ରାଜ କପୁର ଓ ଦିଲ୍ଲୀପ କୁମାରଙ୍କ ପୈତୃକ ଘରକୁ କିଣିବ ପାକ୍ ସରକାର, କରାଯିବ ରାଷ୍ଟ୍ରୀୟ ସ୍ମାରକୀ ଘୋଷଣା
ଇସ୍ଲାମବାଦ : ପାକିସ୍ତାନ ସରକାର ପ୍ରଖ୍ୟାତ ଅଭିନେତା ରାଜ କପୁର ଓ ଦିଲ୍ଲୀପ କୁମାରଙ୍କ ପୈତୃକ ଘରକୁ କିଣିବାକୁ ନିଷ୍ପତ୍ତି ନେଇଛନ୍ତି । ଏହି ଦୁଇଜଣ ସୁପର ଷ୍ଟାରଙ୍କ ପୈତୃକ ଘର ପେଶ୍ଓ୍ଵାର ଖେଓ୍ଵର-ପକ୍ତୁନଖ୍ଵାରେ ଜରାଜୀର୍ଣ୍ଣ ଅବସ୍ଥାରେ ରହିଛି । ତେବେ ଏହାକୁ ଘର ମାଲିକ ଧ୍ୱଂସ କରିଦେବା ନେଇ ଖବର ଶୁଣାଯାଉଥିଲା । ଏଠିକାର ସରକାର ଏହି ଦୁଇଟି ଘରକୁ ରାଷ୍ଟ୍ରୀୟ ସ୍ମାରକ ଭାବେ ଘୋଷଣା କରିଛନ୍ତି ।
ଖେଓ୍ଵର- ପକ୍ତୁନଖ୍ଵାରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ଗୃହ ରାଜ୍ୟ । ଏହି ଦୁଇଟି ଐତିହାସିକ ଅଟ୍ଟାଳିକାର ମୂଲ୍ୟ ନିର୍ଦ୍ଧାରଣ କରିବାକୁ ପୁରାତତ୍ତ୍ୱ ବିଭାଗକୁ ସରକାର ନିର୍ଦ୍ଦେଶ ଦେଇଛନ୍ତି । ଦେଶ ବିଭାଜନ ପୂର୍ବରୁ ଏହି ଦୁଇ କଳାକାର ଏଠାରେ ଜନ୍ମ ନେବା ସହ ତାଙ୍କର ପିଲାବେଳ ଏହି ଘରେ କଟିଥିଲା । ରାଜ କପୁରଙ୍କ ଘର କିସ୍ସା ଖ୍ଵାନୀ ବଜାରରେ ରହିଛି । ରାଜ କପୁରଙ୍କ ଘର ‘କପୁର ହାବେଳୀ’ ନାମରେ ପରିଚିତ । ଏହାକୁ ରାଜ କପୁରଙ୍କ ବାପା ବିଶେଶ୍ୱରନାଥ କପୁର ୧୯୧୮ରୁ ୧୯୨୨ ମଧ୍ୟରେ ତିଆରି କରିଥିଲେ ।
ଅଟ୍ଟାଳିକାକୁ ଭାଙ୍ଗି ପ୍ଲାଜା ନିର୍ମାଣ କରିବାର ଥିଲା
ଅଭିନେତା ଦିଲ୍ଲୀପ କୁମାରଙ୍କ ପ୍ରାୟ ୧୦୦ ବର୍ଷ ପୂରୁଣା ପୈତୃକ ଘର ବି ଏହି ଇଲାକାରେ ରହିଛି । ଏହି ଘର ମଧ୍ୟ ଜରାଜୀର୍ଣ୍ଣ ଅବସ୍ଥାରେ ଅଛି । ଏହାକୁ ସେତେବେଳର ନଓ୍ଵାଜ ସରିଫ ସରକାର ରାଷ୍ଟ୍ରୀୟ ସ୍ମାରକୀ ରୂପେ ଘୋଷଣା କରିଥିଲେ ।
ଏହି ଐତିହାସିକ ଅଟ୍ଟାଳିକାକୁ କେତେଥର ଘର ମାଲିକଙ୍କ ପକ୍ଷରୁ କମର୍ସିଆଲ୍ ପ୍ଲାଜା ଭାବେ ବ୍ୟବହାର କରିବାକୁ ଚେଷ୍ଟା କରାଯାଇଥିଲା । ତେବେ ସରକାର ଏହାକୁ ଅଗ୍ରାହ୍ୟ କରିଦେଇଥିଲେ । ଏବେ ଖାନ୍ ସରକାର ଐତିହାସିକ ମହତ୍ତ୍ୱ କାରଣରୁ ଏହି ଅଟ୍ଟାଳିକାକୁ ସଂରକ୍ଷିତ କରିବାକୁ ଚାହୁଁଛନ୍ତି ।
କପୁର ଅଟ୍ଟାଳିକାର ମାଲିକ ଏହାକୁ ଭାଙ୍ଗିବା କଥାକୁ ଅସ୍ୱୀକାର କରିଛନ୍ତି
ବର୍ତ୍ତମାନର କପୁର ହାବେଳି ମାଲିକ ଅଲି କାଦର ଘର ଭାଙ୍ଗିବା କଥାକୁ ଅସ୍ୱୀକାର କରିଛନ୍ତି । ସେ କହିଛନ୍ତି ଯେ ଏହାକୁ ସଂରକ୍ଷଣ କରିବାକୁ ସେ ପୁରାତତ୍ତ୍ୱ ବିଭାଗକୁ ବହୁବାର ଅନୁରୋଧ କରିଛନ୍ତି । ଘର ମାଲିକ ଏହି ଅଟ୍ଟାଳିକାକୁ ବିକିବାକୁ ସରକାରଙ୍କ ନିକଟରେ ୨୦୦ କୋଟି ଟଙ୍କା ଦାବି କରିଛନ୍ତି ।
