ଶଶ୍ମାନରୁ ଉଭାନ ମରଶରୀର, ତିନି ତିନିଟି ଶବ ସମାଧି ସ୍ଥଳରୁ ଗାଏବ

ଭଦ୍ରକ(କେନ୍ୟୁଜ୍): ଶଶ୍ମାନରୁ ଶବ ଗାଏବ । ଗୋଟିଏ କି ଦୁଇଟି ନୁହେଁ, ତିନି ତିନିଟି ଶବ ଶ୍ମଶାନ ସମାଧି ସ୍ଥଳରୁ ଗାଏବ ହୋଇଯାଇଛି । ଏଭଳି ଆଶ୍ଚର୍ଯ୍ୟକର ଘଟଣା ଘଟିଛି ଭଦ୍ରକ ଜିଲ୍ଲାରେ । ଭଣ୍ଡାରୀପୋଖରୀ ବ୍ଲକ ବୈତରଣୀ ନଦୀ କୂଳରେ ଥିବା ମଣିନାଥପୁର ଗାଁ ଶ୍ମଶାନରୁ ଶବ କୁଆଡ଼େ ଉଭାନ୍‌ ହେଉଥିବା ନେଇ ଅଭିଯୋଗ ହୋଇଛି ।

୨୦ ଦିନ ତଳେ ମୃତ୍ୟୁବରଣ କରିଥିବା ମଣିନାଥପୁର ଗାଁର ଅକ୍ଷୟ ବେହେରା, ଦୀନବନ୍ଧୁ ନାଥ ଆଉ ଦୁଇ ମାସ ପୂର୍ବରୁ ମୃତ୍ୟୁ ହୋଇଥିବା ଶ୍ରୀକାନ୍ତ ବେହୁରିଆଙ୍କ ଶବ ମଶାଣିରେ ପୋତି ଦିଆଯାଇଥିଲା । ଗତକାଲି ସକାଳେ ଗାଁର କିଛି ପିଲା ସମାଧି ସ୍ଥଳ ଖୋଳା ଯାଇ ଶବ ଚୋରି ହୋଇଥିବା ଦେଖିବାକୁ ପାଇଥିଲେ ।

ଶବ ଗାଏବ ହେବା ଖବର ଜଣପଡ଼ିବା ପରେ ଶହ ଶହ ଗ୍ରାମବାସୀ ସେଠି ରୁଣ୍ଡ ହୋଇ ଯାଇଥିଲେ । ତେବେ ଶବ ପୋତା ହୋଇଥିବା ସ୍ଥାନରେ ଗାତ ଖୋଳା ହେବା ସହ ଶବର ପିନ୍ଧା ଲୁଗା, ଦୁର୍ବୃତ୍ତଙ୍କ ପାଦ ଚିହ୍ନ, ଆଉ ଶବ ଗୁଡ଼ିକ ଘୋସାରି ନିଆଯାଇଥିବାର ଦାଗ ରହିଛି । ଦୁର୍ବୃତ୍ତମାନେ ବିଳମ୍ବିତ ରାତିରେ ଶବ ଚୋରି କରି ନେଇଥିବା କୁହାଯାଉଛି । ପୂର୍ବଦିନ ଅପରାହ୍ନରେ ହିନ୍ଦୀ ଭାଷାରେ କଥା ହେଉଥିବା ୩ରୁ ୪ ଜଣ ଯୁବକ ମଶାଣି ନିକଟରେ ବୁଲୁଥିବା ଦେଖଶ ଯାଇଥିଲା । ଘଟଣାରେ ସେମାନଙ୍କ ସଂପୃକ୍ତି ଥିବା ଗ୍ରାମବାସୀ ସନ୍ଦେହ କରୁଛନ୍ତି । ଅନ୍ଯପଟେ କୌଣସି ରାକେଟ ମାଧ୍ୟମରେ ମେଡ଼ିକାଲ କଲେଜ ଲ୍ଯାବ ପାଇଁ ଆବଶ୍ଯକ କଙ୍କାଳ ନିମନ୍ତେ ହେଉ କିମ୍ବା ତନ୍ତ୍ରମନ୍ତ୍ର ପାଇଁ କେହି ସାଧକ ଶବ ଚୋରି କରିଥିବା ଚର୍ଚ୍ଚା ହେଉଛି । ଘଟଣାର ତଦନ୍ତ କରି ଶବ ଗାୟବ ହେବା ପଛର ରହସ୍ୟ ଉପରୁ ପରଦା ଉଠାଇବାକୁ ଗାଁ ଲୋକେ ଦାବି କରିଛନ୍ତି ।