ଭୁବନେଶ୍ବର(କେନ୍ଯୁଜ୍) : ଭୁବନେଶ୍ବରସ୍ଥିତ ରାଜ୍ୟ ସଂଗ୍ରହାଳୟରେ ମଙ୍ଗଳବାର ସରକାର ପର୍ବତାରୋହିଣୀ କଳ୍ପନା ଦାଶଙ୍କ ସ୍ମୃତିରେ ତାଙ୍କ ପୋଷାକ ପ୍ରଦର୍ଶନ କରାଯାଇଛି। କଳ୍ପନା ବ୍ୟବହାର କରିଥିବା ପୋଷାକ ଓ ଉପକରଣ ମଧ୍ୟ ଏଠାରେ ପ୍ରଦର୍ଶିତ ହୋଇଛି। ସେ ୨୦୦୮ରେ ଏଭରେଷ୍ଟ ଚଢିବା ବେଳେ ବ୍ୟବହାର କରିଥିବା ସାମଗ୍ରୀ ପ୍ରଦର୍ଶନ କରାଯାଇଛି। କଳ୍ପନା ୨୦୧୭ରେ ରାଜ୍ୟ ସଂଗ୍ରହାଳୟକୁ ତାଙ୍କର ପୋଷାକ ପ୍ରଦାନ କରିଥିଲେ।
ସୂଚନାଯୋଗ୍ୟ ଯେ, ମେ ୨୩ ତାରିଖ ଗୁରୁବାର ମଧ୍ୟାହ୍ନ ସମୟରେ ପାହାଡ଼କୁ ଭଲ ପାଉଥିବା ମଣିଷଟିଏ ସେହି ପାହାଡ କୋଳରେ ହିଁ ଶୋଇଯାଇଥିଲା ଚିରଦିନ ପାଇଁ ଚିର ନିଦ୍ରାରେ। ଏଭରେଷ୍ଟରେ ପ୍ରାଣ ହରାଇଛନ୍ତି ପର୍ବତରାଣୀ କଳ୍ପନା ଦାଶ । କଳ୍ପନା ହେଉଛନ୍ତି ପ୍ରଥମ ଭାରତୀୟ ମହିଳା ଯିଏ ଏଭରେଷ୍ଟର ଶିଖରକୁ ଛୁଇଁବା ପାଇଁ ଆବଶ୍ୟକ ଅର୍ଥ ନିଜ ଉଦ୍ୟମରେ ଯୋଗାଡ଼ କରିଥିଲେ।
ଆର୍ଥିକ, ଶାରୀରିକ ତଥା ସାମାଜିକ ଆହ୍ୱାନକୁ ସାମ୍ନା କରି ଜଣେ ନାରୀ, ବିଶେଷ କରି ଓଡ଼ିଆ ହିସାବରେ ଏମିତି ଏକ ଉପଲବ୍ଧି ହାସଲ କରିବାର ଉଦାହରଣ ଅତି ବିରଳ । ଦୁଇ ଦୁଇଥର ବିଫଳତାର ସାମ୍ନା କରିବା ପରେ ମଧ୍ୟ ତାଙ୍କର ଉତ୍ସାହ ମରି ଯାଇ ନଥିଲା । ପ୍ରତିଦିନ ସେ ନିଜ ସହର ଉପକଣ୍ଠରେ ଥିବା ୧୩୫୨ ପାହାଚ ଥିବା କପିଳାସ ପାହାଡ଼କୁ ଚଢ଼ି ଅଭ୍ୟାସ କରୁଥିଲେ । ନିଜ ପିଠିରେ ୩୦ କିଲୋ ଓଜନ ବୋହି ଚଢ଼ିବା ଓ ଓହ୍ଲାଇବାର ଅଭ୍ୟାସ ଦିନକୁ ପାଞ୍ଚ ପାଞ୍ଚଥର କରୁଥିଲେ ।