ଦେବଦୂତ ସାଜିଛନ୍ତି ଶିଖ୍ ଯୁବକ, ଟ୍ଵିନ୍ ସିଟିରେ କୋଭିଡ୍ ଆକ୍ରାନ୍ତଙ୍କୁ ଯୋଗାଉଛନ୍ତି ମାଗଣା ଅକ୍ସିଜେନ୍
ଭୁବନେଶ୍ୱର(କେ.ନ୍ୟୁଜ): କୋଭିଡ୍ ଆକ୍ରାନ୍ତଙ୍କ ପାଇଁ ଦେବଦୂତ ସାଜିଛନ୍ତି ଶିଖ୍ ଯୁବକ। ୪ ଶିଖ୍ ଯୁବକ ରାଜଧାନୀ ଓ କଟକର ବିଭିନ୍ନ ସ୍ଥାନରେ ବୁଲି କୋଭିଡ୍ ଆକ୍ରାନ୍ତଙ୍କୁ ଯୋଗାଉଛନ୍ତି ଅକ୍ସିଜେନ୍। ଏମାନେ ସତବୀର ସିଂ, ପରମଜିତ ସିଂ, ତଞ୍ଜୋ ସିଂହ ଏବଂ ବିବେକ ତଲଓ୍ଵାର ।
ହୋମ ଆଇସୋଲୋସନରେ ଥିବା ରୋଗୀଙ୍କ ପାଖରେ ଗୋଟିଏ ଫୋନ୍ କଲରେ ପହଞ୍ଚୁଛି ଅକ୍ସିଜେନ୍। ନିଜ ହାତରୁ ଟଙ୍କା ଖର୍ଚ୍ଚ କରି ଅସହାୟଙ୍କ ଘରେ ପହଞ୍ଚାଉଛନ୍ତି ଅକ୍ସିଜେନ୍ ସିଲିଣ୍ଡର। ଏବେ କଟକ ଓ ଭୁବନେଶ୍ଵରରେ ମାଗଣାରେ ବଣ୍ଟା ଯାଉଥିବା ବେଳେ ଆଗକୁ ଅନ୍ୟ ଜିଲ୍ଲାରେ ସେବା ଯୋଗାଇବାକୁ ଲକ୍ଷ୍ୟ ରଖିଛନ୍ତି ଏହି ଯୁବକ। ପ୍ରଥମେ ୮୦୧୮୦୦୮୦୨୧ (8018008021) ନମ୍ବରରେ ଭିଡିଓ କଲରେ ରୋଗୀର ସ୍ୱାସ୍ଥ୍ୟ ପରୀକ୍ଷା କରୁଛନ୍ତି । ନିହାତି ଆବଶ୍ୟକ ହେଉଥିଲେ ଅକ୍ସିଜେନ ଯୋଗାଇ ଦିଆଯାଉଛି ।
ଅକ୍ସିଜେନ୍ ସିଲିଣ୍ଡର ହସ୍ତାନ୍ତର କଲା ପରେ କିଭଳି ବ୍ୟବହାର କରିବେ ସେ ବିଷୟରେ ବୁଝାଉଛନ୍ତି । ଅତି ଆବଶ୍ୟକ ହେଲେ ମେଡିକାଲରେ ଆଡମିଟ୍ ହେବାକୁ ମଧ୍ୟ ପରାମର୍ଶ ଦେଉଛନ୍ତି। ବିଭିନ୍ନ ସମୟରେ ବିଭିନ୍ନ ପ୍ରକାରର ସେବା ଯୋଗାଇ ଆସୁଥିବା ଶିଖ ଯୁବକଙ୍କୁ ଏଭଳି କାର୍ଯ୍ଯ ପାଇଁ ସବୁ ମହଲରେ ପ୍ରଶଂସା କରାଯାଉଛି।
