ମୁମ୍ବାଇ : ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାରେ ନିଜର ନାମକୁ ଯୋଡ଼ାଯିବା ଯୋଗୁ ଅସନ୍ତୁଷ୍ଟ ଅକ୍ଷୟ କୁମାର ଜଣେ ୟୁଟ୍ୟୁବରଙ୍କ ନାମରେ ୫୦୦ କୋଟିର ମାନହାନୀ ମକଦ୍ଦମା ରୁଜୁ କରିଛନ୍ତି । ଏହି ୟୁଟ୍ୟୁବର ହେଲେ ରାଶିଦ୍ ସିଦ୍ଦୀକୀ । ରାଶିଦ୍ ଅଭିନେତା ସୁଶାନ୍ତ ସିଂହଙ୍କ ମୃତ୍ୟୁରେ ବଲିଉଡ୍କୁ ବଦନାମ କରିବା ସହ ଅଭିନେତା ଅକ୍ଷୟ କୁମାରଙ୍କ ନାମରେ ୟାଡୁ ସ୍ୟାଡୁ ଲେଖି ତାଙ୍କୁ ବଦନାମ କରିଥିଲେ ବୋଲି ଅକ୍ଷୟ କୁମାର ଅଭିଯୋଗ କରିଛନ୍ତି । ତେଣୁ ଅକ୍ଷୟ ତାଙ୍କ ନାମରେ ୫୦୦ କୋଟି ଟଙ୍କାର ମାନହାନୀ ମକ୍କଦ୍ଦମା ରୁଜୁ କରିଛନ୍ତି ବୋଲି ଅକ୍ଷୟଙ୍କ ନିକଟତମ ସୂତ୍ରରୁ ଜଣାପଡ଼ିଛି ।
୨୫ ବର୍ଷୀୟ ରାଶିଦ୍ ବିହାରରେ ରହୁଥିବା ବେଳେ ପେଶାରେ ଜଣେ ସିଭିଲ୍ ଇଂଜିନିୟର । ସେ ସୁଶାନ୍ତ ସିଂହଙ୍କ ମୃତ୍ୟୁ ମାମଲାକୁ ନେଇ ୟୁଟ୍ୟୁବ୍ରେ ବିଭିନ୍ନ ଭିଡିଓ ଅପ୍ଲୋଡ୍ କରିଥିଲେ । ଯେଉଁଥିରେ ବଲିଉଡ୍ର ବିଭିନ୍ନ କଳାକାରଙ୍କ ସହ ଅକ୍ଷୟ କୁମାରଙ୍କୁ ମଧ୍ୟ ସମାଲୋଚନା କରିଥିଲେ । ସେ ତାଙ୍କ ଭଡିଓରେ, ‘ଅକ୍ଷୟ କୁମାର ସୁଶାନ୍ତଙ୍କ ପ୍ରେମିକା ରିୟାଙ୍କୁ କାନାଡା ବିଦା କରିଦେବା ପାଇଁ ଚେଷ୍ଟା କରୁଥିଲେ ।’
ଆଉ ଏକ ଭିଡିଓରେ ରାଶିଦ କହିଥିଲେ ଯେ ଅକ୍ଷୟ ଏମ୍ ଏସ୍ ଧ୍ୱନୀ ଭଳି ବଡ଼ ଫିଲ୍ମରେ ସୁଶାନ୍ତଙ୍କ ଏଣ୍ଟ୍ରିକୁ ମଧ୍ୟ ନାପସନ୍ଦ କରିଥିଲେ । ଆଉ ଏକ ଭିଡିଓରେ ରାଶିଦ କହିଥିଲେ, ’ ଅକ୍ଷୟ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ ଓ ମୁମ୍ବାଇ ପୋଲିସ୍କୁ ଗୁପ୍ତରେ ମିଳୁଥିଲେ । ’ ଯାହାକୁ ନେଇ ଅକ୍ଷୟ କୁମାର ପ୍ରତିକ୍ରିୟା ପ୍ରକାଶ କରିବା ସହ ମାନହାନୀ ମକଦ୍ଦମା କରିଛନ୍ତି ବୋଲି ଅକ୍ଷୟଙ୍କ ନିକଟତମ ସୂତ୍ରରୁ ଜଣାପଡ଼ିଛି ।
ପ୍ରକାଶଯୋଗ୍ୟ, ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ, ପୁଅ ଆଦିତ୍ୟ ଠାକ୍ରେ ଓ ମୁମ୍ବାଇ ପୋଲିସକୁ ବଦନାମ କରିବା ଅଭିଯୋଗରେ ରାଶିଦ୍ ସିଦ୍ଦୀକୀଙ୍କ ନାମରେ ଶିବସେନା ଲିଗଲ୍ ସେଲ୍ ଥାନାରେ ଏଫ୍ଆଇଆର୍ ଦେଇଥିଲା ।
ଫଳରେ ସିଦ୍ଦୀକୀଙ୍କୁ ମୁମ୍ବାଇ ପୋଲିସ୍ ଗିରଫ କରିଥିଲା । ପରେ ରାଶିଦ୍ ଜାମିନ୍ରେ ଆସିଥିଲେ । ମୁମ୍ବାଇ ପୋଲିସ ତଦନ୍ତରୁ ଜାଣିବାକୁ ପାଇଥିଲା ଯେ ରାଶିଦ୍ ଏଭଳି ଭିଡିଓ ୟୁଟ୍ୟୁବ୍ରେ ପୋଷ୍ଟ କରି ୪ ମାସ ମଧ୍ୟରେ ୧୫ ଲକ୍ଷ ଓ ଖାଲି ସେପ୍ଟେମ୍ବର ମାସରେ ୬.୫ ଲକ୍ଷ ଟଙ୍କା ରୋଜଗାର କରିଥିଲେ ।