେ ପ୍ରଶାନ୍ତଙ୍କ ପାଇଁ ଗାଇଛନ୍ତି । ଆଉ ଉଭୟଙ୍କ କଣ୍ଠ ସ୍ବର ଖୁବ୍ ମେଳଖାଏ । ତେଣୁ ଜଣାପଡ଼େ ଯେମିତି ପ୍ରଶାନ୍ତ ନନ୍ଦ ନିଜେ ଗୀତ ଗାଇଛନ୍ତି ବୋଲି ।
ପ୍ରଶାନ୍ତ ନନ୍ଦଙ୍କ ମମତା ଫିଲ୍ମରେ ତାଙ୍କୁ ସୁଯୋଗ ଦେଇଥିଲେ ପ୍ରଫୁଲ୍ଲ କର । ଆଉ ସେ ନିରାଶ କରି ନଥିଲେ । ଦେଖି ସେ ବଣମଲ୍ଲୀ ରାଧା ହେଲେ ବାତୁଳି.. ଗୀତଟି ଖୁବ୍ ସୁମଧୁର ଥିଲା । ସିନ୍ଦୂର ବିନ୍ଦୁରେ ‘ମୋ ପ୍ରିୟା ଠାରୁ କିଏ ଅଧିକ ସୁନ୍ଦର..’ ତାଙ୍କୁ ଆଣି ଦେଇଥିଲା ଖୁବ୍ ଲୋକପ୍ରିୟତା । ପୁଣି ଏହି ଫିଲ୍ମରେ ପଡ଼ିବନି ବନ୍ଧୁ ପଡ଼ିବନି ଥରେ… କବାଲିରେ ବି ସେ ନିଜ ଛାପ ଛାଡ଼ି ଯାଇଥିଲେ । ପୂଜା ଫିଲ୍ମର ଟାଇଟଲ୍ ଗୀତ ‘ପୂଜା କାହିଁ ପୂଜା..’ , ଗୌରୀ ଫିଲ୍ମରେ କି ସୁନ୍ଦର ଆହା କି ଆନନ୍ଦମୟ ଏହି ବିଶାଳ ସଂସାର…, ବନ୍ଧୁ ମହାନ୍ତିରେ କାହିଁଗଲେ ଶ୍ୟାମ ଘନ ଏ ଘନ କାଳରେ.. ଓ ନଯା ସଜନୀ ପାହିନି ରଜନୀ.., ପୂଜା ଫୁଲ ଫିଲ୍ମର ‘ରୂପ ହୋଇଥିବ ଲାବଣ୍ୟବତୀ, ଶେଷ ଶ୍ରାବଣର ସୁପରହିଟ୍ ‘ମାଣିକ ଆଲୋ ଆଲୋ ମାଣିକ…,
ସାକ୍ଷୀ ଗୋପୀନାଥର ‘ତୁମେ ମୋ ରାଧା…, ସତୀ ଅନସୂୟାରେ ‘ଜୟ ଜୟଦେବ ହରେ.., ଭଳି ଅନେକ ମଧୁର ଗୀତ ଚିତ୍ତ ଜେନାଙ୍କ କଣ୍ଠରୁ ଝରିଥିଲା । ଯାହା ଶ୍ରୋତା କେବେବି ଭୁଲି ପାରିବେ ନାହିଁ ।
ଅଣଫିଲ୍ମ ଗୀତ ଭିତରେ ‘ନଯାରେ ନଯା ଗୋରୀ ବାଲି ଯାତରା ଦେଖି…, ଏ ପରବତ କୁଞ୍ଚକୁଞ୍ଚିକା.., ଟୋପାଏ ଲୁହରେ ଭସାଇ ଦେବି ତୋ ଦେଉଳ…, ଉଡ଼ିଗଲେ ଗେଣ୍ଡାଳିଆ ଆଦି ବେଶ୍ ହିଟ୍ ହୋଇଥିଲା ।
ଜଣେ ଅତି ଭଦ୍ର ଓ ନମ୍ର ସ୍ବାଭାବର ବ୍ୟକ୍ତି ଥିଲେ । ସେଥିଲାଗି ସମସ୍ତେ ତାଙ୍କୁ ଭଲ ପାଉଥିଲେ । ସେ ପ୍ରଫୁଲ୍ଲ କରଙ୍କ ନିର୍ଦ୍ଦେଶନାରେ ସବୁଠାରୁ ଅଧିକ ଗୀତ ଗାଇଥିଲେ ମଧ୍ୟ ଅନ୍ୟ ସଂଗୀତ ନିର୍ଦ୍ଦେଶକଙ୍କ ନିର୍ଦ୍ଦେଶନାରେ ମଧ୍ୟ ଅନେକ ହିଟ୍ ଗୀତ ଦେଇଛନ୍ତି ।
ଚିତ୍ତ ଜେନାଙ୍କ ପାର୍ଥିବ ଶରୀର ସିନା ସବୁଦିନ ପାଇଁ ଏ ଦୁନିଆରୁ ହଜିଯିବ ହେଲେ ତାଙ୍କ କଣ୍ଠର ସେଇ ଅଭୁଲ ଗୀତ ସବୁ ଚିର ଅମର ହୋଇ ରହିଯିବ ।
ଏଇ ମହାନ୍ କଣ୍ଠଶିଳ୍ପୀଙ୍କୁ କେ ନ୍ୟୁଜ୍ ତରଫରୁ ଭକ୍ତିପୂତ ଶ୍ରଦ୍ଧାଞ୍ଜଳି ।
ହିମାଂଶୁ ପତିମିଶ୍ର
