କେନ୍ୟୁଜ୍(ବ୍ୟୁରୋ): ବିଜେପିର ହାଇଡ୍ରାମା । ବିଧାନସଭାରୁ ନବୀନ ନିବାସ । ଭାୟା ଲୋକସେବା ଭବନ । ସମୟ ଦିନ ୧୨ଟା ୨୦। ମଣ୍ଡି ପ୍ରସଙ୍ଗରେ ବିଜେପି ବିଧାୟକମାନେ ପ୍ଲାକାର୍ଡ ଧରି ବିଧାନସଭାରୁ ବାହାରିଲେ । ଆଗେ ଆଗେ ବିଜେପି ବିଧାୟକ ପଛରେ ଚାଲୁଥାଆନ୍ତି ବିଜେଡି ବିଧାୟକ ଓ ମନ୍ତ୍ରୀ । ମୁଖ୍ୟମନ୍ତ୍ରୀଙ୍କୁ ଭେଟିବାକୁ ବିଜେପି ବିଧାୟକମାନେ ପ୍ରଥମେ ଗଲେ ଲୋକସେବା ଭବନ । ସେଠାରେ ମୁଖ୍ୟମନ୍ତ୍ରୀ ନଥିବାରୁ ପଦଯାତ୍ରା ଚାଲିଲା ନବୀନ ନିବାସ ଆଡ଼କୁ । ରାସ୍ତାର ଦୁଇ କଡ଼ରେ ଲୋକେ ତାଜୁବ ହୋଇ ଦେଖୁଥାଆନ୍ତି ପଲିଟିକାଲ ଡ୍ରାମାକୁ ।
ସେପଟେ ନବୀନ ନିବାସରେ ଫୁଲତୋଡ଼ା ଧରି ଶଙ୍ଖ ବଜାଇ ସ୍ୱାଗତ ପାଇଁ ଉପସ୍ଥିତ ଥିଲେ ବିଜେଡିର ବହୁ ତୁଙ୍ଗ ନେତା । ନବୀନ ନିବାସ ଭିତରକୁ ପଶିବା ବେଳେ ଆରମ୍ଭ ହୋଇଯାଇଥିଲା ଠେଲାପେଲା। ପ୍ରତିବାଦରେ ଧାରଣାରେ ବସିିଥିଲେ ବିଜେପି ଟିମ୍। ବିଜେଡି ନେତାମାନେ ସେମାନଙ୍କୁ ଆଲୋଚନା ପାଇଁ ବାରମ୍ବାର ଡାକିଲେ ମଧ୍ୟ କେହି ଶୁଣିନଥିଲେ । ସମସ୍ତଙ୍କୁ ଚକିତ କରି ନିଜେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଧାରଣାସ୍ଥଳକୁ ଆସି ବିଧାୟକମାନଙ୍କୁ ଡାକିଥିଲେ । ତା ପରେ ବିରୋଧୀ ଦଳ ନେତା ପ୍ରଦୀପ୍ତ ନାୟକଙ୍କ ଠାରୁ ଆରମ୍ଭ କରି ସବୁ ବିଧାୟକ ନବୀନ ନିବାସ ଯାଇଥିଲେ। ସୌହାର୍ଦ୍ଦ୍ୟପୂର୍ଣ୍ଣ ପରିବେଶରେ ଆଲୋଚନା ହୋଇଥିଲା।
ପାଖାପାଖି ୨୦ ମିନିଟ ଧରି ମୁଖ୍ୟମନ୍ତ୍ରୀଙ୍କ ସହ ବିଜେପି ବିଧାୟକଙ୍କ ଟିମ୍ କରିଥିଲେ ଆଲୋଚନା । ମଣ୍ଡି ପ୍ରସଙ୍ଗରେ ବିରୋଧୀଙ୍କ ସବୁ କଥା ଶୁଣିବା ପରେ ସମାଧାନ କରିବେ ବୋଲି ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଥିବା ବିଜେପି କହିଛି । ବଡ଼ କଥା ହେଲା, ମଣ୍ଡି ପ୍ରସଙ୍ଗରେ ବିଜେଡିକୁ ବ୍ୟାକଫୁଟ୍କୁ ଠେଲିବା ପାଇଁ ଷ୍ଟ୍ରାଟେଜୀ କରିଥିଲା ବିଜେପି । କିନ୍ତୁ ନବୀନଙ୍କ ମାଷ୍ଟରଷ୍ଟ୍ରୋକ ବିଜେପିର ସବୁ ଅଙ୍କକୁ ଓଲଟପାଲଟ କରିଦେଇଛି। ନବୀନ ନିଜେ ଧାରଣାସ୍ଥଳୀକୁ ଆସି ବିଜେପି ବିଧାୟକଙ୍କୁ ଆଲୋଚନା ପାଇଁ ଆମନ୍ତ୍ରଣ କରିବା ନୂଆ ଗଣତାନ୍ତ୍ରିକ ପରଂପରା ସୃଷ୍ଟି କରିଛି ।