ପଦ୍ମପୁର (କେନ୍ୟୁଜ୍) : କରୋନା ଭୟ ଯେ ଖାଲି ସହରରେ ଘାରିଛି ତା ନୁହେଁ ଗାଁରେ ବି ଲୋକେ ଭୟଭୀତ । ତେଣୁ ଜଣେ ବ୍ୟକ୍ତିଙ୍କର ମୃତଦେହ ୧୪ ଘଣ୍ଟା ଧରି ପଡ଼ି ରହିବା ପରେ ସ୍ୱେଚ୍ଛାସେବୀମାନେ ଆସି ଉଠାଇଲେ । ହେଲେ ଗାଁ ଲୋକ କି ସମ୍ପର୍କୀୟ କେହି ବି ଆସିଲେ ନାହିଁ । ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡ ଗାଇସିଲାଟ ବ୍ଳକ ଜାମୁଟବାହାଲ ଗାଁରେ ଏହି ଘଟଣା ଘଟିଛି ।
ଜାମୁଟ ବାହାଲ ଗ୍ରାମର ବିନୋଦ ଠାକୁର ପାଞ୍ଚ ଦିନ ପୂର୍ବରୁ ତାମିଲନାଡୁରୁ ଗାଁକୁ ଫେରିଥିଲା । ଘରେ ପହଞ୍ଚିବା ପରେ ତାଙ୍କୁ ଜ୍ୱର ହେଉଥିଲା । ତେବେ ଗତକାଲି ତାଙ୍କ ଦେହ ଭୀଷଣ ଅସୁସ୍ଥ ହେବାରୁ ଗାଁ ଓ ପରିବାର ଲୋକେ ଆମ୍ବୁଲାନ୍ସକୁ ଡାକିଥିଲେ । ହେଲେ କୌଣସି କାରଣରୁ ଆମ୍ବୁଲାନ୍ସ କର୍ମଚାରୀ ଏଠାକୁ ଆସିବା ପରେ ବିନୋଦଙ୍କୁ ହସ୍ପିଟାଲ୍ ନେବା ବଦଳରେ ଗୁରୁତର ଅବସ୍ଥାରେ ଘରେ ଛାଡ଼ିଦେଇ ଚାଲି ଯାଇଥିଲେ । ଫଳରେ କିଛି ସମୟ ପରେ ତାଙ୍କର ମୃତ୍ୟୁ ଘଟିଥିଲା । ପରେ ତାଙ୍କ ସ୍ତ୍ରୀ ଏବଂ ଝିଅ ଘରେ ଶବକୁ ଜଗି ରହିଥିଲେ ।
କରୋନା ଭୟରେ ତାଙ୍କର ସମ୍ପର୍କୀୟ କେହି ଆସି ନ ଥିବା ବେଳେ ଶବଟି ସକାଳ ପ୍ରାୟ ୧୦ଟା ପର୍ଯ୍ୟନ୍ତ ପଡ଼ି ରହିଥିଲା। ସୂଚନା ଅନୁସାରେ ରାତି ପ୍ରାୟ ୭ ଟା ବେଳେ ବିନୋଦଙ୍କର ମୃତ୍ୟୁ ହୋଇଥିଲା । ଆଉ ଆଜି ସକାଳ ୧୦ଟା ବେଳେ ମୃତଦେହ ଉଠିଥିଲା । ଗାଇସିଲେଟ ବ୍ଲକ ଅନ୍ତର୍ଗତ କେନ୍ଦୁଭଟା ଦେବଦତ୍ତ କ୍ଳବ୍ ସଦସ୍ୟମାନେ ଖବର ପାଇ ବିନୋଦଙ୍କ ଘରେ ପହଞ୍ଚିଥିଲେ । ଗାଇସିଲେଟ ବିଡିଓ ନିରଞ୍ଜନ ସା ଓ ତହସିଲଦାର ପୁଷ୍ପକ ପଧାନ ଉପସ୍ଥିତ ରହି କ୍ଲବ୍ର ସଦସ୍ୟମାନଙ୍କ ସହାୟତାରେ ମୃତଦେହକୁ ନେଇ ସତ୍କାର କରିଥିଲେ । ସେମାନେ ସମସ୍ତ କୋଭିଡ୍ ନିୟମ ମାନି ପିପିଇ କିଟ୍ ପିନ୍ଧି ଶବ ନେବା ସହ ସତ୍କାର ମଧ୍ୟ କରିଥିଲେ ।
ବିନୋଦ ଅତି ଦରିଦ୍ର ପରିବାରର । ରୋଜଗାର ପାଇଁ ତାମିଲନାଡୁ ଯାଇଥିଲେ । ହେଲେ ଏବେ ରୋଜଗାରିଆ ବ୍ୟକ୍ତିଟି ସାରା ପରିବାରକୁ ଅସହାୟ କରି ଚାଲି ଯାଇଛି ।