୨ ବର୍ଷ ହେବ ପୋଲିସକୁ ଚକ୍ମା ଦେଇ ବାହାରେ ବୁଲୁଥିଲା ଅଭିଯୁକ୍ତ, ବାହା ହେବାକୁ ଯାଉଥିବା ବେଳେ ଅଧାରାସ୍ତାରୁ ଉଠାଇ ନେଲା ପୋଲିସ
ଆଠଗଡ(କେନ୍ୟୁଜ୍): ବାହା ହେବାକୁ ଯାଉଥିବା ବରକୁ ଅଧାରାସ୍ତାରୁ ଉଠାଇ ନେଲା ପୋଲିସ । ଆଗଠଡ଼ ଥାନା ସାପୁଆ ବ୍ରିଜ୍ ନିକଟରୁ ଏକ ବୋଲେରୋରେ ସାଧା ପୋଷାକରେ ଆସି ବରକୁ ଉଠାଇ ନେଇଛି ପୋଲିସ । ବର ପ୍ରକାଶ ୨୦୧୮ ମସିହାରେ କଦଳୀବାଡି ହତ୍ୟାକାଣ୍ଡରେ ସଂପୃକ୍ତ ଥିଲା । ୨୦୧୮ରେ ଏକ ହତ୍ୟାମାମଲାରେ ମୁଖ୍ୟ ଅଭିଯୁକ୍ତ ଥିଲା ପ୍ରକାଶ । ଦୁଇ ବର୍ଷ ହେବ ସେ ପୋଲିସକୁ ଚକ୍ମା ଦେଇ ବାହାରେ ବୁଲୁଥିଲା । ଆଜି ବିବାହ କରିବାକୁ ଯାଉଥିବା ଖବର ପାଇ ପୋଲିସ ସାଧା ପୋଷାକରେ ଆସି ତାକୁ ଗିରଫ କରିଥିଲା । ସେପଟେ ବୀର କିଶୋରପୁର ଶିବ ମନ୍ଦିରରେ ବାହାଘର ପାଇଁ ଝିଅ ଘର ପକ୍ଷରୁ ସରିଥିଲା ସମସ୍ତ ପ୍ରସ୍ତୁତି । ଖୁବ୍ ଜୋରସୋର୍ରେ ଚାଲିଥିଲା ଭୋଜି ରୋଷେଇ । ହେଲେ ଅଧାରାସ୍ତାରୁ ବରକୁ ପୋଲିସ ଉଠାଇନେଇଥିବା ଜାଣିବା ପରେ ଝିଅ ଘର ଲୋକ ଏବେ ଚିନ୍ତାରେ ପଡ଼ିଛନ୍ତି ।
