ପାକିସ୍ତାନରେ ଭାରତର ଆଉ ଏକ ଶତ୍ରୁ ସଫା, ଲସ୍କର-ଇ-ତୋଇବା ମୁଖ୍ୟ ହଫିଜ ସଇଦର ନିକଟତମ ଫାରୁକକୁ ହତ୍ୟା
ଭାରତରେ ୨୬/୧୧ ଆକ୍ରମଣର ମାଷ୍ଟର ମାଇଣ୍ଡ ଓ ଭାରତର ମୋଷ୍ଟ ଓ୍ଵାଣ୍ଟେଡ ଲସ୍କର-ଇ-ତୋଇବା (ଏଲଇଟି) ଆତଙ୍କବାଦୀ ହଫିଜ ସଇଦର ଡାହାଣହାତ ବା ଅତିନିକଟତର ମୁଫତି କାଇସର ଫାରୁକକୁ ପାକିସ୍ତାନ କରାଚିରେ ହତ୍ୟା କରାଯାଇଛି । କେହି ଜଣେ ଅଜଣା ବ୍ୟକ୍ତି ତାକୁ ଗୁଳିକରି ହତ୍ୟା କରିଥିବା ନେଇ ଖବର ମିଳିଛି ।
ଇସଲାମବାଦ : ଭାରତରେ ୨୬/୧୧ ଆକ୍ରମଣର ମାଷ୍ଟର ମାଇଣ୍ଡ ଓ ଭାରତର ମୋଷ୍ଟ ଓ୍ଵାଣ୍ଟେଡ ଲସ୍କର-ଇ-ତୋଇବା (ଏଲଇଟି) ଆତଙ୍କବାଦୀ ହଫିଜ ସଇଦର ଡାହାଣହାତ ବା ଅତିନିକଟତର ମୁଫତି କାଇସର ଫାରୁକକୁ ପାକିସ୍ତାନ କରାଚିରେ ହତ୍ୟା କରାଯାଇଛି । କେହି ଜଣେ ଅଜଣା ବ୍ୟକ୍ତି ତାକୁ ଗୁଳିକରି ହତ୍ୟା କରିଥିବା ନେଇ ଖବର ମିଳିଛି ।
ଫାରୁକ ଆତଙ୍କୀ ସଂଗଠନ ଲସ୍କର ଇ ତୋଇବାର ସହ ସଂସ୍ଥାପକ ଥିଲା । ଏହି ଘଟଣା ପରେ ଆତଙ୍କୀ ସଂଗଠନ ମଧ୍ୟରେ ଆତଙ୍କ ଖେଳିଯାଇଛି । ତେବେ ଏହି ହତ୍ୟା ପାଇଁ କୌଣସି ସଂଗଠନ ନିଜକୁ ଦାୟୀ କରିନାହିଁ । ଏହି ହତ୍ୟାକାଣ୍ଡର ସିସିଟିଭି ଫୁଟେଜ ସୋସିଆଲ ମିଡିଆରେ ଦେଖିବାକୁ ମିଳିଛି ।
ଫାରୁକ କିିଛି ବ୍ୟକ୍ତିଙ୍କ ସହ ଖୋଲାଖୋଲି ଭାବେ ବୁଲୁଥିବା ବେଳେ ଗୁଳି ହୋଇଥିଲା । ଅନ୍ୟମାନେ ଦୌଡି ପଳାଇ ଯାଉଥିବା ବେଳେ ଫାରୁକ ଟଳିପଡିଥିବା ଭିଡିଓରେ ଦେଖାଯାଇଛି । ଏହାସହ ଲସ୍କର ଇ ତୋଇବା ମୁଖ୍ୟ ହଫିଜ ସଇଦର ପୁଅକୁ ମଧ୍ୟ କେହି ଅପହରଣ କରିଥିବା ଖବର ମିଳିଛି । ପାକିସ୍ତାନ ଗୁଇନ୍ଦା ସଂସ୍ଥା ଆଇଏସଆଇ ତାକୁ ଖୋଜିବାରେ ଲାଗିପଡିଛି ।
ଏହାପୂର୍ବରୁ ଏଲଇଟି ମୁଖ୍ୟ ହଫିଜ ସଇଦ ଘର ଉପରେ ମଧ୍ୟ ୨୦୨୧ରେ ବୋମା ମାଡ ହୋଇଥିଲା । ଯେତେବେଳେ କି ହାଫିଜ ଘରେ ଥିବା ଜଣାଯାଇଥିଲା । ଶୁଣାଯାଉଛି ହାଫିଜ ସଇଦ ଉପରେ ମଧ୍ୟ ଆକ୍ରମଣ ହେବାର ସମ୍ଭାବନା ରହିଛି ।
The "unknown men" in action pic.twitter.com/924EdYVPRw
— Megh Updates 🚨™ (@MeghUpdates) September 30, 2023
ପ୍ରକାଶଯୋଗ୍ୟ, ଆତଙ୍କବାଦୀଙ୍କ ଚରାଭୁଇଁ ପାଲଟିଥିବା ପାକିସ୍ତାନରେ ଆତଙ୍କୀଙ୍କୁ ସୁରକ୍ଷା ଦିଆଯାଉଥିବା ବେଳେ ହାଫିଜର ଡାହାଣ ହାତ ଫାରୁକକୁ କିଏ ହତ୍ୟା କଲା ତାହା ଏବେ ବଡ଼ ପ୍ରଶ୍ନ ହୋଇଛି । ଭାରତର ଶତ୍ରୁକୁ ପାକିସ୍ତାନରେ କିଏ ହତ୍ୟା କରୁଛି ତାହା ଏବେ ଚର୍ଚ୍ଚାର ବିଷୟ ପାଲଟିଛି ।
