ହିନ୍ଦୁ ଧର୍ମରେ କୌଣସିବି ଶୁଭକାମ କରିବା ପୂର୍ବରୁ ମୁହୂର୍ତ୍ତ ଏବଂ କାଳ ବା ସମୟକୁ ବିଶେଷ ଭାବେ ଧ୍ୟାନ ଦିଆଯାଇଥାଏ । ଆସନ୍ତା ଜୁଲାଇ ୧୨ ତାରିଖ ପର ଠାରୁ ଆଗାମୀ ୪ ମାସ ପର୍ଯ୍ୟନ୍ତ କୌଣସି ପ୍ରକାର ଶୁଭକାର୍ଯ୍ୟ କରାଯାଇ ପାରିବ ନାହିଁ । ଜୁଲାଇ ୧୨ ତାରିଖରେ ପଡୁଛି ଦେବଶୟନୀ ଏକାଦଶୀ । ଏହି ଦିନଠାରୁ ୪ ମାସ ପର୍ଯ୍ୟନ୍ତ ଭଗବାନ ବିଷ୍ଣୁ କ୍ଷୀର ସାଗରରେ ଯୋଗନିଦ୍ରାକୁ ଚାଲିଯିବେ । ଭଗବାନଙ୍କର ଏହି ଚାରିମାସର ନିଦ୍ରାକୁ ଚତୁର୍ମାସ କୁହାଯାଇଥାଏ ଏବଂ ଚତୁର୍ମାସରେ କୌଣସି ବି ଶୁଭକାମ କରାଯାଇନଥାଏ । ଶାସ୍ତ୍ରରେ ଏହି ଚାରି ମାସରେ ଧର୍ମକର୍ମ, ପୂଜାପାଠ ଓ ଭଜନକୀର୍ତ୍ତନକୁ ବିଶେଷ ଭାବେ ମହତ୍ତ୍ୱ ଦିଆଯାଇଥାଏ ।
ଦେବଶୟନୀ ଏକାଦଶୀର ମହତ୍ତ୍ୱ
ଧାର୍ମିକ ଦୃଷ୍ଟିରୁ ଏହି ଚାରିମାସ ଭଗବାନଙ୍କ ନିଦ୍ରାକାଳ ବୋଲି ମାନ୍ୟତା ରହିଛି । ଚିକିତ୍ସା ବିଜ୍ଞାନ ଅନୁସାରେ ଏହି ସମୟରେ ସୂର୍ଯ୍ୟ ଓ ଚନ୍ଦ୍ରଙ୍କ କିରଣ ପୃଥିବୀ ଉପରେ କମ ପଡିଥାଏ । ଜଳର ମାତ୍ରା ଅଧିକ ହୋଇଯାଏ । ଏହି ସମୟରେ ଅନେକ କୀଟ ପତଙ୍ଗ ଜନ୍ମ ହୋଇଥାନ୍ତି । ଆଉ ସେମାନେ ବିଭିନ୍ନ ରୋଗର କାରଣ ହୋଇଥାନ୍ତି । ସେଥିପାଇଁ ସାଧୁ ,ସନ୍ଥ ଓ ତପସ୍ୱୀମାନେ ଏହି ସମୟରେ ଗୋଟିଏ ସ୍ଥାନରେ ରହି ଜପ ତପ, ସାଧନା,ସ୍ୱାଧ୍ୟାୟ ଓ ପ୍ରବଚନ ଆଦି କରିଥାନ୍ତି । ଏହି ସମୟରେ କେବଳ ବୃନ୍ଦାବନା ଯାତ୍ରା କରାଯାଇ ପାରେ । କାରଣ ଏହି ମାସଗୁଡିକରେ ଭୂମଣ୍ଡଳର ସମସ୍ତ ତୀର୍ଥ ବ୍ରଜ ବା ବୃନ୍ଦାବନରେ ବାସ କରିଥାନ୍ତି ବୋଲି ବିଶ୍ୱାସ ରହିଛି ।
୧୨ ଜୁଲାଇ ପର୍ଯ୍ୟନ୍ତ ଅଛି ବିବାହର ଶୁଭ ମୁହୂର୍ତ୍ତ
ଜ୍ୟୋତିଷଚାର୍ଯ୍ୟ ଅନୁସାରେ ବିବାହ ପାଇଁ କେବଳ ୧୦ ଓ ୧୧ ଜୁଲାଇକୁ ଭଲ ମୁହୂର୍ତ୍ତ ଅଛି । ୧୨ ଜୁଲାଇ ପରେ ବିବାହ ପାଇଁ ଆଉ ଶୁଭ ମୁହୂର୍ତ୍ତ ନାହିଁ । ଏହାପରେ ପୁଣି ନଭେମ୍ବର ୮ ତାରିଖକୁ ଦେବଉଠାଣି ଏକାଦଶୀ ଠାରୁ ମାଙ୍ଗଳିକ କାର୍ଯ୍ୟ ଆରମ୍ଭ ହେବ ।
ଦେବଉଠାଣି ଏକାଦଶୀ ପରେ ଥିବା ବିବାହର ଶୁଭ ମୁହୂର୍ତ୍ତ ଗୁଡିକ ହେଲା ନଭେମ୍ବର ୧୯, ୨୦, ୨୧, ୨୨, ୨୩, ୨୮ ଓ ୩୦ ତାରିଖ ।