ପଶୁଙ୍କ ମଧ୍ୟରେ ବ୍ୟାପୁଛି କରୋନା ଭାଇରସ! ହାଇଦ୍ରାବାଦ ଚିଡିଆଖାନାରେ ୮ ସିଂହଙ୍କଠାରେ ଦେଖାଗଲା ଲକ୍ଷଣ
ସାରା ଦେଶ ଏବେ କରୋନା କବଳରେ। ଏହାରି ଭିତରେ ଖବର ଆସିଛି କି, କରୋନାର ଲକ୍ଷଣ ଜୀବଜନ୍ତୁଙ୍କ ଠାରେ ବି ଦେଖିବାକୁ ମିଳୁଛି। ହାଇଦ୍ରାବାଦର ନେହେରୁ ଜୁଲୋଜିକାଲ ପାର୍କରେ ୮ ଏସୀୟ ସିଂହଙ୍କ ଠାରେ କରୋନା ଲକ୍ଷଣ ଦେଖାଯାଇଛି।
କୁହାଯାଉଛି, ୨୯ ଏପ୍ରିଲରେ ସେଣ୍ଟର ଫର ସେଲ୍ୟୁଲର ଆଣ୍ଡ ମଲେକ୍ୟୁଲର ବାୟୋଲୋଜି(CCMB) ନେହେରୁ ଜୁଲୋଜିକାଲ ପାର୍କର ଅଧିକାରୀମାନଙ୍କୁ କହିଥିଲା ଯେ ଆରଟି-ପିସିଆର ଟେଷ୍ଟରେ ୮ ସିଂହ ପଜିଟିଭ ମିଳିଛନ୍ତି। ଯଦିଓ ଏ ନେଇ ଅଫିସିଆଲି ଭାବେ କୌଣସି ସ୍ପଷ୍ଟ ହୋଇନାହିଁ।
ନେହେରୁ ଜୁଲୋଜିକାଲ ପାର୍କର ଡାକ୍ତର କହିଛନ୍ତି, ଏହା ସତ ଯେ ସିଂହଙ୍କ ଠାରେ କରୋନା ଲକ୍ଷଣ ଦେଖାଯାଇଛି। କିନ୍ତୁ ଆମକୁ ଏବେ ସିଂହମାନଙ୍କର ଆରଟି-ପିସିଆର ରିପୋର୍ଟ CCMBରୁ ମିଳିବାର ବାକି ଅଛି। ରିପୋର୍ଟ ମିଳିବା ପରେ ହିଁ ଏ ନେଇ ଜଣାଇ ଦିଆଯିବ।
ତେବେ ସିଂହଙ୍କ ଠାରେ ଯେବେ କରୋନା ଭଳି ଲକ୍ଷଣ, ଯେପରି ଭୋକ କମ ହେବା, ନାକରୁ ପାଣି ବାହାରିବା, କାଶ ଆଦି ଦେଖା ଦେଲା, ସେହି ସମୟରେ ସେମାନଙ୍କର ଟେଷ୍ଟ କରାଯିବାକୁ ନିଷ୍ପତ୍ତି ନିଆଯାଇଥିଲା।