କାଚ ଗ୍ଲାସରେ ପାଣି ପିଉଛନ୍ତି ନା ନାହିଁ, ଶରୀରରେ ଥିବା ଅନେକ ରୋଗକୁ କରିବ ଭଲ
ସାଧାରଣତଃ ଲୋକମାନେ ପାଣି ପିଇବା ପାଇଁ ଘରେ ଷ୍ଟିଲ ଗ୍ଲାସ ବ୍ୟବହାର କରନ୍ତି। ସେଥିପାଇଁ ପ୍ରାୟ ଘରେ ପାଣି ପିଇବା ଓ ରଖିବା ପାଇଁ ପ୍ଲାଷ୍ଟିକ୍ ବୋତଲ ବ୍ୟବହାର କରାଯାଏ। କାଚରେ ତିଆରି ଗ୍ଲାସ କିମ୍ବା ବୋତଲ ବହୁତ କମ ବ୍ୟବହାର ହୁଏ । ବିଶେଷକରି ଯେତେବେଳେ ଜଣେ ଅତିଥି ଆସନ୍ତି ସେତେବେଳେ ଆମେ କାଚ ଗ୍ଲାସ୍ ବ୍ୟବହାର କରୁ। କିନ୍ତୁ ଯଦି ଆପଣ ପ୍ରତିଦିନ କାଚ ଗ୍ଲାସରେ ପାଣି ପିଅନ୍ତି, ତାହେଲେ ଆପଣଙ୍କୁ ମିଳିବ ଆଶ୍ଚର୍ଯ୍ୟକର ଲାଭ।
ଯେତେବେଳେ ଆପଣ ପ୍ଲାଷ୍ଟିକ୍ ବୋତଲ କିମ୍ବା ଷ୍ଟିଲ ଗ୍ଲାସରେ ପାଣି ପିଅନ୍ତି ଏହାର ସ୍ୱାଦ ସାଧାରଣ ପାଣି ଠାରୁ ଟିକିଏ ଅଲଗା ଲାଗିଥାଏ। ଏହାର ବାସ୍ନା ମଧ୍ୟ ଅଲଗା ଆସେ। ଏହାର କାରଣ ହେଉଛି ପ୍ଲାଷ୍ଟିକରେ କ୍ଷତିକାରକ ରାସାୟନିକ ପଦାର୍ଥ ଥାଏ। ଯାହା ପାଣି ମାଧ୍ୟମରେ ଶରୀରକୁ ଯାଇ ସ୍ୱାସ୍ଥ୍ୟ ସମସ୍ୟା ସୃଷ୍ଟିକରେ। କିନ୍ତୁ କାଚ ଗ୍ଲାସ କିମ୍ବା ବୋତଲରେ କୌଣସି ପ୍ରକାରର ରାସାୟନିକ ପଦାର୍ଥର ବିପଦ ନଥାଏ। ଆହୁରି ମଧ୍ୟ କୌଣସି ପ୍ରକାରର ଗନ୍ଧ କିମ୍ବା ସ୍ୱାଦରେ ପରିବର୍ତ୍ତନ ହୋଇନଥାଏ।
ଯେତେବେଳେ କାଚ ଗ୍ଲାସ୍, ବୋତଲରେ ପାଣି ରଖାଯାଏ, ତାହା ଦିନସାରା ସତେଜ ରହିଥାଏ। ଆହୁରି ମଧ୍ୟ ଏଥିରେ ପାଣି ସଫା ଅଛି କି ନାହିଁ ଜାଣିବା ସହଜ ହୋଇଥାଏ। କାଚ ଗ୍ଲାସଟି ପରିଷ୍କାର ହୋଇଥିବାରୁ ପାଣିରେ ଥିବା ମଇଳା ମଧ୍ୟ ଶୀଘ୍ର ଜଣାପଡ଼ିଯାଏ।ଅନେକଥର ଷ୍ଟିଲ୍ ଗ୍ଲାସ କିମ୍ବା ପ୍ଲାଷ୍ଟିକ୍ ଗ୍ଲାସରେ ପାଣି ପିଇଲେ ଆମିଷ ଗନ୍ଧ ଆସେ। କିନ୍ତୁ କାଚ ଗ୍ଲାସରେ ପାଣି ପିଇଲେ ଏପରି କିଛି ଅନୁଭବ ହୁଏ ନାହିଁ। କାଚ ଗ୍ଲାସ ସଫା କରିବା ବହୁତ ସହଜ।
ଯଦି ପ୍ଲାଷ୍ଟିକ କିମ୍ବା ଷ୍ଟିଲ ବୋତଲରେ ପାଣି ରଖାଯାଏ ତେବେ ଏହା ସ୍ୱାଭାବିକ ତାପମାତ୍ରାରେ ରହେନି। ଏହାର ତାପମାତ୍ରା ସବୁବେଳେ ବଢ଼ିଯାଏ ଓ ଜଳର ସ୍ୱାଦ ମଧ୍ୟ ଭଲ ଲାଗେ ନାହିଁ। କିନ୍ତୁ କାଚ ଗ୍ଲାସ୍ କିମ୍ବା ବୋତଲରେ ପାଣି ରଖିଲେ ଏହା ହୁଏ ନାହିଁ। କାରଣ କାଚ ଗ୍ଲାସ୍ କିମ୍ବା ବୋତଲ ଜଳର ତାପମାତ୍ରାକୁ ଦୀର୍ଘ ସମୟ ପର୍ଯ୍ୟନ୍ତ ଥଣ୍ଡା କିମ୍ବା ଗରମ ରଖିବାରେ ସହାୟକ ହୋଇଥାଏ। କେବଳ ପାଣି ନୁହେଁ, ଯେକୌଣସି ପାନୀୟ ରଖିବା ପାଇଁ ଆପଣ କାଚ ଗ୍ଲାସ୍ କିମ୍ବା ବୋତଲ ବ୍ୟବହାର କରିପାରିବେ।
