କେନ୍ୟୁଜ୍(ବ୍ୟୁରୋ): ବଙ୍ଗୋପସାଗରରେ ଗଭୀର ଅବପାତ ବାତ୍ୟାରେ ପରିଣତ ହୋଇଛି। ଆଜି ସନ୍ଧ୍ୟା ସୁଦ୍ଧା ତୀବ୍ର ସାମୁଦ୍ରିକ ଝଡ଼ ରୂପ ନେବ । କାଲି ଆହୁରି ଘନୀଭୂତ ହୋଇ ଅତିପ୍ରବଳ ବାତ୍ୟା ହେବ ବୋଲି ଆ଼ଞ୍ଚଳିକ ପାଣିପାଗ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି। ପାରାଦୀପରେ ୟସ ପ୍ରଭାବରେ ବର୍ଷା ପବନ ଆରମ୍ଭ ହୋଇଗଲାଣି।
ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁରରେ ଅଧିକ ପ୍ରଭାବ ପଡିବ। ଏହି ୪ ଜିଲ୍ଲାକୁ କ୍ୟାଟାଗୋରି ୧ ଓ୍ଵାର୍ଣ୍ଣିଂ ଜାରି କରାଯାଇଛି। କଟକ, ଯାଜପୁର ଓ ମୟୂରଭଞ୍ଜ ମଧ୍ୟ ପ୍ରଭାବିତ ହେବ। ଏହି ୩ ଜିଲ୍ଲାକୁ କ୍ୟାଟାଗୋରି ୨ନଂ ଓ୍ଵାର୍ଣ୍ଣିଂ ଜାରି କରାଯାଇଛି। ଧାମରା ଓ ପାରାଦୀପ ବନ୍ଦରକୁ ୪ ନଂ ବିପଦ ସଂକେତ ଜାରି କରାଯାଇଛି। ଗୋପାଳପୁର ଓ ପୁରୀକୁ ୩ ନଂ ବିପଦ ସଂକେତ ଜାରି ହୋଇଛି।
୨୬ ତାରିଖ ଅପରାହ୍ଣରୁ ସନ୍ଧ୍ୟା ମଧ୍ୟରେ ଲ୍ୟାଣ୍ଡଫଲ କରିବ ବାତ୍ୟା ୟସ୍। ଲ୍ୟାଣ୍ଡଫଲର ପୂର୍ବରୁ ଓ ପର ୬ ଘଣ୍ଟା ଗୁରୁତ୍ୱପୂର୍ଣ୍ଣ। ୨୫ରେ ସ୍ୱଳ୍ପ ଓ ୨୬ରେ ବାତ୍ୟାର ପ୍ରଭାବ ଅଧିକ ରହିବ। ଟ୍ଵିନ୍ ସିଟିରେ ୬୦ରୁ ୭୦ କିମି ବେଗରେ ପବନ ବହିବ ବୋଲି ପାଣିପାଗ ବିଶେଷଜ୍ଞ ଉମାଶଙ୍କର ଦାଶ ସୂଚନା ଦେଇଛନ୍ତି। ଓମାନ ତରଫରୁ ବାତ୍ୟାର ନାମ ‘ୟସ୍’ ଦିଆଯାଇଛି।