IPL 2021 ରେ ନଜର ଆସିପାରନ୍ତି ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ, ନିଲାମୀ ପାଇଁ ବେସ୍ ପ୍ରାଇସ ରଖିଛନ୍ତି ଏତିକି ଲକ୍ଷ
ଆଇପିଏଲ ପାଇଁ ଫେବ୍ରୁଆରୀ ୧୮ରୁ ଖେଳାଳିଙ୍କ ନିଲାମୀ ପ୍ରକ୍ରିୟା ଆରମ୍ଭ ହେବ । ଏଥିପାଇଁ ୧୦୯୭ ଜଣ ଖେଳାଳି ରେଜିଷ୍ଟ୍ରେସନ କରିସାରିଲେଣି। ଏମାନଙ୍କ ମଧ୍ୟରେ ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ ତେନ୍ଦୁଲକର ମଧ୍ୟ ସାମିଲ ରହିଛନ୍ତି । ବିସିସିଆଇର କହିବାନୁସାରେ ମୋଟ ୮୧୪ ଭାରତୀୟ ଓ ୨୮୩ ବିଦେଶୀ ଖେଳାଳି ନିଜର ନାଁ ଦେଇଛନ୍ତି ।
ଚଳିତ ଆଇପିଏଲରେ ଅର୍ଜୁନ ତେନ୍ଦୁଲକର ଖେଳୁଥିବା ନଜର ଆସିଲେ ଚକିତ କଲା ଭଳି କଥା ନୁହେଁ । ଖବର ମୁତାବକ, ଅଲରାଉଣ୍ଡର ଅର୍ଜୁନ ତେନ୍ଦୁଲକର ୧୮ ଫେବ୍ରୁଆରୀରେ ହେବାକୁ ଥିବା ନିଲାମୀ ପ୍ରକ୍ରିୟାରେ ନିଜର ରେଜିଷ୍ଟ୍ରସନ କରାଯାଇଛନ୍ତି। ସେ ନିଜର ବେସ୍ ପ୍ରାଇସ୍ ୨୦ ଲକ୍ଷ ଟଙ୍କା ରଖିଛନ୍ତି ।
ଅର୍ଜୁନ ଆଇପିଏଲରେ ଚାମ୍ପିଅନ ମୁମ୍ବାଇ ଇଣ୍ଡିଆନ୍ସର ନେଟ୍ ବୋଲର ରହି ଆସିଛନ୍ତି । ସେ ଚଳିତ ବର୍ଷ ସୟଦ ମୁସ୍ତାକ ଅଳ୍ଲୀ ଟ୍ରଫି ମଧ୍ୟ ଖେଳିଛନ୍ତି । ବାମହାତୀ ବୋଲର ଅର୍ଜୁନ ଏହି ଟୁର୍ଣ୍ଣାମେଣ୍ଟରେ ୩ ଓଭରରେ ୩୪ ରନ୍ ବ୍ୟୟ କରି ଗୋଟିଏ ଓ୍ୱିକେଟ୍ ନେଇଥିଲେ । ଏହି ନିଲାମ ଭାରତ-ଇଂଲଣ୍ଡ ଦ୍ୱିତୀୟ ଟେଷ୍ଟ ମଧ୍ୟରେ ହେବ । ଭାରତୀୟ ସମୟାନୁସାରେ ଦିନ ୩ଟାରେ ଏହା ଆରମ୍ଭ ହେବ । କିଙ୍ଗସ୍ ଏକାଦଶ ପଞ୍ଜାବ ସର୍ବାଧିକ ୫୩.୨୦ ଟଙ୍କା ଧରି ନିଲାମକୁ ଓହ୍ଲାଇବ । ସେହିପରି ଆରସିବି ୩୫.୯୦ କୋଟି, ରାଜସ୍ଥାନ ରୟାଲ୍ସ ୩୪.୮୫ କୋଟି, ସିଏସକେ ୨୨.୯୦ କୋଟି ଓ ମୁମ୍ବାଇ ୧୫.୩୫ କୋଟି ଏବଂ ଦିଲ୍ଲୀ ୧୨.୯ କୋଟି ଧରି ନିଲାମରେ ସାମିଲ ହେବ । ସେହିପରି କେକେଆର ଓ ଏସଆରଏଚ ୧୦.୭୫ କୋଟି ଟଙ୍କା ଧରି ନିଲାମ ପ୍ରକ୍ରିୟାରେ ସାମିଲେ ହେବେ ।
ସୂଚନାଯୋଗ୍ୟ, ଆଇପିଏଲ ୨୦୨୧ ଭାରତରେ ଆୟୋଜନ ହେବାର ସମ୍ଭାବନା ରହିଛି । କରୋନା ମହାମାରୀ ପାଇଁ ଗତ ସଂସ୍କରଣ ଦୁବାଇରେ ଆୟୋଜିତ ହୋଇଥିଲା ।
