ନୂଆ କୁସ୍ତି ସଂଘର ମାନ୍ୟତା ରଦ୍ଦ କଲା କ୍ରୀଡ଼ା ମନ୍ତ୍ରଣାଳୟ, WFIର ନବନିଯୁକ୍ତ ଅଧ୍ୟକ୍ଷ ସଞ୍ଜୟ ସିଂ ମଧ୍ୟ ସସ୍ପେଣ୍ଡ
ନିଲମ୍ବନ ହେଲା ଭାରତୀୟ କୁସ୍ତି ମହାସଂଘ। କୁସ୍ତି ମହାସଂଘର ନବ ନିର୍ବାଚିତ କାର୍ଯ୍ୟକାରିଣୀଙ୍କୁ ନିଲମ୍ବିତ କରିଛି କ୍ରୀଡା ମନ୍ତ୍ରଣାଳୟ। ବ୍ରିଜ ଭୂଷଣ ଶରଣ ସିଂଙ୍କୁ ନେଇ ଚାଲିଥିବା ବିବାଦ ମଧ୍ୟରେ ଭାରତ ସରକାରଙ୍କ କ୍ରୀଡ଼ା ମନ୍ତ୍ରଣାଳୟ ଏହି ବଡ଼ ନିଷ୍ପତ୍ତି ନେଇଛି।
ନିଲମ୍ବନ ହେଲା ଭାରତୀୟ କୁସ୍ତି ମହାସଂଘ। କୁସ୍ତି ମହାସଂଘର ନବ ନିର୍ବାଚିତ କାର୍ଯ୍ୟକାରିଣୀଙ୍କୁ ନିଲମ୍ବିତ କରିଛି କ୍ରୀଡା ମନ୍ତ୍ରଣାଳୟ। ବ୍ରିଜ ଭୂଷଣ ଶରଣ ସିଂଙ୍କୁ ନେଇ ଚାଲିଥିବା ବିବାଦ ମଧ୍ୟରେ ଭାରତ ସରକାରଙ୍କ କ୍ରୀଡ଼ା ମନ୍ତ୍ରଣାଳୟ ଏହି ବଡ଼ ନିଷ୍ପତ୍ତି ନେଇଛି। WFIର ନୂତନ ସଂସ୍ଥାକୁ ସରକାର ସ୍ଥଗିତ ରଖିଛନ୍ତି। ଭାରତୀୟ ରେସଲିଂ ଆସୋସିଏସନର ନୂତନ ଅଧ୍ୟକ୍ଷ ସଞ୍ଜୟ ସିଂଙ୍କ ପଦକୁ ରଦ୍ଦ କରାଯିବା ସହ ତାଙ୍କର ପୂରା ଦଳକୁ ନିଲମ୍ବିତ କରାଯାଇଛି।
ଅଲିମ୍ପିକ୍ ପଦକ ବିଜେତା ସାକ୍ଷୀ ମଲ୍ଲିକ ରେସଲିଂରୁ ସନ୍ନ୍ୟାସ ନେବା ପରେ ବଜରଙ୍ଗ ପୁନିଆ ନିଜ ପଦ୍ମଶ୍ରୀ ପୁରସ୍କାର ଫେରାଇଥିଲେ। ଏହା ସହିତ କ୍ରୀଡ଼ା ମନ୍ତ୍ରଣାଳୟ ରେସଲିଂ ଆସୋସିଏସନର ଆଗାମୀ ସମସ୍ତ କାର୍ଯ୍ୟକ୍ରମକୁ ମଧ୍ୟ ବାତିଲ କରିଦେଇଛି। ନିୟମ ଭାଙ୍ଗି ୧୫ ବର୍ଷରୁ କମ୍ ଏବଂ ୨୦ ବର୍ଷରୁ କମ୍ ଜାତୀୟ ପ୍ରତିଯୋଗିତା ଆୟୋଜନ ସମ୍ପର୍କରେ ନୂଆ ଅଧ୍ୟକ୍ଷ ଘୋଷଣା କରିବା ପରେ କ୍ରୀଡ଼ା ମନ୍ତ୍ରଣାଳୟ ଏଭଳି ପଦକ୍ଷେପ ନେଇଛି।
ବାସ୍ତବରେ, ଯେବେଠାରୁ ସଞ୍ଜୟ ସିଂ ଭାରତୀୟ କୁସ୍ତି ମହାସଂଘ ନିର୍ବାଚନରେ ଜିତିଥିଲେ ଏବଂ ସେ ଏହାର ଅଧ୍ୟକ୍ଷ ହେବେ ବୋଲି ନିଷ୍ପତ୍ତି ନିଆଯାଇଥିଲା, ସେବେଠାରୁ କୁସ୍ତିଯୋଦ୍ଧାମାନେ ଏଥିରେ ଆପତ୍ତି ଉଠାଇଥିଲେ। ସେମାନଙ୍କ କହିବା ହେଲା, ସଞ୍ଜୟ ସିଂ ପୂର୍ବତନ ଅଧ୍ୟକ୍ଷ ବ୍ରିଜ ଭୂଷଣ ଶରଣ ସିଂଙ୍କ ଘନିଷ୍ଠ। ତେଣୁ ଏମିତି ସ୍ଥିତିରେ ଡବ୍ଲୁଏଫଆଇରେ କୌଣସି ପ୍ରକାରର ଉନ୍ନତି ହେବାର ଆଶା ନାହିଁ।
କ୍ରୀଡା ମନ୍ତ୍ରଣାଳୟ ରବିବାର କୁସ୍ତି ସଂଘ ଏବଂ ଏହାର ନବନିଯୁକ୍ତ ଅଧ୍ୟକ୍ଷ ସଞ୍ଜୟ ସିଂଙ୍କୁ ନିଲମ୍ବିତ କରିଛି। ମନ୍ତ୍ରଣାଳୟ କହିଛି ଯେ WFI ବର୍ତ୍ତମାନର ନିୟମାବଳୀକୁ ଉପେକ୍ଷା କରିଛି। ସରକାରୀ ପ୍ରେସ୍ ବିଜ୍ଞପ୍ତିରେ କ୍ରୀଡ଼ା ମନ୍ତ୍ରଣାଳୟ କହିଛି ଯେ ଜାତୀୟ କୁସ୍ତି ପ୍ରତିଯୋଗିତାର ଆୟୋଜନ ନେଇ ଶୀଘ୍ର ଘୋଷଣା କରାଯାଇଛି ଏବଂ ନିୟମ ପାଳନ କରାଯାଇ ନାହିଁ। ଏହି ପ୍ରତିଯୋଗିତା ଉତ୍ତର ପ୍ରଦେଶର ଗୋଣ୍ଡାରେ ହେବାର ଥିଲା, ଯାହା କି, ବ୍ରିଜ ଭୂଷଣ ସିଂଙ୍କ ଅଞ୍ଚଳ।
