ଘନୀଭୂତ ହେଉଛି ସିଭିୟର ସାଇକ୍ଲୋନିକ ଷ୍ଟର୍ମ ‘କ୍ୟାର୍’, ପ୍ରଭାବରେ ଓଡ଼ିଶାରେ ଆହୁରି ବର୍ଷା ସମ୍ଭାବନା
ନୂଆଦିଲ୍ଲୀ : ଆରବ ସାଗରରେ ସୃଷ୍ଟି ହୋଇଥିବା ଡିପ୍ ଡିପ୍ରେସନ୍ ସାମୁଦ୍ରିକ ଝଡ଼ର ରୂପ ନେଇ ସାରିଛି । ଏହି ବାତ୍ୟାର ନାମ ରହିଛି ‘କ୍ୟାର୍’ । ଯାହା ଆଗାମୀ ସମୟରେ ଅଧିକ ଘନୀଭୂତ ହୋଇ ‘ସିଭିୟରସାଇକ୍ଲୋନିକ ଷ୍ଟର୍ମ’ର ରୂପ ନେବ ବୋଲି କେନ୍ଦ୍ର ପାଣିପାଗ ବିଭାଗ ଆକଳନ କରିଛି । ୬ ଘଣ୍ଟା ତଳେ ଏହା ୫ କିଲୋମିଟର ବେଗରେ ଓମାନ୍ ଆଡ଼କୁ ମୁହାଇଁଛି । ସେତେବେଳେକୁ ଏହି ଝଡ଼ ମୁମ୍ବାଇଠାରୁ ୩୮୦ କିଲୋମିଟର ଦୂରରେ ଥିଲା । ଆଗାମୀ ୫ ଦିନ ଭିତରେ ଏହା ଉତ୍ତର-ପଶ୍ଚିମ ଦିଗକୁ ଗତି କରିବ ଏବଂ ଆସନ୍ତା ୧୨ ଘଣ୍ଟା ଭିତରେ ଏହା ସିଭିୟର ସାଇକ୍ଲୋନିକ ଷ୍ଟର୍ମରେ ପରିଣତ ହେବ । ଯାହାର ପ୍ରଭାବରେ ପ୍ରବଳ ବର୍ଷା ଓ ଘଣ୍ଟାକୁ ୬୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି ।
ଦକ୍ଷିଣ କର୍ଣ୍ଣାଟକ ଅଞ୍ଚଳରେ ଏବେ ପ୍ରବଳ ବର୍ଷା ଜାରି ରହିଛି । ତେଣୁ ପ୍ରଶାସନ ପକ୍ଷରୁ ରେଡ୍ ଆଲର୍ଟ ଜାରି କରାଯାଇଛି । ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ନଯିବାକୁ ପରାମର୍ଶ ଦିଆଯାଇଥିବା ବେଳେ ପ୍ରବଳ ବର୍ଷାକୁ ଦୃଷ୍ଟିରେ ରଖି ଆଜି ଶିକ୍ଷାନୁଷ୍ଠାନ ସବୁକୁ ଛୁଟି ଘୋଷଣା କରାଯାଇଛି । ସେପଟେ ଗୋଆରେ ମଧ୍ୟ ଲୋକଙ୍କୁ ସତର୍କ କରି ଦିଆଯାଇଛି । ପର୍ଯ୍ୟଟକଙ୍କୁ ସମୁଦ୍ର କୂଳକୁ ନଯିବା ଲାଗି କୁହାଯାଇଛି ।
ଓଡ଼ିଶାରେ ପ୍ରବଳ ବର୍ଷିବ
‘କ୍ୟାର୍’ ସାମୁଦ୍ରିକ ଝଡ଼ର ପ୍ରଭାବ ଯଦିଓ ଓଡ଼ିଶା ଉପରେ ପଡ଼ିବ ନାହିଁ ତେବେ ଏହା ଯୋଗୁଁ ଓଡ଼ିଶା ସମେତ ଆସାମ ଓ ମେଘାଳୟରେ ବର୍ଷା ହେବ । ଆସନ୍ତା ୨୪ ଘଣ୍ଟା ମଧ୍ୟରେ ଓଡ଼ିଶାର କିଛି ସ୍ଥାନରେ ମଧ୍ୟମ ଓ ଅଳ୍ପ କିଛି ସ୍ଥାନରେ ଘଡ଼ଘଡ଼ି ସହ ପ୍ରବଳ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ସେହିପରି ଆସନ୍ତା ୨୪ ଘଣ୍ଟା ମଧ୍ୟରେ ଦକ୍ଷିଣ ମହାରାଷ୍ଟ୍ର, କୋଙ୍କଣ, ଗୋଆ ଓ କର୍ଣ୍ଣାଟକର ଉପକୂଳବର୍ତ୍ତୀ ଅଞ୍ଚଳରେ ମଧ୍ୟ ପ୍ରବଳ ବର୍ଷା ହେବ ।
ବୁଧବାର ଠାରୁ ରାଜ୍ୟର ଅନେକ ସ୍ଥାନରେ ଲଗାଣ ବର୍ଷା ହୋଇଥିଲା । ଯାହାଫଳରେ ରାଜଧାନୀ ଭୁବନେଶ୍ୱର, କଟକ ସମେତ ଅନେକ ଜାଗାରେ ପାଣି ଭରି ଯାଇଥିଲା । ବିଶେଷ କରି ଗଞ୍ଜାମ ଓ ଗଜପତି ଜିଲ୍ଲାରେ ଲୋକେ ନାହିଁ ନଥିବା ହଇରାଣ ହୋଇଥିବା ବେଳେ ଘରେ ପାଣି ପଶିବା, ଘର ଭୁଶୁଡ଼ି ପଡ଼ିବା ଏବଂ ରାସ୍ତା ଧୋଇଯିବା ଭଳି ଘଟଣା ଘଟିଛି । ତେବେ ରାଜଧାନୀରେ ସକାଳୁ ପାଗ ମେଘୁଆ ଥିଲେ ମଧ୍ୟ ବର୍ଷା ହୋଇନାହିଁ ।
