ଜଣେ ଯୁବତୀଙ୍କ ପ୍ରେମରେ ପାଗଳ ଥିଲେ ୨ ଯୁବକ, ବିବାହ କରିବାକୁ ମନା କରିବାରୁ ମାରିଦେଲେ
ବ୍ରିଟେନରେ ପଢ଼ୁଥିବା ପାକିସ୍ତାନୀ ମହିଳାଙ୍କୁ ହତ୍ୟା କରାଯାଇଛି। ରିପୋର୍ଟ ମୁତାବକ, ଏହି ଯୁବତୀଙ୍କର ୨ ଜଣ ପ୍ରେମିକ ତାଙ୍କୁ ବିବାହ କରିବାକୁ ଚାହୁଁଥିଲେ। କିନ୍ତୁ ଯୁବତୀ କାହାକୁ ବି ବାହା ହେବାକୁ ଚାହୁଁନଥିଲେ। ୨୬ ବର୍ଷୀୟା ମାୟରା ଜୁଲଫିକାରଙ୍କ ମୃତଦେହ ତାଙ୍କ ଲାହୋରସ୍ଥିତ ଆପାର୍ଟମେଣ୍ଟରୁ ଉଦ୍ଧାର କରାଯାଇଛି।
ମାୟରା ବ୍ରିଟେନରେ ଆଇନ ପାଠ ପଢ଼ିଛନ୍ତି। ସେ ୨ ମାସ ପୂର୍ବରୁ ବ୍ରିଟେନରୁ ପାକିସ୍ତାନ ଆସିଥିଲେ। ସେ ଚାକିରି ବି କରୁଥିଲେ। ସେ ଲାହୋରରେ ଜଣେ ସାଙ୍ଗ ସହ ଆପାର୍ଟମେଣ୍ଟରେ ଭଡ଼ାରେ ରହୁଥିଲେ।
ମାୟରାଙ୍କ ଅଙ୍କଲ ମହମ୍ମଦ ନଜୀର ଏକ ମାମଲା ରୁଜୁ କରି ଜାହିର ଜଦୁନ ଓ ସାଦ ଅମୀର ବଟ ନାମକ ୨ ଜଣଙ୍କ ବିରୋଧରେ ହତ୍ୟା ଅଭିଯୋଗ କରିଛନ୍ତି। ନଜୀର କହିଛନ୍ତି ଏହି ଦୁଇ ଜଣ ଗତ କିଛିଦିନ ଧରି ମାୟରାଙ୍କୁ ହଇରାଣ କରୁଥିଲେ। ତେବେ ଏହା ଏକ ପ୍ରେମଜନିତ ମାମଲା ବୋଲି ପୋଲିସ କହିଛି। ପୋଲିସ ମାମଲା ରୁଜୁ କରି ତଦନ୍ତ ଚଳାଇଛି।
