ହେମନ୍ତ ସୋରେନ୍ଙ୍କୁ ମିଳିବ ବି ଜାମିନ୍ ! ପୂର୍ବତନ ମୁଖ୍ୟମନ୍ତ୍ରୀଙ୍କ ଆବେଦନ ଉପରେ ସୁପ୍ରିମ୍କୋର୍ଟ EDକୁ ପଠାଇଲେ ନୋଟିସ୍
ଜମି ଦୁର୍ନୀତି ମାମଲାରେ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନ ଜେଲରେ ଅଛନ୍ତି । ତାଙ୍କୁ ଇଡି ଗିରଫ କରିଥିଲା । ଏବେ ସୋରେନ ନିଜ ଗିରଫଦାରୀ ବିରୋଧରେ ସୁପ୍ରିମକୋର୍ଟରେ ଆବେଦନ ଦାୟର କରିଛନ୍ତି ।
ଜମି ଦୁର୍ନୀତି ମାମଲାରେ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନ ଜେଲରେ ଅଛନ୍ତି । ତାଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗିରଫ କରିଥିଲା । ଏବେ ସୋରେନ ନିଜ ଗିରଫଦାରୀ ବିରୋଧରେ ସୁପ୍ରିମକୋର୍ଟରେ ଆବେଦନ ଦାୟର କରିଛନ୍ତି । ସେ ନିଜ ଆବେଦନରେ କହିଛନ୍ତି ଯେ ଗିରଫଦାରୀକୁ ଚ୍ୟାଲେଞ୍ଜ କରୁଥିବା ତାଙ୍କ ଆବେଦନ ଉପରେ ହାଇକୋର୍ଟ ନିଜର ରାୟ ଶୁଣାଉ ନାହାନ୍ତି ।
ବର୍ତ୍ତମାନ ସୁପ୍ରିମ୍କୋର୍ଟ ପୂର୍ବତନ ସିଏମ୍ଙ୍କ ଆବେଦନ ଉପରେ ଇଡିକୁ ନୋଟିସ ଜାରି କରିଛନ୍ତି । କୋର୍ଟରେ ଇଡିକୁ ଜବାବ ଦେବାକୁ ପଡ଼ିବ । ହେମନ୍ତ ସୋରେନ ନିଜ ଆବେଦନରେ ମଧ୍ୟବର୍ତ୍ତୀକାଳୀନ ଜାମିନ ମାଗିଛନ୍ତି । ଆସନ୍ତା ମେ’ ୬ରେ କୋର୍ଟ ଏହି ମାମଲାର ଶୁଣାଣି କରିବେ । ସୁପ୍ରିମକୋର୍ଟ ଏହା ମଧ୍ୟ କହିଛନ୍ତି ଯେ ଯଦି ହାଇକୋର୍ଟ ଚାହାନ୍ତି, ତେବେ ଏହା ମଧ୍ୟରେ ସୋରେନଙ୍କ ଆବେଦନ ଉପରେ ନିର୍ଦ୍ଦେଶ ଦେଇପାରିବେ, ଯେଉଁଥିରେ ସୋରେନ ଗିରଫଦାରୀକୁ ଚ୍ୟାଲେଞ୍ଜ କରିଛନ୍ତି ।
ଜଷ୍ଟିସ ସଞ୍ଜୀବ ଖାନ୍ନା ଏବଂ ଜଷ୍ଟିସ ଦୀପଙ୍କର ଦତ୍ତଙ୍କ ବେଞ୍ଚ ହେମନ୍ତ ସୋରେନଙ୍କ ଆବେଦନ ଉପରେ ଶୁଣାଣି କରୁଛି । ନିକଟରେ ସୋରେନଙ୍କ ତରଫରୁ ଓକିଲ କପିଲ ସିବଲ ସୁପ୍ରିମକୋର୍ଟରେ କହିଥିଲେ ଯେ ସୋରେନଙ୍କ ଜାମିନ ଉପରେ ହାଇକୋର୍ଟ ନିଷ୍ପତ୍ତି ସଂରକ୍ଷିତ ରଖିଛନ୍ତି, କିନ୍ତୁ ରାୟ ପ୍ରଦାନ କରୁନାହାନ୍ତି । ଏହି କାରଣରୁ ହେମନ୍ତ ସୋରେନ ନିର୍ବାଚନ ପ୍ରଚାରରେ ଭାଗ ନେଇପାରୁ ନାହାନ୍ତି ।
ଜମି ଦୁର୍ନୀତି ମାମଲାରେ ରାଞ୍ଚିର ସ୍ୱତନ୍ତ୍ର ପିଏମ୍ଏଲ୍ଏ କୋର୍ଟ ହେମନ୍ତ ସୋରେନଙ୍କୁ ମଧ୍ୟବର୍ତ୍ତୀକାଳୀନ ଜାମିନ ଦେବାକୁ ମନା କରି ଦେଇଥିଲେ । କହି ରଖୁଛୁ ଯେ ସୋରେନ ତାଙ୍କ ଦାଦାଙ୍କ ଅନ୍ତିମ ସଂସ୍କାରରେ ଯୋଗଦେବା ଲାଗି ପିଏମ୍ଏଲ୍ଏ କୋର୍ଟରୁ ୧୩ ଦିନ ପାଇଁ ମଧ୍ୟବର୍ତ୍ତୀକାଳୀନ ଜାମିନ ମାଗିଥିଲେ । ତାଙ୍କ ଦାଦା ଦୀର୍ଘ ଦିନରୁ ଅସୁସ୍ଥ ଥିଲେ । କିନ୍ତୁ ଏହି ମାମଲାର ଶୁଣାଣି ବେଳେ କୋର୍ଟ ତାଙ୍କୁ ଜାମିନ ଦେବାକୁ ମନା କରି ଦେଇଥିଲେ ।
