ସୋରଡ଼ା : କଥାରେ ଅଛି ରଖିବ ହରି ତ ମାରିବ କିଏ? ଏହି ଉକ୍ତିର ଆଜି ଯଥାର୍ଥ ମିଳିଯାଇଛି । ମରିଯାଇଥିବା ଭାବି ଯେଉଁ ବ୍ଯକ୍ତିଙ୍କୁ ବନ୍ଧୁ ପରିଜନ ମାନେ ଶ୍ମଶାନ ଘାଟକୁ ନେଇ ମୁଖାଗ୍ନି ଦେବାକୁ ପ୍ରସ୍ତୁତି କରୁଛନ୍ତି ସେହି ସମୟରେ ହଠାତ୍ ଉଠି ବସିପଡୁଛନ୍ତି ମୃତକ ଜଣଙ୍କ । ଏଭଳି ଏକ ଅବିଶ୍ୱସନୀୟ ଘଟଣା ଘଟିଛି ସୋରଡ଼ା ବ୍ଲକ ହରିପୁର ଗାଁରେ ।
ଗାଁର ସୀମାଞ୍ଜଳ ମଲ୍ଲିକ୍ ନାମକ ବ୍ୟକ୍ତି ଗତକାଲି ଛେଳି ଚରାଇବାକୁ ଯାଇଥିବା ବେଳେ ହଠାତ୍ ଅସୁସ୍ଥ ହୋଇପଡ଼ିଥିଲେ। ସଂଧ୍ୟା ହେବା ପରେ ଛେଳି ସବୁ ଘରକୁ ଫେରିଆସିଥିବା ବେଳେ ସୀମାଞ୍ଚଳ କିନ୍ତୁ ଫେରି ନଥିଲେ। ଆଜି ସକାଳେ ତାଙ୍କ ପରିବାର ଓ ଗ୍ରାମବାସୀ ଜଙ୍ଗଲକୁ ଯାଇ ତାଙ୍କୁ ଖୋଜାଖୋଜି କରିବା ପରେ ତାଙ୍କୁ ମୁର୍ମୁଷ ଅବସ୍ଥାରେ ତାଙ୍କୁ ପାଇଥିଲେ। ପରେ ତାଙ୍କୁ ଘରକୁ ଆଣିବା ପରେ ଗାଁ ବଇଦ ଓ କିଛି ଗ୍ରାମବାସୀଙ୍କୁ ଡାକିଥିଲେ । ଏହାପରେ ତାଙ୍କୁ ମୃତ ଘୋଷଣା କରାଯାଇଥିଲା।
ତାଙ୍କ ଅନ୍ତିମ ସଂସ୍କାର ପାଇଁ ସମସ୍ତ କ୍ରିୟା ସରିବା ପରେ ମଶାଣୀକୁ ନିଆଯାଇଥିଲା। ତେବେ ତାଙ୍କୁ ଚିତା ଉପରେ ରଖି ମୁଖାଗ୍ମି ଦେବା ବେଳକୁ ସେ ଉଠି ବସିପଡିଥିଲେ। ସୀମାଞ୍ଚଳଙ୍କୁ ସଙ୍ଗେ ସଙ୍ଗେ ସୋରଡ଼ା ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା ଓ ସେ ସୁସ୍ଥ ଥିବା ଡାକ୍ତର କହିଥିଲେ। ଏଭଳି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି।