ଘନ କୁହୁଡ଼ି: ଆଗ୍ରା-ଲକ୍ଷ୍ନୌ ଏକ୍ସପ୍ରେସ୍ୱେରେ ଟ୍ରକ୍ ସହ ଧକ୍କା ହୋଇ ଓଲଟିଲା ବସ୍; ଥିଲେ ୪୦ ଯାତ୍ରୀ
ଉତ୍ତର ପ୍ରଦେଶରେ ଭୟଙ୍କର ସଡ଼କ ଦୁର୍ଘଟଣା । ଗତ ରାତିରେ ଆଗ୍ରା-ଲକ୍ଷ୍ନୌ ଏକ୍ସପ୍ରେସ୍ୱେରେ ଏକ ଡବଲ୍ ଡେକର ବସ୍ ଟ୍ରକ୍କୁ ଧକ୍କା ଦେଇ ଖାଇକୁ ଓଲଟି ପଡ଼ିଛି । ଏହି ଦୁର୍ଘଟଣାରେ ବସ୍ରେ ଥିବା ୧୦ ଜଣ ଯାତ୍ରୀ ଗୁରୁତର ଆହତ ହୋଇଛନ୍ତି ।
ଉତ୍ତର ପ୍ରଦେଶରେ ଭୟଙ୍କର ସଡ଼କ ଦୁର୍ଘଟଣା । ଗତ ରାତିରେ ଆଗ୍ରା-ଲକ୍ଷ୍ନୌ ଏକ୍ସପ୍ରେସ୍ୱେରେ ଏକ ଡବଲ୍ ଡେକର ବସ୍ ଟ୍ରକ୍କୁ ଧକ୍କା ଦେଇ ଖାଇକୁ ଓଲଟି ପଡ଼ିଛି । ଏହି ଦୁର୍ଘଟଣାରେ ବସ୍ରେ ଥିବା ୧୦ ଜଣ ଯାତ୍ରୀ ଗୁରୁତର ଆହତ ହୋଇଛନ୍ତି । ବସ୍ଟି ଦିଲ୍ଲୀରୁ ଯାତ୍ରୀମାନଙ୍କୁ ଧରି ଲକ୍ଷ୍ନୌ ଅଭିମୁଖେ ଯାଉଥିଲା । ବସ୍ରେ ପାଖାପାଖି ୪୦ ଯାତ୍ରୀ ଥିଲେ ।
ଅନୁମାନ କରାଯାଉଛି, ଘନ କୁହୁଡ଼ି କାରଣରୁ ବସ୍ଟି ଦୁର୍ଘଟଣାର ଶିକାର ହୋଇଛି । ଦୁର୍ଘଟଣା ପରେ ବସ୍ ଯାତ୍ରୀମାନେ ଚିତ୍କାର କରିଥିଲେ । ଖବର ପାଇ ପୋଲିସ ପହଞ୍ଚି ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା ଏବଂ ଆହତମାନଙ୍କୁ ସଙ୍ଗେ ସଙ୍ଗେ ହସ୍ପିଟାଲରେ ଭର୍ତ୍ତି କରାଇଥିଲା ।
ପୋଲିସ ସୂଚନା ମୁତାବକ, ଆଗ୍ରାର ଡୌକି ଥାନା ଅଧୀନ ଆଗ୍ରା-ଲକ୍ଷ୍ନୌ ଏକ୍ସପ୍ରେସ୍ୱେର ୧୪ ନଂ. ମାଇଲ୍ଷ୍ଟୋନ୍ ପାଖରେ ଏକ ଟ୍ରକ୍ ଛିଡ଼ା ହୋଇଥିଲା । ଏହି ସମୟରେ ଦିଲ୍ଲୀରୁ ଲକ୍ଷ୍ନୌ ଆଡ଼କୁ ଯାଉଥିବା ଏକ ଡବଲ୍ ଡେକର ବସ୍ ହଠାତ୍ ଟ୍ରକ୍ ସହ ପିଟି ହୋଇ ରାସ୍ତା ତଳକୁ ଓଲଟି ପଡ଼ିଥିଲା । ଏହି ସମୟରେ ବସ୍ରେ ଥିବା ଯାତ୍ରୀମାନେ ଜୋର୍ରେ ଚିତ୍କାର କରିଥିଲେ । ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ସେଠାରେ ସେମାନଙ୍କ ଚିକିତ୍ସା ଚାଲିଛି ।
ସୂଚନାଥାଉ କି, ଘନ କୁହୁଡ଼ି ଯୋଗୁ ଏହି ଏକ୍ସପ୍ରେସ୍ୱେରେ କ୍ରମାଗତ ଭାବେ ଦୁର୍ଘଟଣା ସଂଖ୍ୟା ବଢ଼ିଚାଲିଛି । ଗତ ଡିସେମ୍ବର ୨୭ରେ ଉନ୍ନାଓ ନିକଟରେ ଏକ ଭୀଷଣ ସଡ଼କ ଦୁର୍ଘଟଣା ଘଟିଥିଲା, ଯେଉଁଥିରେ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିବା ବେଳେ ୧୨ରୁ ଅଧିକ ଯାତ୍ରୀ ଆହତ ହୋଇଥିଲେ ।