ବଲିଉଡ ଅଭିନେତ୍ରୀମାନଙ୍କର ଚର୍ମ ଏବଂ ଫିଟନେସ ଦେଖି ସମସ୍ତେ ସେମାନଙ୍କଠାରୁ ପ୍ରେରଣା ନେବାକୁ ଚାହାଁନ୍ତି । କାରଣ ସେମାନେ ସବୁ ଦିନେ ନିଜର ଭଲ ଖାଦ୍ୟ ରୁଟିନ ଫଲୋ କରନ୍ତି । ଏମିତିକି ନିଜେ ବେଳେ ଦରକାର୍ ପଡ଼ିଲେ ରୋଷେଇ କରି ଖାଦ୍ୟ ଖାଆନ୍ତି। ତେବେ ଆଜି ମଧ୍ୟ ଆମେ ଆପଣଙ୍କୁ ଏମିତି ଏକ ରେସିପି ବିଷୟରେ କହିବୁ ଯାହା ଶରୀର ପାଇଁ ଭଲ ଓ ଏହାକୁ କରିବା ଖୁବ୍ ସହଜ। ଏହା ଆପଣଙ୍କୁ ରଖିବ ସୁପର ଫିଟ୍। ଯାହାକୁ ଅଭିନେତ୍ରୀ ଆଲିଆ ଭଟ୍ଟ ମଧ୍ୟ ସବୁଦିନେ ନିଜ ଡାଏଟରେ ଖାଇବାକୁ ପସନ୍ଦ କରନ୍ତି। ଆଲିଆ ବିଟ୍ରୁଟ ସାଲାଡକୁ ଭଲ ପାଆନ୍ତି। ଆପଣ ମଧ୍ୟ ଏହାକୁ ନିଜ ଡାଏଟରେ ଖାଇପରିବେ । ଏହି ସାଲାଡ ସ୍ୱାସ୍ଥ୍ୟ ପାଇଁ ଅତ୍ୟନ୍ତ ଲାଭଦାୟକ ଅଟେ। ତେବେ ଆସନ୍ତୁ ଜାଣିବା ଏହାକୁ ପ୍ରସ୍ତୁତ କରିବାର ବିଧି।
ବିଟ୍ ରୁଟ୍ ସାଲାଡ଼ ପାଇଁ ସାମଗ୍ରୀ:
![beetroot salad](https://knewsodisha.com/wp-content/uploads/2022/04/picture-credit-The-mordern-proper.jpg)
ବିଟ୍ ରୁଟ୍ ସାଲାଡ ତିଆରି କରିବା ପାଇଁ ଆପଣଙ୍କୁ ପ୍ରଥମେ ବିଟ୍, ଦହି, ଭୃସଙ୍ଗ ପତ୍ର, ସୋରିଷ, ଜିରା, ଗୋଲମରିଚ, ହେଙ୍ଗୁ, ଚାଟ ମସାଲା, ତେଲ ନେବାକୁ ପଡ଼ିବ।
ପ୍ରସ୍ତୁତ କରିବାର ପ୍ରଣାଳୀ:
ବିଟ୍ରୁଟ ସାଲାଡ ପ୍ରସ୍ତୁତ କରିବା ପାଇଁ ପ୍ରଥମେ ବିଟ୍ରୁଟକୁ ଭଲ ଭାବରେ ଧୋଇ ଦିଅନ୍ତୁ। ତା’ପରେ ଏହାକୁ ସାଲାଡ଼ ସ୍ଲାଇଡରେ କାଟି କିଛି ସମୟ ପାଇଁ ଗରମ ପାଣିରେ ଫୁଟାନ୍ତୁ। ଏହାପରେ ଏକ ପାତ୍ରରେ ଏହାକୁ କାଢି ଦିଅନ୍ତୁ ଓ ଅଳ୍ପ ଥଣ୍ଡା ହେବା ପରେ ଏଥିରେ ନିଜ ପସନ୍ଦ ଅନୁଯାୟୀ ଦହି ଭଲ ଭାବେ ମିଶାନ୍ତୁ। ତା’ପରେ ଏଥିରେ ଗୋଲମରିଚ ଗୁଣ୍ଡ, ଲଙ୍କା ଗୁଣ୍ଡ, ଚାଟ ମସଲା ଏବଂ ଧନିଆ ପତ୍ର ମିଶାନ୍ତୁ। ଏହା ପରେ ଛୁଙ୍କ ପ୍ରସ୍ତୁତ କରନ୍ତୁ। ଚାମଚରେ ଘିଅ କିମ୍ବା ତେଲ ଗରମ କରି ଏଥିରେ ସୋରିଷ, ଜିରା ଓ ଭୃସଙ୍ଗ ପତ୍ର ଭଲ ଭାବେ ଫୁଟାଇ ଛୁଙ୍କ କରିବା ପରେ ଗୋଳା ଯାଇଥିବା ସାଲାଡରେ ଏହାକୁ ମିଶାନ୍ତୁ। ଧନିଆ ଚଟଣୀ ସହିତ ଏହାକୁ ଗରମ ଗରମ ପରସନ୍ତୁ।
ଏହି ବିଟ୍ ସାଲାଡ଼ର ଅନେକ ଫାଇଦା ରହିଛି। ଏଥିରେ ଆଇରନ, ପୋଟାସିୟମ୍, ଫସଫରସ୍ ଭରପୂର ପରିମାଣରେ ରହିଛି। ଯାହା କାରଣରୁ ଏହା ଶରୀରକୁ ସୁସ୍ଥ ରଖିବାରେ ସାହାଯ୍ୟ କରେ। ଏହାକୁ ଖାସ କରି ଆପଣ ଶୀତ ଦିନେ ଖାଇପରିବେ କିନ୍ତୁ ଆପଣ ସବୁଦିନେ ମଧ୍ୟ ଏହାକୁ ନିଜ ଖାଦ୍ୟରେ ମିଶାଇ ଖାଇବା ସ୍ବାସ୍ଥ୍ୟ ପାଇଁ ଲାଭଦାୟକ।