ମଝି ଚିଲିକାରୁ ଉଦ୍ଧାର ହେଲେ ସମସ୍ତ ୬୦ ଡଙ୍ଗା ଯାତ୍ରୀ, ୧ଘଣ୍ଟା ଧରି ଫସି ରହିଥିଲେ

ବ୍ରହ୍ମଗିରି (କେନ୍ୟୁଜ): ଚିଲିକା ମଝିରେ ଫସିଥିବା ଯାତ୍ରୀବାହୀ ଡଙ୍ଗାରୁ ଉଦ୍ଧାର ହେଲେ ସମସ୍ତ ଯାତ୍ରୀ। ସାତପଡ଼ା ଚିଲିକାରେ ଆଜି ଦିନ ପ୍ରାୟ ୧ଟା ବେଳେ ଯାନ୍ତ୍ରିକ ତ୍ରୁଟି ଯୋଗୁ ଫସି ଯାଇଥିଲା ଡଙ୍ଗା। ତେବେ ଅଳ୍ପକେ ବର୍ତ୍ତିଗଲେ ୬୦ ଯାତ୍ରୀ । ଡଙ୍ଗାରେ ୬୦ ଯାତ୍ରୀ ଓ ୩୦ରୁ ଉର୍ଦ୍ଧ୍ବ ବାଇକ୍ ଥିଲା। ଡଙ୍ଗାଟି ଜହ୍ନିକୁଦା ଘାଟ ନିକଟରୁ ସାତପଡ଼ା ଅଭିମୁଖେ କିଛି ବାଟ ଯିବା ପରେ ମେସିନ ଖରାପ ହେଇ ଯାଇଛି । ଯାହା ଫଳରେ ଯାତ୍ରୀମାନେ ଚିଲିକା ମଝିରେ ପ୍ରାୟ ୧ଘଣ୍ଟା ଅଟକି ରହିଥିଲେ ।

ଯାତ୍ରୀ ମାନଙ୍କ ଚିତ୍କାର ଶୁଣି ଚିଲିକାରେ ମାଛ ଧରୁଥିବା ମତ୍ସଜୀବୀ ଘଟଣା ସ୍ଥଳରେ ପହଞ୍ଚି ନିଜ ଡଙ୍ଗାରେ ସମସ୍ତ ଯାତ୍ରୀଙ୍କୁ ଉଦ୍ଧାର କରିଥିଲେ। ବାରମ୍ବାର ସାତପଡ଼ା ଚିଲିକାରେ ଏଭଳି ଘଟଣା ଘଟୁଛି। ମାତ୍ରାଧିକ ଯାତ୍ରୀ ଓ ବାଇକ୍ ଚିଲିକା ପାର ହେଉଥିଲେ ମଧ୍ୟ ଘାଟ ପାଖରେ ପ୍ରଶାସନ କୌଣସି ସୁରକ୍ଷିତ ବ୍ୟବସ୍ଥା କରୁନଥିବା ଅଭିଯୋଗ ହେଉଛି। ଘାଟ ଡଙ୍ଗାରେ ଯାତ୍ରୀ ମାନଙ୍କ ପାଇଁ ଲାଇଫ ଜାକେଟ ର କୌଣସି ବ୍ୟବସ୍ଥା ମଧ୍ୟନାହିଁ ।