କଟକ(କେନ୍ୟୁଜ୍): ପୋଷଉ ନାହିଁ ପୋଲିସିଆ ଦରମା। ତଣୁ ହାଲକାଇକି ଲାଞ୍ଚ ନେଇ ଧରା ପଡିଲେ ଅନୁଗୁଳ ବନ୍ତଳା ଥାନାର ଏସଆଇ ପ୍ରମୋଦ କୁମାର ନାଏକ। ମିଳିଥିବା ସୂଚନା ମୁତାବକ ଜଣେ ଅଭିଯୋଗକାରୀଙ୍କ ଠାରୁ ୬ ହଜାର ଟଙ୍କା ଲାଞ୍ଚ ନେବା ସମୟରେ ଘଟଣା ସ୍ଥଳରେ ଧରିଛି ଭିଜିଲାନ୍ସ ଟିମ୍।
ପୂର୍ବରୁ ବନ୍ତଳା ଥାନାରେ ପଞ୍ଜୀକୃତ ହୋଇଥିବା ଏକ ମାମଲାରେ ଜବତ ହୋଇଥିବା ମୋଟରସାଇକେଲକୁ ନମ୍ବରକୁ କାଟିବା ପାଇଁ ଅଭିଯୋଗକାରୀଙ୍କ ଠାରୁ ୬ ହଜାର ଟଙ୍କା ଲାଞ୍ଚ ମାଗିଥିଲେ। । ଅଭିଯୋଗକାରୀ ପରେ ଭିଜିଲାନ୍ସରେ ଘଟଣା ସମ୍ପର୍କରେ ଜଣାଇବା ପରେ ଭିଜିଲାନ୍ସ ବିଭାଗ ଏସଆଇ ପ୍ରମୋଦଙ୍କୁ ଧରିବା ପାଇଁ ସ୍ବତନ୍ତ୍ର ଟିମ୍ ଗଠନ କରିଥିଲା । ପରେ ଲାଞ୍ଚ ଟଙ୍କାକୁ ଗ୍ରହଣ କରିବା ବେଳେ ପ୍ରମୋଦଙ୍କୁ ଧରିଥିବା ସୂଚନା ମଳିଛି।
ଏହି ମାମଲାରେ ଆଜି କଟକ ଭିଜିଲାନ୍ସ ବିଭାଗ କେସ୍ ନଂ ୨୫ U / s 7 P.C. (ସଂଶୋଧନ) ୨୦୧୮ ଅଧିନିୟମ ଅନୁଯାୟୀ ପଞ୍ଜିକୃତ ହୋଇଛି । ପ୍ରମୋଦଙ୍କ ବିରୋଧରେ ତଦନ୍ତ ଚାଲିଛି ଓ ତାଙ୍କ ସମ୍ପତ୍ତି ଉପରେ ଅନୁଗୁଳର ଗୋଟିଏ ସ୍ଥାନରେ ଏବଂ ଗଞ୍ଜାମ ଜିଲ୍ଲାର ଗୋଟିଏ ସ୍ଥାନରେ ଏକକାଳୀନ ଚଢାଉ କରାଯାଇଥିବା ସୂଚନା ମିଳିଛି ।