ଆଇନ୍ର ଜାଲ ଭିତରେ ଛନ୍ଦି ହୋଇଯାଇଛି ନିର୍ଭୟା ମାମଲା । ୨୨ ତାରିଖରେ ଚାରି ଦୋଷୀଙ୍କୁ ଫାଶୀ ହେବ ନାହିଁ ବୋଲି ନିଶ୍ଚିତ ହୋଇ ସାରିଛି । ଏହାକୁ ନେଇ ସାରା ଦେଶରେ ଚର୍ଚ୍ଚା ଓ ଆଲୋଚନା । ସେପଟେ ସବୁଠୁ ବେଶି ଭାଙ୍ଗି ପଡ଼ିଛନ୍ତି ନିର୍ଭୟାଙ୍କ ପରିବାର ଲୋକେ । କାରଣ ସେମାନେ ଅପେକ୍ଷା କରିଛନ୍ତି ଦୀର୍ଘ ୭ ବର୍ଷ । ନ୍ୟାୟ ପାଇବାର ମୁହୂର୍ତ୍ତ ସ୍ଥିର ପରେ ଏହା ପୁଣି ବିଳମ୍ବିତ ହେବାକୁ ଯାଉଛି । ଯେମିତି ଲକ୍ଷ୍ୟର ପାଖାପାଖି ପହଞ୍ଚି ମଣିଷ ଝୁଣ୍ଟି ପଡ଼ିଲେ ଯେଭଳି ଅନୁଭବ କରେ ଠିକ୍ ସେମିତି ଅନୁଭବ କରୁଛନ୍ତି ନିର୍ଭୟାଙ୍କ ମା ବାପା ଓ ସମର୍ଥକମାନେ ।
ଏପଟେ ଆମ ଆଇନ୍ ବ୍ୟବସ୍ଥାରେ ଥିବା ଫାଙ୍କ ବା ଦୁର୍ବଳତାକୁ ନେଇ ମଧ୍ୟ ପ୍ରଶ୍ନ ଉଠିଛି । ବାହାରେ ଚର୍ଚ୍ଚା ଯେତିକି ତାଠାରୁ ଅଧିକ ଚର୍ଚ୍ଚା ସୋସିଆଲ ମିଡିଆରେ ହେଉଛି । ସମସ୍ତେ ଏଭଳି ସ୍ଥିତିକୁ ସମାଲୋଚନା କରୁଛନ୍ତି । କାରଣ ପୂର୍ବରୁ ଯେଉଁ କଥା ରହିଛି ‘ବିଳମ୍ବିତ ନ୍ୟାୟ, ନ୍ୟାୟ ନୁହେଁ’ ଠିକ୍ ସେହି କଥା ଘଟିବାକୁ ଯାଛି ବୋଲି ଅନେକ କହୁଛନ୍ତି । ଏମିତିକି ଆଉ କିଛି ଲୋକ ଏଭଳି ଆଶଙ୍କା କରୁଛନ୍ତି ଯେ ହୁଏତ ଦୋଷୀମାନଙ୍କୁ ଆଉ ଫାଶୀ ନହୋଇ ଆଜୀବନ କାରାଦଣ୍ଡ ହେବ ।
ଅନେକ ଲୋକଙ୍କର ମତ ହେଉଛି ଏଭଳି ନ୍ୟାୟକୁ ଜଗିବା ଅପେକ୍ଷା ହାଇଦ୍ରାବାଦ ଘଟଣା ଭଳି ନିର୍ଭୟା ଦୋଷୀଙ୍କୁ ମଧ୍ୟ ସିଧା ଏନ୍କାଉଣ୍ଟର କରିଦେବା ଦରକାର । ଆଉ କିଛି ଆମ ନ୍ୟାୟ ବ୍ୟବସ୍ଥାର ସମାଲୋଚନା କରୁଛନ୍ତି । ପୁଣି କିଛି ଏହା ଭିତରେ କୌଣସି ରାଜନୀତି ଅଛି ବୋଲି କହୁଛନ୍ତି । ତେବେ ଯେତେବେଳେ ଆମେ ଏକ ସାମ୍ବିଧାନିକ ବ୍ୟବସ୍ଥାରେ ରହିଛୁ ଅପେକ୍ଷା କରିବାକୁ ହେବ କଣ ହେଉଛି ଆଗକୁ ।
ଆଜି କଣ କହିଲେ କୋର୍ଟ
ଦୋଷୀ ମୁକେଶର କ୍ୟୁରେଟିଭ୍ ପିଟିସନ୍ ଦିଲ୍ଲୀ ହାଇକୋର୍ଟରେ ଖାରଜ ହେବା ପରେ ସେ ପଟିଆଲା ହାଉସ୍ କୋର୍ଟରେ ଆବେଦନ କରିଛି । ଏଠାରେ ଶୁଣାଣି ବେଳେ ମୁକେଶର ଓକିଲ ଯୁକ୍ତି ଦର୍ଶାଇଥିଲେ ଯେ ଜେଲ୍ ମାନୁଆଲ ଅନୁସାରେ ତାକୁ ଜାନୁଆରୀ ୨୨ ତାରିଖରେ ଫାଶୀ ହୋଇ ପାରିବ ନାହିଁ । ଫଳରେ କୋର୍ଟ ଏବେ ତିହାର ଜେଲ୍ କର୍ତ୍ତୃପକ୍ଷଙ୍କୁ ଜେଲ୍ ମାନୁଆଲ୍ର ୮୪୦ ଓ ୮୬୩ ଧାରାର ସବିଶେଷ ରିପୋର୍ଟ ମାଗିଛନ୍ତି । ଆସନ୍ତାକାଲି ସୁଦ୍ଧା ଜେଲ୍ କର୍ତ୍ତୃପକ୍ଷ ତାଙ୍କ ରିପୋର୍ଟ ଦେବେ ବୋଲି ସୂଚନା ମିଳିଛି ।
ସେପଟେ ବିଜେପି ନେତା ତଥା କେନ୍ଦ୍ର ମନ୍ତ୍ରୀ ପ୍ରକାଶ ଜାଭଡ଼େକର ବଡ଼ ଅଭିଯୋଗ ଆଣିଛନ୍ତି ଦିଲ୍ଲୀର ଆପ୍ ସରକାର ବିରୋଧରେ । ସେ କହିଛନ୍ତି ଦିଲ୍ଲୀ ସରକାରର ଅବହେଳା ଯୋଗୁଁ ନିର୍ଭୟା ଦୋଷୀଙ୍କ ଫାଶୀର ଦିନ ଘୁଞ୍ଚିବା ସ୍ଥିତିରେ ପହଞ୍ଚିଛି ।
ଅନ୍ୟପଟେ ଏଭଳି ସୂଚନା ମଧ୍ୟ ମିଳିଛି ଯେ ତିହାର ଜେଲ୍ କର୍ତ୍ତୃପକ୍ଷଙ୍କ ଫାଶୀ ପାଇଁ ନୂଆ ତାରିଖ ନିର୍ଦ୍ଧାରଣ କରିବାକୁ ସରକାରଙ୍କୁ ଚିଠି ଲେଖିଛନ୍ତି ।