ଅଦ୍ଭୁତ ମନ୍ଦିର: ଏଠାରେ ଦେବୀ ମାଙ୍କୁ ପ୍ରସାଦ ବଦଳରେ ଅର୍ପଣ କରାଯାଏ ପଥର
ଭାରତରେ ଏପରି ଅନେକ ମନ୍ଦିର ଅଛି ଯେଉଁଠାରେ ବିଭିନ୍ନ ପ୍ରକାରର ଦେବା ଦେବୀଙ୍କୁ ପୂଜା କରାଯାଏ । ଏପରିକି କିଛି ଅଦ୍ଭୁତ ଜିନିଷ ମଧ୍ୟ ପ୍ରସାଦରେ ଦେବତାମାନଙ୍କୁ ଅର୍ପଣ କରାଯାଏ । କୋଲକାତାରେ କାଳୀ ମାତାଙ୍କର ଏକ ମନ୍ଦିର ଅଛି, ଯେଉଁଠାରେ ଚାଇନିଜ୍ ନୁଡୁଲ୍ସ ଦେବୀଙ୍କୁ ଭୋଗ ଭାବରେ ଅର୍ପଣ କରାଯାଉଥିବାବେଳେ ତାମିଲନାଡୁର ଏକ ମନ୍ଦିରରେ ଦୋସା ଦେବତାଙ୍କୁ ଏବଂ କେରଳରେ ଏକ ମନ୍ଦିରରେ ଚକୋଲେଟକୁ ଭୋଗ କରାଯାଇ ବଣ୍ଟନ କରାଯାଏ । ଏପରି ଭାବରେ ବିଭିନ୍ନ ପ୍ରକାରର ଅଦ୍ଭୁତ ଘଟଣା ଦେଖିବାକୁ ମିଳେ । କିନ୍ତୁ କେଉଁଠି କ’ଣ ପଥରଗୁଡିକ ଭଗବାନଙ୍କୁ ନୈବେଦ୍ୟ ରୂପେ ଅର୍ପଣ କରାଯାଇ ପାରେ ଆପଣ କେବେ ଶୁଣିଛନ୍ତି ?
ଆଜି ଆମେ ଆପଣଙ୍କୁ ଏପରି ଏକ ମନ୍ଦିର ବିଷୟରେ କହିବାକୁ ଯାଉଛୁ, ଯେଉଁଠାରେ ଦେବୀ ମାଙ୍କୁ ପ୍ରସାଦ ରୂପରେ ଫଳ ବା ଅର୍ଣ୍ଣ ଭୋଗ ନୁହେଁ ବରଂ ପଥରକୁ ଭୋଗ ଭାବରେ ଅର୍ପଣ କରାଯାଇଥାଏ । ଶତାବ୍ଦୀ ଧରି ଏହି ଅନନ୍ୟ ପରମ୍ପରା ଏଠାରେ ପାଳନ କରାଯାଉଛି। ଏହି ମନ୍ଦିର ଛତିଶଗଡର ବିଲାସପୁର ସହର ନିକଟସ୍ଥ ଖାମତାରାଇରେ ଅଛି ।ଏହି ମନ୍ଦିରରେ ବନଦେବୀଙ୍କୁ ପୂଜା କରାଯାଏ। ଏଠାରେ ଥିବା ଲୋକମାନେ ବିଶ୍ବାସ କରନ୍ତି ଯେ ବନଦେବୀଙ୍କ ଦରବାରରେ ମାନସିକ ପୁରଣ ହେବା ପରେ ଦେବୀ ମାତାଙ୍କୁ ପାଞ୍ଚଟି ପଥର ଅର୍ପଣ କରାଯାଇଥାଏ ।
ଭକ୍ତମାନେ ଏହି ମନ୍ଦିରରେ ଫୁଲ କିମ୍ବା ପୂଜାର୍ଚ୍ଚନା ସାମଗ୍ରୀ ଆଣନ୍ତି ନାହିଁ, ବରଂ ପାଞ୍ଚଟି ପଥର ନେଇ ମାତା ଦେବୀଙ୍କ ନିକଟରେ ଅର୍ପଣ କରିଥାନ୍ତି । ବିଶ୍ୱାସ କରାଯାଏ ଯେ ବନଦେବୀଙ୍କ ମନ୍ଦିରରେ ସଫା ହୃଦୟରେ ପାଞ୍ଚଟି ପଥର ପ୍ରଦାନ କଲେ ଭକ୍ତଙ୍କ ଇଚ୍ଛା ପୁରଣ ହୋଇଥାଏ । ମନସ୍କାମନା ପୁରଣ ହେବା ପରେ ଭକ୍ତମାନେ ପୁଣି ଥରେ ମନ୍ଦିରରେ ପାଞ୍ଚଟି ପଥର ଅର୍ପଣ କରନ୍ତି । କୁହାଯାଏ ଏଠାରେ ଥିବା ମନ୍ଦିରରେ ଥିବା ବନ ଦେବୀଙ୍କୁ କୌଣସି ସାଧାରଣ ପଥର ଅର୍ପଣ କରାଯାଇ ପାରିବ ନାହିଁ, କେବଳ କ୍ଷେତରେ ମିଳୁଥିବା ଗୋଟା ପଥର ଅର୍ପଣ କରାଯାଇଥାଏ ।ପ୍ରତିଦିନ ଏଠାକୁ ଦୂରଦୂରାନ୍ତରୁ ଭକ୍ତ ମାନେ ବନ ଦେବୀଙ୍କ ଦର୍ଶନ ପାଇଁ ଆସିଥାନ୍ତି ।
