ଦୀର୍ଘ ୪ ଘଣ୍ଟାର ପରିଶ୍ରମ ପରେ ୬୦ ଫୁଟ୍ ତଳୁ ଉଦ୍ଧାର ହେଲା ସ୍ୱରାଜ, ହେଲେ ବଞ୍ଚିପାରିଲାନି
ଆଠମଲ୍ଲିକ ବ୍ଲକ କଳା ମାଟି ଗାଁରେ ଘଟିଥିଲା ଅଘଟଣ । ୬୦ ଫୁଟ ତଳେ ଫଶି ରହିଥିଲା ନାବାଳକ । କେନାଲର ପାଣି ଦେଖିବାକୁ ଆସି ଭୁଲରେ ସାଇଫନ ଭିତରେ ଖସିପଡିଥିଲା ନାବାଳକଟି । ତୁରନ୍ତ ଖବର ମିଳିବା ପରେ ଜେସିବି ସାହାଯ୍ୟରେ ଆରମ୍ଭ ହୋଇଥିଲା ଉଦ୍ଧାର କାର୍ଯ୍ୟ । ହେଲେ ଦୀର୍ଘ ୪ ଘଣ୍ଟାର ଅକ୍ଲାନ୍ତ ପରିଶ୍ରମ ପରେ ମିଳିଛି ଶବ ।
ଆଠମଲ୍ଲିକ(କେନ୍ୟୁଜ): ଆଠମଲ୍ଲିକ ବ୍ଲକ କଳା ମାଟି ଗାଁରେ ଘଟିଥିଲା ଅଘଟଣ । ୬୦ ଫୁଟ ତଳେ ଫଶି ରହିଥିଲା ନାବାଳକ । କେନାଲର ପାଣି ଦେଖିବାକୁ ଆସି ଭୁଲରେ ସାଇଫନ ଭିତରେ ଖସିପଡିଥିଲା ନାବାଳକଟି । ତୁରନ୍ତ ଖବର ମିଳିବା ପରେ ଜେସିବି ସାହାଯ୍ୟରେ ଆରମ୍ଭ ହୋଇଥିଲା ଉଦ୍ଧାର କାର୍ଯ୍ୟ । ହେଲେ ଦୀର୍ଘ ୪ ଘଣ୍ଟାର ଅକ୍ଲାନ୍ତ ପରିଶ୍ରମ ପରେ ମିଳିଛି ଶବ ।
ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଆଠମଲ୍ଲିକ ବ୍ଲକ ଅଏଡା ପଂଚାୟତର କଳାମାଟି ଗ୍ରାମରେ । ଏହି ଗାଁ ନିକଟରେ ପ୍ରବାହିତ ଏକ କେନାଲକୁ ପାଣି ଦେଖିବାକୁ ଆସିଥିବା ଗ୍ରାମର ୮ ବର୍ଷର ବାଳକ ସ୍ଵରାଜ କୁମାର ରାଉତ । ହଠାତ୍ ଅସାବଧନତା ବଶତଃ ସେ ସାଇଫନରେ ଖସି ପଡିଥିଲା । ଏହି ସାଇଫନର ଦୈର୍ଘ୍ୟ ପ୍ରାୟ ୬୦ ଫୁଟର ଥିଲା । କଳାମାଟି ଗ୍ରାମର ଅଜୟ ରାଉତଙ୍କ ପୁଅ ସ୍ଵରାଜ କୁମାର ରାଉତ । ଯିଏକି ଆଠମଲ୍ଲିକ ଶିଶୁ ବିଦ୍ୟା ମନ୍ଦିରର ଛାତ୍ର ।
କିଏ ଜାଣିଥିଲା ଆଜିର ସୂର୍ଯ୍ୟ ଉଦୟ ସ୍ଵରାଜ ପାଇଁ ଶେଷ ସୂର୍ଯ୍ୟ ଉଦୟ ହୋଇ ଆସିବ । ସକାଳ ପାଇବା ପରେ ସ୍ଵରାଜ ଆସିଥିଲା ବାପାଙ୍କ ସହିତ ଗ୍ରାମ ନିକଟରେ ପ୍ରବାହିତ କେନାଲର ପାଣି ଦେଖିବାକୁ । ସେଠାରେ ସେ ସାଇଫନରେ ପଡି ଭିତରକୁ ଚାଲି ଯାଇଥିଲା । ଏ ଖବର ପାଇ ତୁରନ୍ତ ଦମକଳ ବାହିନୀ ଆସି ଉଦ୍ଧାର କରିବାକୁ ଚେଷ୍ଟା କରି ବିଫଳ ହେବା ପରେ ନିରୁପାୟ ହୋଇ ଶେଷରେ ଜେସିପି ସାହାଯ୍ୟରେ ସାଇଫନ ଭଙ୍ଗା ଚାଲିଥିଲା । ଘଟଣା ସ୍ଥଳରେ ଆଠମଲ୍ଲିକ ଉପଜିଲ୍ଲାପାଳ ଡ଼ଃ ଜିତେନ୍ଦ୍ର କୁମାର ପାତ୍ର ପହଞ୍ଚି ଘଟଣାର ଅନୁଧ୍ୟାନ କରିଥିଲେ । ଦମକଳ ବିଭାଗର ବଡ଼ ମଟର ପମ୍ପ ଆସି ସାଇଫନର ଜଳ ନିଷ୍କାସନ କରିବା ପରେ ଶେଷରେ ସ୍ୱରାଜର ମିଳିଥିଲା ମୃତଦେହ ।
ଦୀର୍ଘ ୪ ଘଣ୍ଟାର ଅକ୍ଲାନ୍ତ ପରିଶ୍ରମ ପରେ ମିଳିଥିଲା ଶବ । ତେବେ ମୃତଦେହ ଉଦ୍ଧାର ପରେ ଆମ୍ବୁଲାନ୍ସ ଯୋଗେ ଡାକ୍ତରଖାନାକୁ ପଠାଯାଇଛି । ଏହି ଘଟଣାରେ କଳାମାଟି ଗାଁ ରେ ଶୋକାକୁଳ ପରିବେଶ ସୃଷ୍ଟି ହୋଇଛି । ଘଟଣାଟି ସମଗ୍ର ଆଠମଲ୍ଲିକ ସହରରେ ଚର୍ଚ୍ଚାର ବିଷୟ ପାଲଟିଥିବାବେଳେ, ସାଇଫନର ପ୍ରତିଷେଧକ ବ୍ୟବସ୍ଥା ପାଇଁ କ୍ଷୁଦ୍ର ଜଳସେଚନ ବିଭାଗର ଅବହେଳାକୁ ଦାୟୀ କରାଯାଇଛି । ପୋଲିସ ପକ୍ଷରୁ ଘଟଣାର ତଦନ୍ତ ଜାରି ରହିଛି ।
