ଅନୁଗୁଳ କିଆକଟାରେ ନାବାଳକକୁ ବଳି ଅଭିଯୋଗ ଘଟଣା: ୩ ଜଣଙ୍କୁ ଅଟକ ରଖି ପଚରାଉଚରା
ନାବାଳକକୁ ବଳି ଅଭିଯୋଗର ତନାଘନା ତଦନ୍ତ । ମହିଳା ପୂଜକ ଓ ତାଙ୍କ ତିନି ପୁଅକୁ ଅଟକ ରଖି ପଚରାଉଚରା କରୁଛି ପୋଲିସ । ଆଠମଲ୍ଲିକ ଥାନାରେ କିଛି ଗ୍ରାମବାସୀଙ୍କୁ ପୋଲିସ ପଚରାଉଚରା ଚଳାଇଛି । ହେଲେ ହତ୍ୟା ନେଇ କୌଣସି ସୁରାକ୍ ପାଇନି ପୋଲିସ । ସାଇଣ୍ଟିଫିକ୍ ଟିମ୍ ଓ ପୋଲିସର ସ୍ୱତନ୍ତ୍ର ଟିମ୍ ବିଭିନ୍ନ ଦିଗରୁ ଖୋଳତାଡ କରୁଛି ।
ଅନୁଗୁଳ(କେନ୍ୟୁଜ୍): ଅନୁଗୁଳ କିଆକଟାରେ ନାବାଳକକୁ ବଳି ଅଭିଯୋଗର ତନାଘନା ତଦନ୍ତ । ମହିଳା ପୂଜକ ଓ ତାଙ୍କ ତିନି ପୁଅକୁ ଅଟକ ରଖି ପଚରାଉଚରା କରୁଛି ପୋଲିସ । ଆଠମଲ୍ଲିକ ଥାନାରେ କିଛି ଗ୍ରାମବାସୀଙ୍କୁ ପୋଲିସ ପଚରାଉଚରା ଚଳାଇଛି । ହେଲେ ହତ୍ୟା ନେଇ କୌଣସି ସୁରାକ୍ ପାଇନି ପୋଲିସ । ସାଇଣ୍ଟିଫିକ୍ ଟିମ୍ ଓ ପୋଲିସର ସ୍ୱତନ୍ତ୍ର ଟିମ୍ ବିଭିନ୍ନ ଦିଗରୁ ଖୋଳତାଡ କରୁଛି । ପୋଷ୍ଟମର୍ଟମ ପାଇଁ କଟକ ଏସସିବିକୁ ଅଣାଯିବା ପରେ ଗତକାଲି ରାତିରେ ମୃତ ସଞ୍ଜିତର ଶବ ସତ୍କାର କରାଯାଇଛି ।
ଏପଟେ ଅନେକ ପ୍ରଶ୍ନ ଭିତରେ ଛନ୍ଦି ହୋଇଛି ସଞ୍ଜିତ ବିଶ୍ୱାଳଙ୍କ ହତ୍ୟା ସସ୍ପେନ୍ସ । ଆଠମଲ୍ଲିକ ବାରେଣୀ ଜଙ୍ଗଲରୁ ଉଦ୍ଧାର ମୃତଦେହର ନଥିଲା ହାତ କି ଗୋଡ଼ । କୁଆଡ଼େ ଗଲା ହାତ ଗୋଡ଼ ? ହାତଗୋଡ଼ କାଟି କିଏ ଗଛରେ ଝୁଲାଇଲା ? କିଏ ଓ କାହିଁକି ସଞ୍ଜିତଙ୍କୁ ହତ୍ୟା କଲା ? ନରବଳି ନା ଆଉ କେଉଁ କାରଣ ପାଇଁ ଏ ବୀଭତ୍ସ ହତ୍ୟା ? ଯଦି ବଳି ଦିଆଗଲା କାହିଁକି ହାତଗୋ଼ଡ କାଟାଗଲା ? ଯଦି ବଳି ନୁହେଁ ନୃଶଂସ ହତ୍ୟା କଲା କିଏ ? ତାନ୍ତ୍ରିକର ସଂପୃକ୍ତି ରହିଛି କି ? ମଙ୍ଗଳା ମନ୍ଦିର କୋଠିର ମହିଳା ପୂଜକ ଓ ତାଙ୍କ ୩ ପୁଅଙ୍କୁ ଥାନାରେ ଅଟକ ରଖି ପଚରା ଉଚରା କରାଯାଉଛି । ଗତ ୨୩ ତାରିଖରେ ସଞ୍ଜିତକୁ ସାଙ୍ଗରେ ନେଇ ଟୁସର ଗାଁର ମା ମଙ୍ଗଳା ମନ୍ଦିରକୁ ଅଧିଆ ପଡ଼ିବାକୁ ଆସିଥିଲେ ମାଆ ବାସନ୍ତୀ ବିଶ୍ୱାଳ ।
ପୁଅର ଅସୁସ୍ଥତା ପାଇଁ ସେ ପୂର୍ବରୁ ମଧ୍ୟ ଆସିଥିଲେ । ଏ ବାବଦରେ ଅନେକ ଟଙ୍କା ମଧ୍ୟ ଖର୍ଚ୍ଚ କରିଛନ୍ତି । ତେବେ ସେଦିନ ଅଧିଆ ପଡ଼ିଥିବା ବେଳେ ରାତି ହୋଇଯିବାରୁ ତାଙ୍କୁ ସେଠାରେ ରହିବାକୁ ପଡ଼ିଥିଲା । ତେବେ ତାଙ୍କ ପାଖଷର ଶୋଇଥିବା ପୁଅ ସକାଳକୁ ନଥିଲା । ପୁଅ ମନ୍ଦିରରେ ନମିଳିବାରୁ କିଆକଟା ଥାନାରେ ନିଖୋଜ ନେଇ ଅଭିଯୋଗ କରିଥିଲେ ପରିବାର ଲୋକେ । ୫ ଦିନ ପରେ ଗତ ୨୮ତାରିଖରେ ମିଳିଥିଲା ମୃତଦେହ । ମୃତଦେହଟି ଯେଭଳି ଭାବେ ଗଛରେ ଝୁଲିଥିଲା ତାକୁ ଦେଖିଲେ ଏହା ଜଣକର କାମ ନୁହେଁ ବୋଲି ସ୍ପଷ୍ଟ ହେଉଛି । ତେଣୁ ସଞ୍ଜିତ ହତ୍ୟା ପଛରେ କଣ ରହିଛି ରହସ୍ୟ ତାହାର ପର୍ଦ୍ଦାଫାସ କରିବା ପାଇଁ ପ୍ରୟାସ କରୁଛି ପୋଲିସ୍ । ଘଟଣା ଜଣାପଡ଼ଇବା ପରେ ପୋଲିସ୍ ନିଷ୍କ୍ରିୟତା ଅଭିଯୋଗ କରି ଗ୍ରାମବାସୀ ପୋଲିସ୍ ଗାଡ଼ି ପୋଡ଼ି ଦେଇଥିଲେ । ରାସ୍ତାରୋକ ଓ ପୋଲିସ ଗାଡି ପୋଡି ଘଟଣାରେ ୬ଟି ଗାଁର ୩୬୬ ଜଣଙ୍କ ନାଁରେ ମାମଲା ରୁଜୁୁ ହୋଇଛି।
