ପାକିସ୍ତାନ ଜାତୀୟ ଦିବସରେ ଇମ୍ରାନ୍ଙ୍କୁ ମୋଦିଙ୍କ ଶୁଭେଚ୍ଛା ବାର୍ତ୍ତା, ଟ୍ଵିଟର୍ରେ କଣ ଜବାବ ଦେଲେ ଇମ୍ରାନ୍ ଜାଣନ୍ତୁ
ନୂଆଦିଲ୍ଲୀ : ଆଜି ହେଉଛି ପକିସ୍ତାନର ଜାତୀୟ ଦିବସ । ଏହି ଅବସରରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାକିସ୍ତାନବାସୀ ଏବଂ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କୁ ଶୁଭେଚ୍ଛା ଜଣାଇ ବାର୍ତ୍ତା ପଠାଇଛନ୍ତି । ଜବାବରେ ପାକ୍ ପ୍ରଧାନମନ୍ତ୍ରୀ ମଧ୍ୟ ଟ୍ଵିଟ୍ କରିଛନ୍ତି । ତେବେ ମୋଦି ବାର୍ତ୍ତା ପଠାଇଥିବା କଥା ଇମ୍ରାନ୍ଙ୍କ ଟ୍ଵିଟର୍ରୁ ହିଁ ଜଣାପଡ଼ିଛି ।
Received msg from PM Modi: “I extend my greetings & best wishes to the people of Pakistan on the National Day of Pakistan. It is time that ppl of Sub-continent work together for a democratic, peaceful, progressive & prosperous region, in an atmosphere free of terror and violence”
— Imran Khan (@ImranKhanPTI) March 22, 2019
ଇମ୍ରାନ୍ ତାଙ୍କ ଟ୍ଵିଟ୍ରେ ଲେଖିଛନ୍ତି ଯେ ପ୍ରଧାନମନ୍ତ୍ରୀ ମୋଦି ତାଙ୍କ ବାର୍ତ୍ତାରେ ପାକିସ୍ତାନବାସୀଙ୍କୁ ଜାତୀୟ ଦିବସ ଅବସରରେ ଶୁଭକାମନା ଜଣାଇବା ସହ କହିଛନ୍ତି ଯେ ଏବେ ସମୟ ଆସିଛି ଗଣତାନ୍ତ୍ରିକ ପଦ୍ଧତିରେ, ଶାନ୍ତିପୂର୍ଣ୍ଣ ଭାବେ ଉପମହାଦେଶର ଲୋକମାନେ ଏକାଠି ହୋଇ ବିକାଶ ଓ ସମୃଦ୍ଧି ପାଇଁ କାମ କରିବା ଉଚିତ । ଏମିତି ଏକ ପରିବେଶ ସୃଷ୍ଟି ହେବା ଦରକାର ଯାହା ଆତଙ୍କବାଦ ଓ ହିଂସା ଠାରୁ ମୁକ୍ତ ଥିବ ।
I welcome PM Modi’s message to our people. As we celebrate Pakistan Day I believe it is time to begin a comprehensive dialogue with India to address & resolve all issues, esp the central issue of Kashmir, & forge a new relationship based on peace & prosperity for all our people.
— Imran Khan (@ImranKhanPTI) March 22, 2019
ଏହାର ଉତ୍ତରରେ ଇମ୍ରାନ୍ ନିଜ ଟ୍ଵିଟ୍ରେ କହିଛନ୍ତି, ବର୍ତ୍ତମାନ ସବୁ ସମସ୍ୟାର ସମାଧାନ ପାଇଁ ଉଭୟ ଭାରତ ଓ ପାକିସ୍ତାନ ବ୍ୟାପକ ଭାବେ ଦ୍ୱିପାକ୍ଷିକ ଆଲାଚନା କରିବା ଦରକାର । ଦୁଇ ଦେଶ ଶାନ୍ତି ଓ ସମୃଦ୍ଧି ଦିଗରେ ଆଗେଇବା ପାଇଁ ଏବେ ନୂଆ କରି ସମ୍ପର୍କ ଗଢ଼ିିବା ଉଚିତ ।
ଲାହୋର ପ୍ରସ୍ତାବର ପୂର୍ତ୍ତି ପାଳନ ପାଇଁ ପ୍ରତି ବର୍ଷ ମାର୍ଚ୍ଚ ୨୩ ତାରିଖକୁ ପାକିସ୍ତାନରେ ଜାତୀୟ ଦିବସ ଭାବେ ପାଳନ କରାଯାଏ । ତେବେ ଭାରତରେ ଅବସ୍ଥାପିତ ପାକିସ୍ତାନ ରାଷ୍ଟ୍ରଦୂତ ଗତକାଲି ଏହି କାର୍ଯ୍ୟକ୍ରମକୁ ଦିଲ୍ଲୀରେ ପାଳନ କରିଥିଲେ । ଭାରତ ପକ୍ଷରୁ ଏହି କାର୍ଯ୍ୟକ୍ରମକୁ କୌଣସି ପ୍ରତିନିଧିଙ୍କୁ ପଠାଯାଇ ନଥିଲା । କାରଣ ଏଥିରେ ହୁରିୟତ ନେତାଙ୍କୁ ମଧ୍ୟ ଆମନ୍ତ୍ରିତ କରାଯାଇଥିଲା । ଅବଶ୍ୟ ପ୍ରାୟ ସବୁ ବିଚ୍ଛିନ୍ନତାବାଦୀ ନେତା ଗିରଫ ହୋଇ ଜେଲ୍ରେ ଥିବାରୁ କେହି ମଧ୍ୟ ଏଥିରେ ଯୋଗ ଦେଇ ନଥିଲେ ।
ଏମିତିକି କିଛି ଭାରତୀୟ ଅଧିକାରୀ ପାକ୍ ହାଇକମିଶନ୍ କାର୍ଯ୍ୟାଳୟ ବାହାରେ ଠିଆ ହୋଇ ଭାରତୀୟ ଅତିଥିମାନଙ୍କୁ କାର୍ଯ୍ୟକ୍ରମରେ ଯୋଗ ନଦେବାକୁ କହୁଥିବା ଦେଖା ଯାଇଥିଲା ।
ସେପଟେ ମୋଦିଙ୍କ ବାର୍ତ୍ତାକୁ ନେଇ ଆରମ୍ଭ ହୋଇଯାଇଛି ସମାଲୋଚନା । ବିରୋଧୀ କଂଗ୍ରେସ ଓ ନେସନାଲ କନଫରେନ୍ସ ନେତାମାନେ ମୋଦିଙ୍କ ଏଭଳି ବାର୍ତ୍ତାକୁ ନାପସନ୍ଦ କରିଛନ୍ତି ।