ଆର୍ଥିକ ବର୍ଷର ପ୍ରଥମ ଦିନରେ ରେକର୍ଡ ସ୍ତର ଛୁଇଁଲା ସେନସେକ୍ସ
ମୁମ୍ବାଇ : ନୂଆ ଆର୍ଥିକ ବର୍ଷର ଆଜି ପ୍ରଥମ ଦିନଟି ସେୟାର ବଜାର ପାଇଁ ବେଶ୍ ଶୁଭ ଫଳ ଦେଇଛି । ପ୍ରଥମଥର ଲାଗି ଆଜି ସେନସେକ୍ସ ୩୯,୦୦୦ ପଏଣ୍ଟ ଅତିକ୍ରମ କରି ରେକର୍ଡ କରିଛି। ଆରମ୍ଭରୁ ସେନସେକ୍ସ ଓ ନିଫଟି ଉଭୟ ଭଲ କାରବାର କରିଥିଲେ । ସକାଳ ପ୍ରାୟ ସାଢ଼େ ୧୦ଟା ବେଳକୁ ସେନସେକ୍ସ ୩୯,୦୦୦ ପଏଣ୍ଟ ଟପି ଯାଇଥିଲା । ଅବଶ୍ୟ ପରେ ପୁଣି ଖସି ଆସି ୩୮୮୭୧ ପଏଣ୍ଟରେ ପହଞ୍ଚିଛି । ସେହିପରି ନିଫଟି ୧୧,୫୦୦ ପଏଣ୍ଟରୁ ଆରମ୍ଭ ହୋଇ ୧୧୬୬୯ରେ ପହଞ୍ଚିଛି ।
ଗତବର୍ଷ ଅଗଷ୍ଟ ମାସରେ ସେନସେକ୍ସ ୩୮, ୯୮୯ ପଏଣ୍ଟ୍ ଛୁଇଁ ରେକର୍ଡ କରିଥିଲା। ଆଜି ସେନ୍ସେକ୍ସ ଚାର୍ଟରେ ବେଦାନ୍ତ, ଟାଟା ଷ୍ଟିଲ୍, ଟାଟା ମୋଟର୍ସ, ମହିନ୍ଦ୍ରା ଆଣ୍ଡ୍ ମହିନ୍ଦ୍ରା ଏବଂ ଆଇସିଆଇସିଆଇ ବ୍ୟାଙ୍କ୍ ଏଥିରେ ଅଗ୍ରଣୀ ଭୂମିକା ନେଇଛନ୍ତି।
