ତାଳଚେର: ସାରା ବିଶ୍ୱରେ ଲକଡାଉନ ଚାଲିଥିବା ବେଳେ ତାଳଚେରରେ ଏକ ଆଦର୍ଶ ବିବାହ ଦେଖିବାକୁ ମିଳିଛି । ଏଠାକାର ଚିତ୍ରକୁଟ ଶିବ ମନ୍ଦିରରେ ନିରାଡମ୍ବର ସହକାରେ ଏକ ବିବାହ ଅନୁଷ୍ଠିତ ହୋଇଯାଇଛି । ତାଳଚେର ଟାଉନ୍ ବିରାଦରପଡା ନିବାସୀ ପଂଚାନନ ବେଉରା ଜଣେ ଗରିବ ଓ ଅସହାୟ ବ୍ୟକ୍ତି । ତାଙ୍କ ଝିଅର ବିବାହ ବୟସ ହୋଇ ଯାଇଥିଲେ ମଧ୍ୟ ଆର୍ଥୀକ ଅବସ୍ଥା ସ୍ୱଚ୍ଛଳ ନଥିବାରୁ ବିବାହ କରି ପାରୁନଥିଲେ । ଏଥିପାଇଁ ଚିନ୍ତାଗ୍ରସ୍ତ ଥିଲେ ପଞ୍ଚାନନ । ଏହି ଖବର ପାଇ ତାଳଚେରର ସାମାଜିକ ଅନୁଷ୍ଠାନ ମାତୃଭୂମୀ ଫାଉଣ୍ଡେସନ୍ ସହଯୋଗର ହାତ ବଢ଼ାଇଥିଲେ । ଫାଉଣ୍ଡେସନର ସଦସ୍ୟ ମାନେ ଏହି ଆଦର୍ଶ ବିବାହ କରିବାକୁ ନିଷ୍ପତି ନେଇଥିଲେ । ସାରା ରାଜ୍ୟରେ ଲକ୍ ଡାଉନ୍ ପାଳନ ହେଉଥିବାବେଳେ ଏହି ବିବାହ କରିବାକୁ ପ୍ରଶାସନ ପାଖରୁ ମାତୃଭୂମି ଫାଉଣ୍ଡେସନ ଅନୁମତି ଆଣିଥିଲେ । ପ୍ରଶାସନର ନିର୍ଦ୍ଦେଶ କ୍ରମେ ତାଳଚେର ସାମନ୍ତସାହି (ୱାର୍ଡ ନଂ-୨) ର ଚନ୍ଦନ ଦାସଙ୍କ ସହିତ ବିରାଦରପଡାର ବିଷ୍ଣୁପ୍ରିୟା ବେଉରାଙ୍କର ବିବାହ ହୋଇଥିଲା । ଲକଡାଉନ ଯୋଗୁଁ ନାଁ ଥିଲା ହୋମ ନା ଥିଲା ନିଆଁ କେବଳ ଉଭୟ ଉଭୟକୁ ମନ୍ଦିରରେ ବରଣମାଳା ପିନ୍ଧାଇ ହୋଇଛନ୍ତି ବାହାଘର । ଏଥିରେ ସୀମିତ ଲୋକଙ୍କ ମଧ୍ୟରେ ସାମାଜିକ ଦୂରତା ରଖି ନିରାଡମ୍ବର ଭାବେ ବିବାହ ଉତ୍ସବ ସମ୍ପନ୍ନ କରାଯାଇଥିଲା ।