ହିମାଚଳ ପ୍ରଦେଶର ସୋଲନ୍ ଅନ୍ତର୍ଗତ କୁମାରହଟ୍ଟି ଠାରେ ଏକ ତିନି ମହଲା କୋଠା ଭୁଶୁଡ଼ି ପଡ଼ିବା ଫଳରେ ଅତି କମ୍ରେ ୧୫ ଜଣଙ୍କର ମୃତ୍ୟୁ ହୋଇଥିବା ଆଶଙ୍କା କରାଯାଉଛି । ଏଥିରେ କିଛି ଭାରତୀୟ ଯବାନ୍ ମଧ୍ୟ ରହିଛନ୍ତି । ଏହି କୋଠାରେ ୫୦ ଜଣରୁ ଊର୍ଦ୍ଧ୍ୱ ଲୋକ ଥିଲେ । ସେଥିମଧ୍ୟରୁ ୩୦ ଜଣ ହେଉଛନ୍ତି ଯବାନ୍ । ୧୭ ଜଣ ଆହତ ଯବାନ୍ଙ୍କୁ ଉଦ୍ଧାର କରାଯାଇଛି । ସେମାନଙ୍କ ମଧ୍ୟରୁ ଦୁଇ ଜଣଙ୍କ ଅବସ୍ଥା ସଂକଟାପନ୍ନ ରହିଛି । ଅନ୍ୟ ୧୩ ଜଣ ଏବେବି କୋଠା ତଳେ ଦବି ହୋଇ ରହିଛନ୍ତି । ଏହି କୋଠାରେ ଏକ ହୋଟେଲ ଚାଲିଥିଲା । ତେଣୁ କିଛି ହୋଟେଲ କର୍ମଚାରୀ ମଧ୍ୟ ତା ତଳେ ରହି ଯାଇଛନ୍ତି । ସ୍ଥାନୀୟ ପୋଲିସ୍ ପ୍ରଶାସନ ଓ ଉଦ୍ଧାରକାରୀ ଦଳ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିଛନ୍ତି ।
ସୂଚନା ଅନୁଯାୟୀ, ୫୦ ଜଣ ଯବାନ୍ ସେହି ବାଟ ଦେଇ ଯାଉଥିବା ବେଳେ ମଧ୍ୟାହ୍ନ ଭୋଜନ କରିବା ପାଇଁ ହୋଟେଲକୁ ଯାଇଥିଲେ । ସେହି ସମୟରେ ତିନି ମହଲାର ଏଇ ହୋଟେଲଟି ଭୁଶଡ଼ି ପଡ଼ିଥିଲା । ତେବେ କୋଠା ଭୁଶୁଡ଼ିବାର କାରଣ ଜଣାପଡ଼ି ନାହିଁ ।