ପୁଣି ଓଡିଶାକୁ ଫେରିବ ହକି ବିଶ୍ବକପ୍, ଏଥର ଭୁବନେଶ୍ବର ଓ ରାଉରକେଲାରେ ହେବ ଆୟୋଜନ
ଭୁବନେଶ୍ବର(କେନ୍ୟୁଜ୍): ପୁଣି ଓଡ଼ିଶା ଆୟୋଜନ କରିବ ପୁରୁଷ ହକି ବିଶ୍ୱକପ । କ୍ରମାଗତ ଦ୍ୱିତୀୟ ଥର ପାଇଁ ଓଡ଼ିଶା ଏହାକୁ ଆୟୋଜନ କରିବାର ଗୌରବ ଲାଭ କରିବ । ଆଗାମୀ ୨୦୨୩ ବିଶ୍ୱକପର ସମସ୍ତ ମ୍ୟାଚ ଭୁବନେଶ୍ୱର ଓ ରାଉରକେଲାରେ ଖେଳାଯିବ । କଳିଙ୍ଗ ଷ୍ଟାଡିୟମରେ ହକି ବିଶ୍ୱକପର ପ୍ରଥମ ବର୍ଷ ପୂର୍ତ୍ତି ଅବୂସରରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ବଡ଼ ଘୋଷଣା କରିଛନ୍ତି । ଆଗାମୀ ପୁରୁଷ ହକି ବିଶ୍ୱକପ ଆୟୋଜନ ପାଇଁ ମାଲେସିଆ, ବେଲଜିୟମ ଓ ଭାରତ ଭିତରେ ପ୍ରତିଯୋଗିତା ଚାଲିଥିଲା । ଭାରତ ଶେଷରେ ଏହି ବାଜି ଜିତିଥିଲା । ଓଡ଼ିଶା ସରକାର ହକି ଇଣ୍ଡିଆ ସହଭାଗୀତାରେ ଏହାକୁ ଆୟୋଜନ କରିବେ । ବିଶ୍ୱକପ ଆୟୋଜନ କରିବା ଏକ ଦେଶ ପାଇଁ ଗୌରବର ବିଷୟ । ଓଡ଼ିଶା ଏହାକୁ କ୍ରମାଗତ ଦ୍ୱିତୀୟ ଥର ପାଇଁ ଆୟୋଜନ କରିବ ।
Panposh Hostel of Rourkela is the nerve center of hockey. Hosting of #OdishaHockeyWorldCup2023 matches in Rourkela will be befitting tribute to the contribution of Sundergarh to Indian hockey. It will put Rourkela in global map and promote hockey in big way in hockey heartland. pic.twitter.com/BO8r9LrdpX
— Naveen Patnaik (@Naveen_Odisha) November 27, 2019
ମୁଖ୍ୟମନ୍ତ୍ରୀ ୨୦୨୩କୁ ହକି ବିଶ୍ୱକପକୁ ଭୁବନନେଶ୍ୱର ସହ ରାଉରକେଲାରେ ଖେଳାଯିବା ପାଇଁ ପ୍ରସ୍ତାବ ଦେଇଥିଲେ । ରାଉରକେଲାର ପାନପୋଷ ହଷ୍ଟେଲ ଦେଶରେ ହକିର ପ୍ରାଣକେନ୍ଦ୍ର । ହକିର ଗଡ଼ ସୁନ୍ଦରଗଡ଼ର ଅବଦାନକୁ ଆଖିରେ ରଖି ସ୍ମାର୍ଟ ସିଟି ରାଉରକେଲାରେ ମଧ୍ୟ ମ୍ୟାଚ ଖେଳାଯିବ । ଏହାଦ୍ୱାରା ବିଶ୍ୱ ହକି ମାନଚିତ୍ରରେ ସୁନ୍ଦରଗଡ଼ ଓ ରାଉରକେଲାକୁ ସ୍ୱତନ୍ତ୍ର ସ୍ଥାନ ମିଳିପାରିବ । ଏହା ଅଞ୍ଚଳର ବିକାଶରେ ମଧ୍ୟ ସହାୟକ ହେବ । ମୁଖ୍ୟମନ୍ତ୍ରୀ ଆଜି ସୁନ୍ଦରଗଡ଼ରେ ୧୭ଟି ଆଷ୍ଟ୍ରୋଟର୍ଫ ହକି ଷ୍ଟାଡିୟମ ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି ।
ଏହାସହ ପଢନ୍ତୁ: କାହିଁକି ଅମାବାସ୍ୟାକୁ ନେଇ ଲୋକଙ୍କ ମନରେ ରହିଥାଏ ଡର? ଜାଣନ୍ତୁ ଏହା ପଛର କାରଣ
ଗୋଟିଏ ବର୍ଷ ଭିତରେ ଏସବୁର ନିର୍ମାଣ କାମ ସରିବ । ହକି ପାଇଁ ଏଭଳି ଉତ୍କଷ୍ଟ ଭିତ୍ତିଭୂମି ୟୁରୋପରେ ହକି ଖେଳୁଥିବା ଦେଶରେ ମଧ୍ୟ ନାହିଁ । ଏହାଛଡ଼ା ହକି ହାଇପରଫରମାନସ ସେଣ୍ଟର କୋଠାର ଶିଳାନ୍ୟାସ କରିଛନ୍ତି ନବୀନ । ହକି ଇଣ୍ଡିଆ ସହଯୋଗରେ ସୁନ୍ଦରଗଡ଼ ଜିଲ୍ଲାର ତୃଣମୂଳ ସ୍ତରରେ ଉନ୍ନୟନ କାର୍ଯ୍ୟର ମଧ୍ୟ ଶୁଭାରମ୍ଭ ହୋଇଛି । ଏହି ଅବସରରେ ହକି ବିଶ୍ୱକପ-୨୦୧୮ ସଂପର୍କିତ ଏକ ଡକ୍ୟୁମେଣ୍ଟାରୀ ଓ କଫି ଟେବୁଲ ବୁକର ଉନ୍ମୋଚନ କରିଛନ୍ତି ମୁଖ୍ୟମନ୍ତ୍ରୀ । ଭୁବନେଶ୍ୱରେ ହକି ବିଶ୍ୱକପର ଏକ ବର୍ଷ ପୂର୍ତ୍ତି ଅବସରରେ କଳିଙ୍ଗ ଷ୍ଟାଡିୟମରେ ଆୟୋଜିତ ଉତ୍ସବରେ ଏଫଆଇଏଚର ସଭାପତି ଡ. ନରେନ୍ଦ୍ର ବାତ୍ରା, ରାଜ୍ୟ କ୍ରୀଡ଼ା ମନ୍ତ୍ରୀ ତୁଷାରକାନ୍ତି ବେହେରା, ବିଭିନ୍ନ ବିଭାଗର ମନ୍ତ୍ରୀ ଓ ବିଧାୟକମାନେ ପ୍ରମୁଖ ଉପସ୍ଥିତ ଥିଲେ ।
