ଖୁସି ଲାଗୁଛି ଏହି କରୋନାର ଭୟାବହତା ସମୟରେ ଅନେକ ବିଶିଷ୍ଟ ବ୍ୟକ୍ତି ଆଗକୁ ଆସି ସେମାନେ ଆଇସୋଲେସନ୍ ବା ଅଲଗା ରହୁଥିବା କଥା ସ୍ପଷ୍ଟ ଭାବେ ସମସ୍ତଙ୍କ ଆଗରେ କହୁଛନ୍ତି । ଯାହା ବର୍ତ୍ତମାନ ସମୟରେ ଅତ୍ୟନ୍ତ ଜରୁରୀ । ଏହି କରୋନା ଭାଇରସ୍ ବା କୋଭିଡ୍-୧୯ ସାରା ବିଶ୍ୱକୁ ପ୍ରଭାବିତ କରିଛି । ଆମ ଜୀବନଯାତ୍ରୀରେ ପ୍ରତିବନ୍ଧକ ସୃଷ୍ଟି କରିଛି । ସବୁ କ୍ଷେତ୍ରରେ ଏବେ ସ୍ଥିତି ସ୍ଥାଣୁ ଅବସ୍ଥାକୁ ଯାଉଛି । ତେବେ ଯାହାର ପ୍ରତିକାର ନାହିଁ ତକୁ ଆମେ କେବଳ ଦୈବୀ ଦୁର୍ବିପାକ ହିଁ କହି ପାରିବା । ବାତ୍ୟା, ବନ୍ୟା ଓ ଭୂମିକମ୍ପ ଭଳି ପ୍ରାକୃତିକ ବିପର୍ଯ୍ୟୟର ଇଏ ଆଉ ଏକ ରୂପ ବୋଲି ହିଁ କହି ହେବ । ଯାହାର ମୁକାବିଲା କରିବା ଛଡ଼ା ଆମ ପାଖରେ ଅନ୍ୟ କୌଣସି ରାସ୍ତା ହିଁ ନାହିଁ ।
ଅତୀତରେ ବି ଆମେ ଜିତିଛୁ
ଇତିହାସକୁ ଦେଖିଲେ ଜାଣି ପାରିବା ଯେ ଅତୀତରେ ଆମ ଦେଶ ଓ ରାଜ୍ୟରେ ହଇଜା, ପ୍ଲେଗ୍ ଠାରୁ ଆରମ୍ଭ କରି ମରୁଡ଼ି ଯାଏ ଅନେକ ବିପତ୍ତି ଆସିଛି । ଲୋକ ପୋକ ମାଛି ଭଳି ମରିଛନ୍ତି । କାରଣ ସେତେବେଳେ ଏହାର ମୁକାବିଲା କରିବାକୁ ଆମ ପାଖରେ କୌଣସି ଭିତ୍ତିଭୂମି ନଥିଲା । ଲୋକେ ରୋଗକୁ ନେଇ ସଚେତନ ନଥିଲେ । ହେଲେ ସେ ସମୟ ଆଉ ନାହିଁ । ବର୍ତ୍ତମାନର ସମୟ ଆମକୁ ବିଜ୍ଞାନ ଦୃଷ୍ଟିରୁ ଢେର କିଛି ଦେଇଛି । ସେ ଚିକିତ୍ସା କ୍ଷେତ୍ର ହେଉ କି ଯୋଗାଯୋଗ ସବୁଥିରେ ମଣିଷ ସମାଜ ଖୁବ୍ ଆଗରେ । ତଥାପି ଏସବୁ ପରେ ମଧ୍ୟ ଆମ ପାଇଁ ଏଭଳି ସ୍ଥିତି ସୃଷ୍ଟି ହେଉଛି ଯେଉଁଠି ଆମେ କିଛି କରିବାର ଉପାୟ ପାଉନାହୁଁ । ଠିକ୍ ଯେମିତି ଏବେ କରୋନା ଆମକୁ ସେଭଳି ‘କିଂ କର୍ତ୍ତବ୍ୟ ବିମୂଢ଼’ ସ୍ଥିତିରେ ପକାଇ ଦେଇଛି । ତେଣୁ କେବଳ ସତର୍କତା ଓ ସଚେତନତା ହିଁ ଏହି ଭାଇରସ୍କୁ ପ୍ରତିରୋଧ କରି ପାରିବ ।
ପରାମର୍ଶଗୁଡ଼ିକ ମାନିବା ଜରୁରୀ କାହିଁକି
ସରକାର ପୂରା ଦମ୍ ଲଗାଇ ରୋଗକୁ ବ୍ୟାପିବାରୁ ରୋକିବା ଲାଗି ଉଦ୍ୟମ ଜାରି ରଖିଛନ୍ତି । କିଭଳି ଭାବେ ସତର୍କ ରହିଲେ ରୋଗ ଆପଣଙ୍କୁ ଛୁଇଁ ପାରିବ ନାହିଁ ତାର ଗାଇଡ୍ ଲାଇନ୍ ମଧ୍ୟ ଜାରି କରିଛନ୍ତି । ସେଗୁଡ଼ିକ ଠିକ୍ ଭାବେ ପାଳନ କରିବା ସହ କିଛି ସମୟ ପାଇଁ ଭିଡ଼ ଏବଂ ଲୋକାରଣ୍ୟ ଜାଗାରୁ ଦୂରେଇ ରହିଲେ ଆମ ସମସ୍ତଙ୍କ ପାଇଁ ଭଲ । ଦୁଃସାହସୀ ନହୋଇ ସଚେତନ ହୋଇ ଚଳିବା ପାଇଁ ଯେଉଁ ସବୁ ପରାମର୍ଶ ଦିଆଯାଇଛି ତାକୁ ପାଳନ କରିବା ଉଚିତ । ଯାହାଫଳରେ ଆମେ ଏହି ରୋଗ ସହ ପରୋକ୍ଷରେ ଲଢ଼ି ପାରିବା ।
ପୁରୀ ଗଜପତି ଦିବ୍ୟସିଂହ ଦେବ, ବରିଷ୍ଠ ପ୍ରଶାସନିକ ଅଧିକାରୀ ଭିନିଲ କ୍ରିଷ୍ଣା, ବରିଷ୍ଠ ନେତା ସଞ୍ଜୟ ଦାସବର୍ମାଙ୍କ ଭଳି ଅନେକ ବିଶିଷ୍ଟ ବ୍ୟକ୍ତି ଖୋଲାଖୋଲି ଭାବେ ନିଜେ ଓ ନିଜ ପରିବାରକୁ ‘ଆଇସୋଲେସନ୍’ରେ ରଖିଥିବା କଥା କହିଛନ୍ତି । କାରଣ ଏହି ରୋଗରୁ ଧନୀ କି ଗରିବ କେହି ବି ବାଦ୍ ପଡ଼ି ନାହାନ୍ତି । ସେଥିପାଇଁ କେବଳ ସତର୍କ ରହିବା ହିଁ ଜରୁରୀ ।
କଥା ମାନିଲେ ସବୁ ଠିକ୍ ହୋଇଯିବ
ଯଦି ଆମେ ଠିକ୍ ଭାବେ ଏହାର ମୁକାବିଲା କରିବା ତେବେ ଏହା ଶୀଘ୍ର ଆମ ଠାରୁ ଦୂରେଇ ଯିବ । ନଚେତ ଆମେ ଯେତେ ବିଳମ୍ବ ଓ ଅବହେଳା କରିବା ସେତେ ଦିନ ଆମକୁ କରୋନା ହଇରାଣ ହରକତ କରିବ । ହୁଏତ ଆଗକୁ ଆମେ କେବଳ ନିଜ ଘରେ ବନ୍ଦୀ ହୋଇ ରହିବାର ସ୍ଥିତି ଉପୁଜି ପାରେ । କାରଣ ବର୍ତ୍ତମାନ ଠାରୁ ଆମ ପାଇଁ ସ୍କୁଲ, କଲେଜ, ଅଫିସ୍, ମଲ୍, ହାଟ, ମେଳା ମହୋତ୍ସବ, ବୈଠକ ବନ୍ଦ ହୋଇଗଲାଣି । ଯାହା ପାଖରେ ଗୁହାରୀ କରିବା ସେଇ ଠାକୁର ମନ୍ଦିରରେ ଏତେ କଟକଣା ଯେ ଭକ୍ତଙ୍କ ସଂଖ୍ୟା କମି ଗଲାଣି । ଟ୍ରେନ୍ ଓ ବସ୍ରେ ଲୋକେ ଯାତ୍ରା କରିବାକୁ ଭୟ କଲେଣି । ତେଣୁ ଯାତ୍ରୀ ସଂଖ୍ୟା କମି ଯାଇଛି ।
ଏସବୁ କେବଳ କରୋନା ଭୟ ଯୋଗୁଁ ଘଟିନି । ଅନେକ ହୁଏତ ଡରିଥିବେ ହେଲେ ଅନ୍ୟମାନେ ସତର୍କତା ଅବଲମ୍ବନ କରିଥିବେ । ଆମେ ଦେଖିବାକୁ ପାଇଛୁ କିଛି ଲୋକ ଦୁଃସାହସୀ ହୋଇ କହୁଛନ୍ତି ‘ହଁ କରୋନା କଣ କରିବ ମ? । ମାସ୍କ କାହିଁକି ପିନ୍ଧିବୁ, ଅଯଥାରେ ଲୋକଙ୍କୁ ଡରାଉଛନ୍ତି । କିଛି ହେବ ନାହିଁ’ । ତେବେ ସେଭଳି ବ୍ୟକ୍ତିଙ୍କୁ ଆମର ଅନୁରୋଧ କରୋନାକୁ ସାହସର ସହିତ ସାମନା କରନ୍ତୁ କିନ୍ତୁ ଦୁଃସାହସୀ ହୋଇ କୌଣସି ଭୁଲ କରି ବସନ୍ତୁ ନାହିଁ । ଯାହା କେବଳ ତାଙ୍କ ପାଇଁ ନୁହେଁ, ଅନ୍ୟମାନଙ୍କ ପାଇଁ ମଧ୍ୟ ବିପଦର କାରଣ ପାଲଟିବ ।
କଣ କରିବେ
ଯଦି ଆପଣଙ୍କ ଠାରେ କରୋନାର କୌଣସି ଲକ୍ଷଣ ଦେଖା ଯାଉଛି ତେବେ ଭୟ ନକରି ନିଜକୁ ପରିବାର ଓ ବନ୍ଧୁମାନଙ୍କ ଠାରୁ ଦୂରେଇ ରଖନ୍ତୁ । ବାରମ୍ବାର ହାତକୁ ସଫା ରଖିବା ସହିତ ଆଖି, ନାକ ଓ ମୁହଁରେ ହାତ ମାରନ୍ତୁ ନାହିଁ । ଆଉ ଗୋଟିଏ କଥା ମଧ୍ୟ ଜାଣି ରଖନ୍ତୁ, ଆପଣ ଯଦି କରୋନା ଭାଇରସ୍ ପଜେଟିଭ୍ ଆସେ ସେଭଳି କିଛି ଔଷଧ ନାହିଁ ଯାହାକୁ ଖାଇଲେ ଆପଣ ତୁରନ୍ତ ଭଲ ହୋଇଯିବେ । ଏଥିରେ କେବଳ ନିଜକୁ ଜଗି ଚଳିବା ଦରକାର ।