ପ୍ରତ୍ୟୁଷାଙ୍କ ମୃତ୍ୟୁ ପରେ ଦୁର୍ଦ୍ଦଶାରେ ତାଙ୍କ ପରିବାର, ଅଭାବରେ କଟୁଛି ଦିନ
ଟିଭି ଷ୍ଟାର ପ୍ରତ୍ୟୁଷା ବାନାର୍ଜୀ ଏବେ ଜୀବିତ ନଥିଲେ ସୁଦ୍ଧା କୌଣସି ନା କୌଣସି କାରଣକୁ ନେଇ ତାଙ୍କ ନାଁ ଅନେକ ସମୟରେ ଚର୍ଚ୍ଚାର ପରିସରକୁ ଆସିଥାଏ । ଏଇ ନିକଟରେ ଫିଲ୍ମ ପ୍ରଡ୍ୟୁସର ବିକାଶ ଗୁପ୍ତାଙ୍କ ଏକ ଖୁଲାସା ପରେ ପୁଣି ଥରେ ପ୍ରତ୍ୟୁଷାଙ୍କ ନାଁ ସାମ୍ନାକୁ ଆସିଥିଲା । ବିକାଶ ଦାବି କରିଥିଲେକି ସେ ପ୍ରତ୍ୟୁଷାଙ୍କ ସହ ସମ୍ପର୍କରେ ଥିଲେ । ଏଇ ନିକଟରେ ପୁଣିଥରେ ଦିବଂଗତ ଅଭିନେତ୍ରୀଙ୍କ ନାଁ ଚର୍ଚ୍ଚାର ପରିସରକୁ ଆସିଛି । ପ୍ରତ୍ୟୁଷାଙ୍କ ମୃତ୍ୟୁ ପରେ ତାଙ୍କ ପରିବାରର ଆର୍ଥିକ ସ୍ଥିତି ବିଗିଡି ଯାଇଛି । ପ୍ରତ୍ୟୁଷାଙ୍କ ପରିବାରକୁ ଏବେ ଅନେକ ବିପର୍ଯ୍ୟୟ ସ୍ଥିତିର ସାମ୍ନା କରିବାକୁ ପଡୁଛି ।
ମିଡ଼ିଆକୁ ସାକ୍ଷାତ୍କାର ଦେବା ସମୟରେ ପ୍ରତ୍ୟୁଷାଙ୍କ ପିତା ଶଙ୍କର ବାନାର୍ଜୀ କହିଛନ୍ତିକି, ଝିଅର ମୃତ୍ୟୁ ପରେ ଆମ ପରିବାରକୁ ଘୋର ସଙ୍କଟ ମାଡି ଆସିଛି । ଯେମିତି ସବୁ କିଛି ସରିଯାଇଛି । ଝିଅର କେଶ ଲଢୁ ଲଢୁ ସେ ସବୁକିଛି ହରାଇ ବସିଛନ୍ତି ବୋଲି କହିଛନ୍ତି । ଆଉ ଟଙ୍କା ଅଭାବରୁ ତାଙ୍କୁ ଅନେକ ଧାର କରଜ ବି କରିବାକୁ ପଡିଛି । ସେମାନଙ୍କ ପାଖରେ ଏବେ ଗୋଟିଏ ବି ଟଙ୍କା ନାହିଁ । ଏମିତି ପରିସ୍ଥିତି ହୋଇଛିକି ସେମାନଙ୍କୁ ଏବେ ମାତ୍ର ଗୋଟିଏ ବଖରା ଥିବା ଘରେ ରହିବାକୁ ପଡୁଛି । ଶଙ୍କର ଏହା ମଧ୍ୟ କହିଛନ୍ତିକି, ତାଙ୍କ ଝିଅ ହିଁ ତାଙ୍କ ସ୍ଥିତିକୁ ସୁଧାରି ପାରିଥିଲେ । ତାଙ୍କ ଝିଅ ହିଁ ସେମାନଙ୍କର ଏକମାତ୍ର ସାହାରା ଥିଲା ।
ଗୁଜୁରାଣ ମେଂଟେଇବା ପାଇଁ ପ୍ରତ୍ୟୁଷାଙ୍କ ମାଁ ଏକ ଚାଇଲ୍ଡ କେୟାର ସେଣ୍ଟରରେ କାମ କରୁଥିଲା ବେଳେ ତାଙ୍କ ବାପା କାହାଣୀ ଲେଖୁଛନ୍ତି । କହିରଖିବା ଉଚିତ ହେବକି, ୨୦୧୬ ମସିହା ଏପ୍ରିଲ ୧ ତାରିଖରେ ପ୍ରତ୍ୟୁଷାଙ୍କ ମୃତ୍ୟୁଖବର ସାମ୍ନାକୁ ଆସିଥିଲା । ମୁମ୍ବାଇସ୍ଥିତ ଆପାର୍ଟମେଣ୍ଟରୁ ତାଙ୍କ ମୃତଦେହ ଠାବ ହୋଇଥିଲା । ପରେ ପ୍ରତ୍ୟୁଷା ଆତ୍ମହତ୍ୟା କରିଥିବା ଜଣାପଡିଥିଲା । ଏନେଇ ପ୍ରତ୍ୟୁଷାଙ୍କ ପିତାମାତା ପ୍ରତ୍ୟୁଷାଙ୍କ ବୟଫ୍ରେଣ୍ଡଙ୍କ ନାଁରେ ଆରୋପ ଆଣିଥିଲେ ।
