ଚାନ୍ଦବାଲି(କେନ୍ୟୁଜ୍): ଭଦ୍ରକ ଜିଲ୍ଲା ଚାନ୍ଦବାଲି ତହସିଲ ଅଧିନସ୍ଥ ଘଟପୁର ହେଙ୍ଗୁପତି ମହାଳିକସାହିରେ ଅଗ୍ନିକାଣ୍ଡ ଘଟି ୧୫ବଖରା ଘର ଜଳିଯିବା ସହ ୧୧ ଗୋରୁ ଜୀବନ୍ତ ଦଗ୍ଧ ହୋଇଯାଇଛନ୍ତି । ନିଆଁ ଲାଗି ୩ଜଣ ଆହତ ମଧ୍ୟ ହୋଇଛନ୍ତି । ସୂଚନା ମୁତାବକ ଅଚାନକ କାଳବୈଶାଖୀ ଆସିବାରକୁ ଜୋରରେ ପବନ ସହ ଘଡଘଡି ଓ ବଜ୍ରାଘାତ ଘଟିଥିଲା । ଏହି ବଜ୍ରାପାତ ସମୟରେ ହେଙ୍ଗୁପତି ମହାଳିକସାହିର ବିରଭଦ୍ର ମହାଳିକ , ଉମାକାନ୍ତ ମହାଳିକ , କମଳାକାନ୍ତ ମହାଳିକ ସମେତ ୮ ପରିବାରର ୧୫ବଖରା ଘର ନିଆଁରେ ସମ୍ପୂର୍ଣ୍ଣଭାବେ ପୋଡି ଛାରଖାର ହୋଇଯାଇଛି ।
ନିଆଁର ଭୟାବହ ଏତେ ଜୋର ଥିଲା ଯେ ଘର ଭିତରୁ କିଛି ବି ବାହାରକୁ କାଢିବା ସମ୍ଭବ ହୋଇନଥିଲା । ଫଳରେ ଘରେ ଥିବା ଘର କରଣା ସାମଗ୍ରୀ ସମେତ ଧାନ , ଚାଉଳ , ଟଙ୍କା ଜଳିପୋଡି ପାଉଁଶ ହୋଇଯାଇଥିଲା । ଖବର ପାଇ ତିହିଡି ଓ ମତୋର ୨ଟି ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲା । ପାଖାପାକି ୩ ଘଣ୍ଟାରୁ ଅଧିକ ସମୟ ଲାଗିଥିଲା ନିଆଁ ଲିଭାଇବା କାର୍ଯ୍ୟ । ସେହିପରି ମତୋରେ ମଧ୍ୟ ଅଗ୍ନିକାଣ୍ଡ ଘଟି ବିଳମ୍ବିତ ରାତିରେ ୨ବଖରା ଘର ପୋଡିଯାଇଛି । ତେବେ ତୁରନ୍ତ ଅଗ୍ନିବିପନ୍ନ ପରିବାରଙ୍କୁ ସରକାରୀ ସାହାଯ୍ୟ ପ୍ରଦାନ କରିବାକୁ ଦାବି ହୋଇଛି ।