ଭଗବାନ ଗଣେଶଙ୍କୁ ବିଘ୍ନହର୍ତ୍ତା କୁହାଯାଏ। ସତ୍ ମନରେ ଭଗବାନ ଗଣେଶଙ୍କର ପୂଜା ଅର୍ଚ୍ଚନା କରିବା ଦ୍ବାରା ଜୀବନର ସବୁ ବିଘ୍ନ ଦୂର ହୋଇଯାଇଥାଏ। କୌଣସି ଶୁଭ କାର୍ଯ୍ୟରେ ସର୍ବପ୍ରଥମେ ଗଣେଶ ଭଗବାନଙ୍କ ପୂଜା କରାଯାଇଥାଏ । ମାନ୍ୟତା ରହିଛି କି ବିଘ୍ନହର୍ତା ହେବା ଯୋଗୁଁ ଗଣେଶଙ୍କ ପୂଜା ସର୍ବପ୍ରଥମେ କରିବା ଦ୍ୱାରା ସମସ୍ତ ବାଧା ବିଘ୍ନ ଦୂର ହୋଇଥାଏ । ପ୍ରତ୍ୟେକ ଶୁଭ କାମ ପୂର୍ବରୁ ବିଘ୍ନ ବିନାଶକ ଗଣେଶଙ୍କୁ ପୂଜା କରାଯାଏ। କୁହାଯାଏ, ପ୍ରଥମେ ଗଣପତିଙ୍କୁ ପୂଜା କଲେ ପୂଜାରେ କୌଣସି ସମସ୍ୟା ଆସେ ନାହିଁ। ଏଣୁ ଯେକୌଣସି ବିବାହ, ବ୍ରତ, ଘର ପ୍ରତିଷ୍ଠା ଆଦି ଶୁଭ କାମ ପୂର୍ବରୁ ପ୍ରଥମେ କଳସ ପ୍ରତିଷ୍ଠା କରାଯାଏ।
ଭଗବାନଙ୍କୁ ନେଇ ଏମିତି ଅନେକ କଥା ରହିଛି, ଯାହାକୁ ଜାଣିବା ପାଇଁ ଆମର ଇଚ୍ଛା ରହିଥାଏ। ହିନ୍ଦୁ ଧର୍ମରେ କିମ୍ବଦନ୍ତୀଙ୍କୁ ନେଇ ଲୋକଙ୍କ ମନରେ ରହିଛି ଅନେକ ପ୍ରଶ୍ନ। ଭାରତରେ ଏମିତି ଅନେକ ସ୍ଥାନ ରହିଛି ଯାହାକୁ ନେଇ ଅନେକ ରହସ୍ୟ ଲୁଚି ରହିଛି। ଯାହା ଲୋକଙ୍କ ଆସ୍ଥାର କେନ୍ଦ୍ର ପାଲଟିଛି।
ଆମ ଦେଶରେ ଗଣେଶଙ୍କର ବହୁତ ମନ୍ଦିର ରହିଛି। ଏମାନଙ୍କ ମଧ୍ୟରୁ ଗୋଟିଏ ଏମିତି ମନ୍ଦିର ରହିଛି ଯେଉଁଠି ଗଣପତି ‘ମଣିଷ ରୂପ’ରେ ପୂଜା ପାଉଛନ୍ତି। ରାଜସ୍ଥାନର ରାଜଧାନୀ ଜୟପୁରରେ ଗଣେଶଙ୍କର ଏହି ମନ୍ଦିର ରହିଛି। ଏହାକୁ ଗଡ ଗଣେଶ ମନ୍ଦିର ନାମରେ ଜଣାଯାଏ। ଏହି ମନ୍ଦିରରେ ଗଣେଶଙ୍କର ବିନା ଶୁଣ୍ଢର ପ୍ରତିମା ରହିଛି। ଶୁଣ୍ଢ ନଥିବା କାରଣରୁ ଏଠାରେ ଗଣେଶଙ୍କୁ ମଣିଷ ରୂପରେ ପୂଜା କରାଯାଉଛି। ମନ୍ଦିରରେ ବୁଧବାର ଦିନ ଭକ୍ତଙ୍କର ବହୁତ ଭିଡ ଲାଗିଥାଏ। କାରଣ ବୁଧବାରକୁ ଗଣପତିଙ୍କର ଦିନ ବୋଲି କୁହାଯାଏ। ଏଥିପାଇଁ ବୁଧବାର ଦିନ ବହୁତ ସଂଖ୍ୟାରେ ଲୋକମାନେ ଏଠାକୁ ଆସିଥାନ୍ତି।
ଏହି ଗଡ ଗଣେଶ ମନ୍ଦିର ଜୟପୁରର ଉତ୍ତର ଦିଗରେ ଥିବା ଅରାବଲୀର ଉଚ୍ଚତାରେ ଅବସ୍ଥିତ ଅଟେ। ମନ୍ଦିରକୁ ଯିବା ପାଇଁ ହେଲେ ୫୦୦ ମିଟରକୁ ଚଢ଼ିବାକୁ ପଡିଥାଏ। ମନ୍ଦି ଉପରକୁ ଗଲେ ପୂରା ଜୟପୁର ସହରର ସୌନ୍ଦର୍ୟ୍ୟ ଦେଖାଯାଏ। ଏଠାରେ ସହରର ଅଧିକାଂଶ ସ୍ଥାନ ଦେଖିବାକୁ ମିଳିଥାଏ। ଏହା ସହିତ ଆଖପାଖର ବାତାବରଣ ବହୁତ ଶାନ୍ତି ଲାଗିଥାଏ। ଗଡ ଗଣେଶ ମନ୍ଦିରରେ ଗଣପତିଙ୍କର ବାଳ ରୂପ ଦର୍ଶନ କରିବା ଦ୍ବାରା ମନକୁ ଶାନ୍ତି ଲାଗିଥାଏ। କୁହାଯାଏ ଭକ୍ତମାନେ ଏଠାରୁ ନିଜ ସହିତ ବହୁତ ସକାରାତ୍ମକ ଶକ୍ତି ନେଇ ଯାଇଥାନ୍ତି।
ଗଣେଶ ଚତୁର୍ଥୀର ଦ୍ବିତୀୟ ଦିନରେ ମନ୍ଦିର ପାଖରେ ମେଳାର ଆୟୋଜନ କରାଯାଇଥାଏ। ଏହି ମନ୍ଦରର ନିର୍ମାଣ ସୱାଇ ଜୟସିଂହ ଦ୍ବିତୀୟ କରିଥିଲେ। କୁହାଯାଏ ଯେ ଜୟସିଂହ ଜୟପୁରରେ ଅଶ୍ବମେଧ ଯଜ୍ଞର ଆୟୋଜନ କରିଥିଲେ। ସେହି ସମୟରେ ତାନ୍ତ୍ରିକ ବିଦ୍ଧି ଦ୍ବାରା ଏହି ମନ୍ଦିରର ସ୍ଥାପନା କରାଯାଇଥିଲା।