ପେଟ୍ରୋଲ-ଡିଜେଲ ପରେ ଶସ୍ତା ହେଲା LPG ସିଲିଣ୍ଡର, ଆଜିଠାରୁ ୧୩୫ ଟଙ୍କା କମ୍ ହେଲା ଦାମ୍
ଗ୍ରାହକଙ୍କୁ ପୁଣି ମିଳିଲା ରିହାତି । ଗତ କିଛି ଦିନ ତଳେ ପେଟ୍ରୋଲ-ଡିଜେଲ ଦର ହ୍ରାସ ପାଇବା ପରେ ଏବେ ଏଲପିଜି ସିଲିଣ୍ଡରର ମୂଲ୍ୟ ହ୍ରାସ ପାଇଛି। ଇଣ୍ଡିଆନ୍ ଅଏଲ୍ ଦ୍ୱାରା ଜୁନ୍ ୧ ରେ ପ୍ରକାଶିତ ମୂଲ୍ୟ ଅନୁଯାୟୀ ୧୮ କିଲୋଗ୍ରାମର ବ୍ୟବସାୟିକ ସିଲିଣ୍ଡର ୧୩୫ ଟଙ୍କା ଶସ୍ତା ହୋଇଛି।
ଆଜି ଠାରୁ ମୂଲ୍ୟ ହ୍ରାସ ପରେ ବର୍ତ୍ତମାନ ଦିଲ୍ଲୀର ବ୍ୟବସାୟିକ ସିଲିଣ୍ଡର ୨୩୫୪ ବଦଳରେ ୨୨୧୯ ଟଙ୍କା ହୋଇଛି । ସେହିଭଳି କୋଲକାତାରେ ୨୪୫୪ ବଦଳରେ ୨୩୨୨ ଟଙ୍କା, ମୁମ୍ବାଇରେ ୨୩୦୬ ବଦଳରେ ୨୧୭୨.୫୦ ଟଙ୍କା ଏବଂ ଚେନ୍ନାଇରେ ୨୫୦୭ ବଦଳରେ ୨୩୭୩ ଟଙ୍କା ହୋଇଛି। କମ୍ପାନୀଗୁଡିକ ଦେଇଥିବା ଏହି ରିଲିଫ୍ ର ପ୍ରଭାବ ଆଗାମୀ ସମୟରେ ମୁଦ୍ରାସ୍ଫୀତି ଉପରେ ଦେଖିବାକୁ ମିଳିବ । ଏହାପୂର୍ବରୁ ମେ ୧ ରେ ଏହାର ମୂଲ୍ୟ ପ୍ରାୟ ୧୦୦ ଟଙ୍କା ବୃଦ୍ଧି ପାଇଥିଲା।
ତଥାପି, କମ୍ପାନୀଗୁଡିକ ଦ୍ୱାରା ଘରୋଇ ଏଲପିଜି ମୂଲ୍ୟରେ କୌଣସି ପରିବର୍ତ୍ତନ ହୋଇନାହିଁ। ଏହି ରିହାତିରୁ ଜନସାଧାରଣଙ୍କୁ ଆରାମ ଦେବା ପୂର୍ବରୁ ସରକାର ଉଜ୍ଜ୍ୱଳା ଯୋଜନା ଅଧୀନରେ ସିଲିଣ୍ଡର ପିଛା ୨୦୦ ଟଙ୍କା ସବସିଡି ଘୋଷଣା କରିଥିଲେ। ଏହି ସବସିଡି ବାର୍ଷିକ କେବଳ ୧୨ ଟି ସିଲିଣ୍ଡର ପର୍ଯ୍ୟନ୍ତ ଉପଲବ୍ଧ ହେବ। ସରକାରଙ୍କ ଏହି ପଦକ୍ଷେପରୁ ୯ କୋଟିରୁ ଅଧିକ ଗ୍ରାହକ ଉପକୃତ ହୋଇଛନ୍ତି।
ମେ ମାସରେ ଘରୋଇ ଏଲପିଜି ସିଲିଣ୍ଡରର ହାର ଦୁଇଥର ବୃଦ୍ଧି କରାଯାଇଥିଲା । ଘରୋଇ ସିଲିଣ୍ଡରର ହାର ୭ ମଇରେ ୫୦ ଟଙ୍କା ବୃଦ୍ଧି କରାଯାଇଥିଲା। ମେ ୧୯ ରେ, ଘରୋଇ LPG ମୂଲ୍ୟରେ ପରିବର୍ତ୍ତନ ଆସିଥିଲା । ଏହି ସିଲିଣ୍ଡର ପିଛା ୩.୫୦ ପଇସା ବୃଦ୍ଧି ଘଟିଥିଲା । ସେପଟେ ମେ’ ୭ରେ ୧୯ କିଲୋଗ୍ରାମ ବ୍ୟବସାୟିକ ସିଲିଣ୍ଡର ପ୍ରାୟ ୧୦ ଟଙ୍କା ଶସ୍ତା ହୋଇଥିଲା । ମେ’ ୧୯ରେ ଏହାର ଦରରେ ୮ ଟଙ୍କା ବୃଦ୍ଧି କରାଯାଇଥିଲା ।
ବର୍ତ୍ତମାନ ସମଗ୍ର ଦେଶରେ ଘରୋଇ LPG ସିଲିଣ୍ଡରର ମୂଲ୍ୟ ୧୦୦୦ ଟଙ୍କା ପାର କରିଛି । ଆପଣଙ୍କୁ କହି ରଖୁଛୁ ଯେ, ଗତ ଏକ ବର୍ଷ ମଧ୍ୟରେ ଦିଲ୍ଲୀର ଘରୋଇ ଏଲପିଜି ସିଲିଣ୍ଡର ୮୦୯ରୁ ୧୦୦୩ ଟଙ୍କାକୁ ପହଞ୍ଚିଯାଇଛି । ବର୍ତ୍ତମାନ ସମୟରେ ୧୪.୨ କିଲୋଗ୍ରାମ ଘରୋଇ ଏଲପିଜି ସିଲିଣ୍ଡର ଦିଲ୍ଲୀ ଓ ମୁମ୍ବାଇରେ ୧,୦୦୩ ଟଙ୍କା, କୋଲକାତାରେ ୧,୦୦୩ ଟଙ୍କା, ଭୁବନେଶ୍ୱରରେ ମଧ୍ୟ ୧,୦୦୩ ଟଙ୍କା ଏବଂ ଚେନ୍ନାଇରେ ୧, ୦୦୩ ଟଙ୍କାରେ ମିଳୁଛି ।
lpg-cylinder-becomes-cheaper
