କଟକ ସହରର ପ୍ରଥମ ସ୍ମାର୍ଟ କଲୋନୀ ଭାବେ ନୂତନ ପରିଚୟ ପାଇବାକୁ ଯାଉଛି ‘ସୂର୍ଯ୍ୟବିହାର’
କଟକ ଲିଙ୍କ ରୋଡ଼ ଅଞ୍ଚଳରେ ଥିବା ସୂର୍ଯ୍ୟବିହାର। ଯାହା ଏବେ ଏକ ନୂତନ ପରିଚୟ ପାଇବାକୁ ଯାଉଛି କଟକ ସହରର ପ୍ରଥମ ସ୍ମାର୍ଟ କଲୋନୀ ଭାବରେ । ଅନ୍ୟ ଅଞ୍ଚଳଗୁଡିକ ପାଇଁ ଏବେ ସୂର୍ଯ୍ୟବିହାର ବାସିନ୍ଦା ପାଲଟିଛନ୍ତି ଏକ ଉଦାହରଣ ।
କଟକ(କେନ୍ୟୁଜ୍): ନା ରାସ୍ତାରେ କେଉଁଠି ପାନ କି ଗୁଟଖା ଛେପ ପଡିଛି, ନା କେଉଁଠାରୁ ଆସୁଛି ର୍ଦୁଗନ୍ଧ । କୌଣସି ସ୍ଥାନରେ ବି ଦିଶୁ ନାହିଁ ଜରି କାଗଜ କି ଅଳିଆ ଆବର୍ଜନା । ବାଲକୋନି ଉପରେ ଛିଡା ହୋଇ ରାସ୍ତା ଉପରକୁ ଅଳିଆ ଜରି ଫିଙ୍ଗିବା ଅଭ୍ୟାସ ଏଠି କାହାର ବି ନାହିଁ । ପ୍ରତି ଘରର ପାଚେରୀ ଝଲସୁଛି ସୁନ୍ଦର ପାରମ୍ପରିକ ଚିତ୍ରକଳା । ଆମେ କହୁଛୁ କଟକ ଲିଙ୍କ ରୋଡ଼ ଅଞ୍ଚଳରେ ଥିବା ସୂର୍ଯ୍ୟବିହାର ସାହିର କଥା । ଯାହା ଏବେ ଏକ ନୂତନ ପରିଚୟ ପାଇବାକୁ ଯାଉଛି କଟକ ସହରର ପ୍ରଥମ ସ୍ମାର୍ଟ କଲୋନୀ ଭାବରେ । ଅନ୍ୟ ଅଞ୍ଚଳଗୁଡିକ ପାଇଁ ଏବେ ସୂର୍ଯ୍ୟବିହାର ବାସିନ୍ଦା ପାଲଟିଛନ୍ତି ଏକ ଉଦାହରଣ ।
ଦେଖନ୍ତୁ କେମିତି ଏହି କଲୋନୀ ଭିତରକୁ ପଶୁ ପଶୁ ଲାଗୁଛି ଭିନ୍ନ । ଏଠାକୁ ଆସୁଥିବା ଜନସାଧାରଣ ଏକ ଅଲଗା ଅନୁଭବ ନେଇ ଫେରୁଛନ୍ତି । କଟକ ଲିଙ୍କ ରୋଡ଼ ଅଞ୍ଚଳରେ ଥିବା ସୂର୍ଯ୍ୟବିହାର ସାହିର ଏହି ଦୃଶ୍ୟ ଏବେ ସୃଷ୍ଟି କରିଛି ଏକ ସୁନ୍ଦର ଦୃଶ୍ୟପଟ । କଟକ ମହାନଗର ନିଗମର ୪୫ ନମ୍ବର ୱାର୍ଡ ଅନ୍ତର୍ଗତ ଏହି ଅଞ୍ଚଳଟିକୁ ନେଇ ଏବେ ସହରରେ ବେଶ ଚର୍ଚ୍ଚା । ପରିମଳ ଠାରୁ ଆରମ୍ଭ କରି ରାସ୍ତା ଘାଟ, ଅଲୋକୀକରଣ କ୍ଷେତ୍ରରେ ଅନ୍ୟାନ୍ୟ ସାହି ଠାରୁ ଅନେକ ପାଦ ଆଗକୁ ଚାଲି ଯାଇଛି ଏବେ ସୂର୍ଯ୍ୟବିହାର । ଯାହା ସମ୍ଭବ ହୋଇଛି ଏଠାରେ ବସବାସ କରୁଥିବା ୬୦ରୁ ଉର୍ଦ୍ଧ୍ଵ ପରିବାରର ଇଚ୍ଛା ଶକ୍ତି ଓ ଏକତା କାରଣରୁ । ତେବେ ସବୁଠୁ ଖୁସିର କଥା ଏହାକୁ ଏବେ ସହରବାସୀ ସ୍ମାର୍ଟ କଲୋନୀ ବୋଲି କହିଲେଣି ।
ଏହି ସ୍ମାର୍ଟ କଲୋନୀ ର୍ନିମାଣ ପାଇଁ ମୋଟ ଖର୍ଚ୍ଚ ହୋଇଛି ୫୦ ଲକ୍ଷରୁ ଉର୍ଦ୍ଧ୍ଵ ଟଙ୍କା । କିଛି ଆସିଛି ବିଧାୟକ ପାଣ୍ଠିରୁ ଓ କିଛି ଆସିଛି ମୁକ୍ତା ଯୋଜନାରୁ । କଲୋନୀ ପ୍ରବେଶ ପଥରେ କରାଯାଇଛି ଏକ ୱେଲକମ ଗେଟ । କଂକ୍ରିଟ ବ୍ଲକ ବିଛାଯାଇ ତିଆରି ହୋଇଛି ରାସ୍ତା । ହାଇ ମାସ୍କ ଲାଇଟ ସାଙ୍ଗକୁ ଏଲ.ଇ.ଡି ଲାଇଟ ଲଗାଯାଇଛି କଲୋନୀର ବିଭିନ୍ନ ସ୍ଥାନରେ । ନା କେହି ଏଠି ସେଠି ଅଳିଆ ପକାଉଛନ୍ତି ନା ଏଣେତେଣେ ଖାଦ୍ୟ ପଦାର୍ଥ ଫିଙ୍ଗୁଛନ୍ତି । ଯେଉଁ କାରଣରୁ ବୁଲା କୁକୁର ଦିଶୁ ନାହାନ୍ତି ଏହି ଅଂଚଳରେ । କେବଳ ପରିଷ୍କାର ପରିଚ୍ଛନ୍ନତା ନୁହେଁ, ସୁରକ୍ଷା ପ୍ରତି ମଧ୍ୟ ବେଶ ସଚେତନ ଅଞ୍ଚଳବାସୀ । ନିଜ ନିଜ ଘର ସାମ୍ନାରେ ଲଗାଇଛନ୍ତି ସିସି ଟିଭି କ୍ଯାମେରା । ପ୍ରାତଃ ଓ ସଂନ୍ଧ୍ୟା ଭ୍ରମଣ ପାଇଁ ଆଉ ବାହାରକୁ ଯିବାକୁ ପଡୁ ନାହିଁ ବୋଲି କୁହନ୍ତି ଅଞ୍ଚଳବାସୀ ।
ପରିବେଶ, ସାମାଜିକ ମନୋଭାବ, ପରିଷ୍କାର ପରିଚ୍ଛନ୍ନତା, ଆଦି ଦୃଷ୍ଟିରୁ ଦେଖିବାକୁ ଗଲେ ଏସବୁ ସମ୍ଭବ ହୋଇଛି କେବଳ ଇଚ୍ଛା ଶକ୍ତି ଓ ସକାରାତ୍ମକ ମାନସିକତା କାରଣରୁ । ଆଶା କରୁଛୁ ଏହି କଟକ ସହରର ଅନ୍ୟାନ୍ୟ ସାହିଗୁଡିକ ମଧ୍ୟ ସୂର୍ଯ୍ୟବିହାର ପରି ଆଗାମୀ ଦିନରେ ଚମକିବ।