ବ୍ୟାଙ୍କ ବୁଡ଼ିଲେ ୯୦ ଦିନ ଭିତରେ ଖାତାଧାରୀ ମାନଙ୍କୁ ମିଳିଯିବ ବୀମା ଟଙ୍କା
ପଞ୍ଜାବ ଆଣ୍ଡ ମହାରାଷ୍ଟ୍ର କୋ ଅପରେଟିଭ ବ୍ୟାଙ୍କ, ୟେସ ବ୍ୟାଙ୍କ, ଲକ୍ଷ୍ମୀ ବିଳାସ ବ୍ୟାଙ୍କ ପରି ବ୍ୟାଙ୍କ ଗ୍ରାହକଙ୍କ ପାଇଁ ସରକାର ଏକ ବଡ ଘୋଷଣା କରିଛନ୍ତି । ବୁଧବାର ଅନୁଷ୍ଠିତ ହୋଇଥିବା କ୍ୟାବିନେଟ ବୈଠକରେ ଡ଼ିଆଇସିଜିସି ଆକ୍ଟରେ ପରିବର୍ତ୍ତନ ଅଣାଯାଇଛି । ଏହା ଦ୍ୱାରା କୌଣସି ବ୍ୟାଙ୍କ ଯଦି ବୁଡ଼ିଯାଏ ତେବେ ନିୟମ ଅନୁଯାୟୀ ଖାତାଧାରକ ମାନଙ୍କୁ ୯୦ ଦିନ ଭିତରେ ଟଙ୍କା ମିଳିଯାଇପାରିବ । ଅର୍ଥ ମନ୍ତ୍ରୀ ନିର୍ମଳା ସୀତାରମଣ କ୍ୟାବିନେଟ ବୈଠକରେ ଏବାବଦରେ ସୂଚନା ଦେଇଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା କ୍ୟାବିନେଟ ବୈଠକରେ ଡିପୋଜିଟ ଇନ୍ସୁରାନ୍ସ ଆଣ୍ଡ କ୍ରେଡିଟ ଗ୍ୟାରେଣ୍ଟି କର୍ପୋରେସନ ଆକ୍ଟ ବା ଡ଼ିଆଇସିଜିସିର ନୂଆ ସଂଶୋଧନକୁ ଅନୁମତି ମିଳିଛି । ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତିକି କ୍ୟାବିନେଟ ଇନ୍ସୁରାନ୍ସ ଆଣ୍ଡ କ୍ରେଡିଟ କର୍ପୋରେସନ ବିଲ, ୨୦୨୧ କୁ ମଞ୍ଜୁରୀ ଦେଇଛନ୍ତି । ଏହି ବିଲକୁ ସଂସଦର ମୌସୁମୀ ଅଧିବେଶନରେ ଉପସ୍ଥାପନ କରାଯିବ ।
ଏହି ସଂଶୋଧନ ହେବା ପରେ ଖାତାଧାରକ ଓ ନିବେଶକଙ୍କ ଟଙ୍କା ଆଗ ଅପେକ୍ଷା ଅଧିକ ସୁରକ୍ଷିତ ରହିବ । ମଞ୍ଜୁରୀ ମିଳିବା ପରେ କୌଣସି ବ୍ୟାଙ୍କ ବୁଡ଼ିଗଲେ ବୀମାର ଖାତାଧାରୀଙ୍କୁ ୯୦ ଦିନର ସୀମା ଭିତରେ ହିଁ ଅର୍ଥରାଶି ମିଳିଯିବ । ଏହି ନିୟମ ଅଧୀନରେ ସମସ୍ତ କାମର୍ସିୟାଲ, ଗ୍ରାମୀଣ ବ୍ୟାଙ୍କ ମାନ ଆସୁଥିବା ଜଣାଯାଇଛି । ଅର୍ଥମନ୍ତ୍ରୀ ଏହା ମଧ୍ୟ କହିଛନ୍ତିକି, ଏହି ବୀମା ପାଇଁ ପ୍ରିମିୟମ ବ୍ୟାଙ୍କ ମାନେ ହିଁ ଦେଇଥାନ୍ତି, ଗ୍ରାହକ ମାନେ ନୁହେଁ ।କହିରଖିବା ଉଚିତ ହେବକି, ଡ଼ିଆଇସିଜିସି ପ୍ରକୃତରେ ଭାରତୀୟ ରିଜର୍ଭ ବ୍ୟାଙ୍କର ଏକ ସବସିଡାରୀ ଅନୁଷ୍ଠାନ । ଏହା ବ୍ୟାଙ୍କ ଜମା ଉପରେ ବୀମା କଭର ଦେଇଥାଏ ।
ଏବେ ପର୍ଯ୍ୟନ୍ତ ଥିବା ନିୟମ ଅନୁଯାୟୀ ଖାତାଧାରକ ମାନେ ୫ ଲକ୍ଷ ଟଙ୍କାର ବୀମା ଅତି କମରେ ଥିଲେ ମଧ୍ୟ ରିଜର୍ଭ ବ୍ୟାଙ୍କ ସମସ୍ତ ପ୍ରକ୍ରିୟା ପୁରଣ ନକରିବା ପର୍ଯ୍ୟନ୍ତ ଟଙ୍କା ମିଳିପାରୁନାହିଁ । ଏହି କାରଣରୁ ଦୀର୍ଘ ସମୟ ପର୍ଯ୍ୟନ୍ତ ଗ୍ରାହକଙ୍କୁ ଟଙ୍କା ମିଳିପାରୁନଥିଲା । ଆଉ ଟଙ୍କା ଫେରସ୍ତ କେବଳ ସେହି ଖାତାଧାରକଙ୍କୁ ହିଁ ଦିଆଯାଉଥିଲା ଯେଉଁ ବ୍ୟାଙ୍କର ଲାଇସେନ୍ସ କ୍ୟାନ୍ସଲ ହୋଇଯାଇଥିବ ଅଥବା ବ୍ୟାଙ୍କର ଆସେଟ ଗୁଡିକର ବିକ୍ରି ପ୍ରକ୍ରିୟା ଆରମ୍ଭ ହୋଇଯାଇଥିବ । କିନ୍ତୁ ନୂଆ ନିୟମ ଅନୁଯାୟୀ ଗ୍ରାହକଙ୍କୁ ମାତ୍ର ୩ ମାସ ଭିତରେ ହିଁ ଟଙ୍କା ଫେରସ୍ତ ଦିଆଯିବ ବୋଲି ଜଣାଯାଇଛି ।
