ଖୋର୍ଦ୍ଧା: ପିକଅପ ଭ୍ୟାନ ଲୁଟ୍ ଘଟଣାର ପର୍ଦାଫାଶ୍ କଲା ଟାଙ୍ଗୀ ପୋଲିସ୍, ୩ ଲୁଟେରା ଗିରଫ
ଟାଙ୍ଗୀ(କେନ୍ୟୁଜ୍): ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ୧୬ ନଂ ଜାତୀୟ ରାଜପଥ ମା ଉଗ୍ରତାରା ଛକରୁ ଅଣ୍ଡା ବୋଝେଇ ପିକଅପ ଭ୍ୟାନ ଲୁଟ୍ ଘଟଣାର ପର୍ଦାଫାଶ୍ କଲା ଟାଙ୍ଗୀ ପୋଲିସ୍ । ଲୁଟ୍ ପିକଅପ ଭ୍ୟାନ ସହ ୩ ମୋବାଇଲ ,ନଗଦ ୧୨୦୦ ଟଙ୍କା , ଗୋଟିଏ ବାଇକ୍ ଜବତ କରିବା ସହ ୩ ଲୁଟେରାଙ୍କୁ ଗିରଫ କରିଛି ପୋଲିସ।
କୋରୋନା ମହାମାରୀକୁ ରୋକ୍ ଦେବା ପାଇଁ ପୋଲିସ ଚେକିଙ୍ଗ ବ୍ଲକିଙ୍ଗ ଓ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ କରିବାକୁ ଆପ୍ରାଣ ଉଦ୍ୟମ କରୁଛି । ଏହାର ସୁଯୋଗ ନେଇ ତାଲା ବନ୍ଦ ସମୟରେ ଅଧିକା ସକ୍ରିୟ ହୋଇଛନ୍ତି ରାଜପଥ ଲୁଟେରା । ଗତ ୩ ତାରିଖ ବିଳମ୍ବିତ ରାତିରେ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅଧୀନସ୍ଥ ୧୬ ନଂ ଜାତୀୟ ରାଜପଥ ଉଗ୍ରତାରା ଛକରେ ୩ଟି ବାଇକ୍ ରେ ଆସିଥିବା ୬ ଜଣ NH ଲୁଟେରା ଏକ ଅଣ୍ଡା ବୋଝେଇ ପିକ୍ ଅପ୍ ଭ୍ୟାନକୁ ଅଟକାଇଥିଲେ। ପିକଭ୍ୟାନ୍ ଡ୍ରାଇଭରକୁ ଭୟ ଦେଖାଇ ମାଡ଼ ମାରି ଭ୍ୟାନକୁ ଲୁଟି ନେଇଥିଲେ ।
ଲୁଟ୍ ହୋଇଥିବା ଗାଡି (ନଂOD01AC.1772) ଗଞ୍ଜାମ ଜିଲ୍ଲା ବ୍ରହ୍ମପୁର ନିକଟସ୍ଥ ଗୋଳନ୍ଥରାରୁ ଜଳେଶ୍ୱର ଅଣ୍ଡା ନେଇ ଯାଉଥିଲା । ଅଧାବାଟରେ ଅର୍ଥାତ ଖୋର୍ଦ୍ଧା ଜିଲ୍ଲା ଉଗ୍ରତାର ଛକରେ ଲୁଟେରା ମାନେ ଲୁଟ କରିଥିଲେ । ପିକଅପ୍ ଭ୍ୟାନକୁ ଲୁଟ ପରେ ଟାଙ୍ଗୀ ଥାନାରେ ଲିଖିତ ଅଭିଯୋଗ କରିଥିଲେ ଗାଡି ମାଲିକ ।
ରିପୋର୍ଟ ଆଧାରରେ ଜିଲ୍ଲା ଆରକ୍ଷୀ ଅଧିକାରୀଙ୍କ ନିର୍ଦ୍ଦେଶରେ ବାଲୁଗାଁ ଏସଡିପିଓ ମାନସ ରଞ୍ଜନ ବାରିକଙ୍କ ତତ୍ୱାବଧାନରେ ଟାଙ୍ଗୀ ଥାନା ଅଧିକାରୀ ବିଜୟ କୁମାର ମଲ୍ଲିକ, ଭୁଷଣ୍ଡପୁର ଫାଣ୍ଡି ଅଧିକାରୀ ବସ୍ତିଆ ଓ ଅନ୍ୟ ଅଧିକାରୀଙ୍କୁ ନେଇ ୩ଟି ସ୍ପସିଆଲ ସ୍କ୍ୱାର୍ଡ ଟିମ୍ ଗଠନ କରାଯାଇଥିଲା। ବିଭିନ୍ନ ସ୍ଥାନରେ ଚଢାଉ କରି ପିକଅପ ଭ୍ୟାନକୁ ଜବତ କରିବା ସହ ୩ ଆସମୀଙ୍କୁ ଗିରଫ କରାଯାଇଛି ।ସେମାନଙ୍କ ଠାରୁ ଗୋଟିଏ ବାଇକ୍ ,୩ଟି ମୋବାଇଲ ଫୋନ୍ ସହ ନଗଦ ୧୨୦୦ ଟଙ୍କା ଜବତ କରାଯାଇଛି । ଏନେଇ ଆଜି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବାଲୁଗାଁ ଏସଡିପିଓ ମାନସ ରଂଜନ ବାରିକ ।
